Swahili Bible2

39

Bikwaaro bye basaayi

(She Lukyeendo 28.1-14)

1Babaamanya khuukhola bikwaaro, baakhola biilayi bibyeene, nga bilimo iraangi imbuusi, inandaafu n’imbesemu. Bino abe babikwaara nga bakaanisa mu shifwo shikhosefu. Aroni naye bamukholela bikwaaro nga Umukasya n’alomela Musa.

2She khu ngaaki baashikhola mu ngubo tsiimiliwu naabi nga khulikho buwutsi bw’ezaabu, iraangi imbuusi, inandaafu n’imbesemu. 3Umubasi uwamanya buulayi akhola tsiwutsi tsye zaabu nga akhalamo bubuundu bukyeekhe naabi. Lwanyuma waatsirukhila atweela mu ngubo ilimo iraangi imbuusi, inandaafu n’imbesemu. 4She khu ngaaki shino baakholamo bisiintsa bibili, nga baabiwaambilisiile atweela khu mayi. 5Baakholelakho ni kumusipi nga nakwo kuli kwe ngubo indayi, nga mulimo bwe raangi imbuusi, buurandaafu ni buubesemu, byaaba nga Umukasya n’alakila Musa. 6Baabukula kamabaale ka onikisi baakarakho izaabu, lwanyuma baakhoorakho kamasina ke bikuuka bya Isiraeli likhumi na bibili. 7Kano baakara khu mayi ke she khu ngaaki shino, khuubawo mu lisiina lye bikuuka bye ba Isiraeli, shaaba busa nga Umukasya n’alakila Musa khuukhola.

Shikwaaro she khu shifuba

(She Lukyeendo 28.15-30)

8She khu shifuba baashikhola mu ngubo n’ikhola niyo indweela nga she khu ngaaki. 9Abe shilekhaana eyi ni n’eyi, nga baashifuumbilemo khabili. Buuleeyi ni buubalaayi abe shili tsi sentimita kamakhumi kabili na tsibili buli lubeka. 10Baaruungakho kiminyele kine kye kamabaale ke buukusi bwe angaaki naabi. Kumunyele kukuunyoowa abe kulimo kamabaale ka rubi, topazi, ni ganeti. 11Kukuukhola khabili abe kulimo emeralidi, safaya, ni dayamondi. 12Kukuukhola khataru abe kulimo tukoyisi, agate ni amesisiti. 13Kukuukhola khane abe kulimo berili, onikisi ni yasipa. Kano koosi baakakhwiikha mu zaabu. 14Kamabaale kaaba likhumi na kabili nga kalikho kamasina ke bikuuka bya Isiraeli. Kano abe kakhebusa bikuuka bye ba Isiraeli, naluundi nga bakakhoora nga shangumu. 15Khu ngubo iye khu shifuba, baarukhilakho kimikosi nga ky’ezaabu yonyene busa. 16Lwanyuma baakhola tsipore tsibili tsy’efeetsa, baatsira khu soonda tsye khu ngaaki tseeyo iye khu shifuba. 17Baabirisila kimikosi kili ky’ezaabu mu pore tsino, 18baatsibowela atweela ni bibyaba khu ngubo, baryo baabowa ingubo yino khu mayi ke she khu ngaaki. 19Baakhola tsipore tsibili tsy’ezaabu, baatsibowa khu soonda tsy’ebikele we she khu shifuba, khuukobolela khu ndulo khwe she khu ngaaki. 20Baakhola tsipore tsitsiindi tsibili baatsibowa ibweeni we kimikosi kye bweeni kye she khu ngaaki, aambi ni likemo, ne angaakikho e kumusipi. 21Baabowa tsipore tsye she khu ngaaki khu pore tsye she khu shifuba, shaaba nga Umukasya n’alomela Musa. Shino shaanyalisa she khu shifuba khuusungwaatsila angaaki e kumusipi, ne shaaba nga shewaambile.

Bikwaaro bibiindi bye basaayi

(She Lukyeendo 28.31-43)

22Shikwaaro she mukari baakhola she raangi imbuusi, nga shoosi shili she bubwooya bwe kamasheese. 23Isi kumurwe kubirira, baanabawo boomiisila ilala bari nio alekhe khuutyenuukha ta. 24Khu likemo lye aasi wayo, baarayo buuyeeye bwe ngubo imiliyu naabi nga ilimo iraangi imbuusi, ni burandaafu, ni buubesemu, nga baabirisiilemo ni buubeya. Byaba nga Umukasya n’alomela Musa khuukhola.

25Naluundi baakhola kamayiimba khukhwaama mu zaabu yonyene busa, baakara akari e buubeya, baabotokhelesa liikemo lyoosi. 26Bino byaatsya nga biloondekhana khu shikwaaro she bubwakaanisi, shaaba busa nga Umukasya n’alakila Musa.

27Lwanyuma baakholela Aroni ni babaana beewe tsisaati, 28tsingubo tsye khuubowa imurwe, tsingofwiila, ni bikwaaro bye mukari, 29ni kumusipi kwe khukhwibowa, nga kwe ngubo indayi naabi, ilimo iraangi imbuusi, inandaafu, n’imbesemu, nga baakisaayile buulayi, bino byaba nga Umukasya n’alomela Musa. 30Baakhola shipwakhuli sh’ekuutwa ikhosefu, khukhwaama mu zaabu yonyene busa, kila bakhoorakho buurone nga babaakhoora khu shangumu, bari, “Shawaanibwileyo nga shikwalaafu isi Umukasya.” 31Baaraambisa kumukosi kwe raangi imbuusi khuushibowa iburaangisi w’engubo iye khu murwe, nga Umukasya n’aboolela Musa.

Khuumaliilisa kumulimo

(She Lukyeendo 35.10-19)

32Nashiryo kumulimo kwe khukhwoombakha i Tabenakulo ni weema iye khuubuusanilamo kwaaba nga kwaaweele. Ba Isiraeli baaba nga baakholile khuuloondekhana ni byeesi Umukasya aalakila Musa khuukhola. 33Kila bayila isi Musa i Tabenakulo, iweema ni bibiraambisibwamo byoosi, ni bye khuusuungakho bibiindu, ni bisaala byayo, ni kimikhiikha, ni kimisiindi, ni bye khuukhwiikhamo, 34ni lihaafu lye limiiku lye khuubiimba khu ngaaki, nga baaliwakhile iraangi imbesemu, ni ngubo ikhiisa. 35Nga khulikho n’isanduuku iy’endakaano ni kimisaala kyakhwo, ni shitsoloŋo she khukhwiyakhila bibyoonako, 36n’imeetsa ni bibikitsiilakho byoosi, ni kimikaati kyeesi bawaanileyo isi Wele. 37Baareera n’itaala ni bibikitsiilakho nga byoosi bye zaabu, ni kamafura k’etaala, 38shisheeso sh’ezaabu, kamafura ke khuubita, bubaani bubuwunya buulayi, n’ingubo ikhiisa imulyaango w’eweema, 39shisheeso sha buroonzi ni shitiindilo shakhwo, kimisaala kye khusuta, ni bibitsiilakho, lukalaaya ni sheesi lwikhalakho, 40tsingubo tsitsikhiisa lulwaanyi ni bisiindi byakhwo ni mweesi babisimikha, ingubo ibiimba imulyaango we lulwaanyi, bitsaangi by’eweema, ni neebyo byoosi bibikanibwa khuuraambisibwa mu weema. 41Khwabakho bikwaaro bye shiriifwa bye basaayi babaakaanisa mu shifwo shikhosefu, bikwaaro bikhosefu bya Aroni umusaayi, ni bye babaana beewe, banyalise khukhwakaanisa nga basaayi.

42Ba Isiraeli baaba nga baakholile buli shitweela sheesi Umukasya aalakila Musa khuukhola. 43Musa weemenielesa bibiindu byoosi, waabona ari baakholile nga Umukasya n’alakila. Nashiryo, Musa waabawa tsikhabi.