Swahili Bible2

40

Tabenakulo yoombekhebwa

1Umukasya waalomela Musa ari, 2“Khu shifukhu shishinyoowa she kumweesi uli ni khukhwiimisa i Iweema iye Khuubuusanilamo. 3Mubweene umwo uremo Isanduuku iye Indakaano, lwanyuma mukari uremo ingubo ikikhiisa. 4Lwanyuma ureere imeetsa, upaangekho bibiindu bibyaakhila khuukibakho. Ureere shisiindi sheesi itaala yiimakho, urekho tsitaala. 5Shisheeso she bubaani shire ibulafu we ngubo ikhiisa mukari, nga shaaloleleela Isanduuku iye Indakaano. Bowawo ingubo ikhiisa imulyaango kukwiingila isi i Tabenakulo. 6Shisheeso she biwaanwa bye khukhwoosha, shiimise ibweeni we kumulyaango kwe Tabenakulo. 7Lukalaaya lwe khuusaabilamo lure akari e Tabenakulo ni shisheeso, ulwiitsusemo ni kameetsi. 8Lwanyuma ibulafu we weema, urewo lulwaanyi, ubowekho ingubo ikhiisa imulyaango kukwiingila mu lwaanyi.

9“Bukula kamafura ke khuubita, usalaase khu Tabenakulo ni bibikiilikho byoosi, nio byoosi biikyele bikwalaafu. 10Salaasa kamafura ke khuubita khu sheeso she khukhwookhelakho biwaanwa, ni bipwakhuli byakhwo, ubikyelise bikwalaafu. Shisheeso shino kane shikyele nisho shishiiminyisa buukwalaafu. 11Biita tsikhabi khu lukalaaya lwe khuusaabilamo lwiikyele lukwalaafu.

12“Lwanyuma ureere Aroni ni babaana beewe amulyaango kwe Tabenakulo, ubasiinge ni kameetsi. 13Bukula bikwaaro bikwalaafu ibyo, ubikwaarise Aroni, umubiite ni kamafura, umwaawule khu baandi, akaanise nga umusaayi. 14Aamba babaana beewe nabo, ubarekho bikwaaro bibyaabwe. 15Nabo ubabiite tsikhabi, nga n’ubiitile paapa waabwe, nio nabo bantsakaanise ise nga basaayi. Khuubabiita khuno khukhaabekelise basaayi biilo ni biilo, khuumala kimiboolo kyoosi.”

16Nashiryo Musa waakhola ibyo byoosi byeesi Umukasya aamulakila khuukhola. 17Khu shifukhu shishinyoowa mu mweesi kwe kumwiiko kukuukhola khabili, beemisa i Tabenakulo. 18Musa waakiimisa mu bisiindi byayo nga asimikhamo tsifuremu, naluundi waarakho kimisaala kikikhiikha. 19Waakirakho shishikibiimbakho khu ngaaki, nga Umukasya n’amulakila khuushikhola.

20Waabukula kamabaale kakaaronebwakho indakaano, waakara mukari mwe Isanduuku iye Indakaano, waarakho ni kimisaala kye khuuwaamba nga basuta. Khu ngaaki waarakho shitsoloŋo shishireera shishiyakhilo. 21Lwanyuma wengisa Isanduuku iye Indakaano mu Tabenakulo, waarawo ni ingubo iye mukari, ikhiisa khukhwaama ibulafu, nga Umukasya n’aloma. 22Wengisa imeetsa mu weema iye khuubuusanilamo, luubeka lwangaaki lwe i Tabenakulo, ne nga ili ibulafu we ngubo ikhiisa. 23Waarawo kimikaati khu meetsa mu moni tsy’Omukasya, nga Umukasya n’amulakila.

24Wengisamo ni she khuurakho tsitaala, waashira lubeka lwe mwaalo we Tabenakulo, nga shaaloleleele imeetsa. 25Waarakho tsitaala, nga Umukasya n’amulomela. 26Wengisa shisheeso she bubaani mu Tabenakulo mukari, mu shifwo shikhosefu ibweeni we ngubo ikhiisa mukari. 27Khu sheeso isho, wookhelakho bubaani bubuwunya buulayi naabi, nga Umukasya n’alakila. 28Mu mulyaango kwe Tabenakulo waarayo ingubo ikhiisayo. 29Imulyaango kwe Tabenakulo iye weema iye khuubuusanilamwo, waarayo shisheeso she biwaanwa bibyooshe. Khu bweenekhwo wawaanayo biwaanwa bibyooshe ni bye biilimwa, nga Umukasya n’alakila. 30Lwanyuma waabukula lukalaaya luboofu lwe khusaabilamo, waalura akari e Tabenakulo ni shisheeso. Waatsukhamo kameetsi ke khusaaba. 31Mu bweene umwo nimwo mweesi Musa ni Aroni ni babaana ba Aroni baasaabatsakila kamakhono ni bikele. 32Abe nga batsya mu weema iye khukhwakaananilamwo, namwe aambi ni shisheeso, abe bali ni khuusaaba, nga Umukasya n’alakila Musa. 33Waabowa tsingubo tsitsikhiisa lulwaanyi lwe Tabenakulo ni shisheeso. Mu mulyaango kwe lulwaanyi, waaramo ingubo ikhiisamo. Nashiryo Musa waaba nga waamalile kumulimo.

Shiriifwa sh’Omukasya mu Tabenakulo

(Khuubala 9.15-23)

3440.34: 1 Bay 8.10,11; Isay 6.4; Ezek 43.4,5; Bimb 15.8Lwanyuma lifuumbi lyaabiimbilila iweema iye khukhwakaananilamwo, nio shiriifwa sh’Omukasya sheetsusa i Tabenakulo. 35Musa waalekha khunyalisa khukhwiingila mu weema ta, khulwekhuuba abe lifuumbi lyaakibiimbiliile naluundi abe shiriifwa sh’Omukasya sheetsusile i Tabenakulo.

36Mu ŋeendo tsye ba Isiraeli tsyoosi, abe nga lifuumbi lyaarurire khu Tabenakulo, lyaaniinile mu ngaaki, abe belooselayo khuukyeenda. 37Ne abe nga lyaaramirekho, baliinda khukhwoolisa ni litsya. 38Mu khukyeenda khwaabwe khwoosi, abe lifuumbi ly’Omukasya kumuusi liba khu Tabenakulo, ne mu shilo abe kumulilo kubonekhela mwifuumbi nio akile babaandu banyalise khuubona.