Swahili Bible2

37

Khukhwoombekha Isanduuku

(She Lukyeendo 25.10-22)

1Lwanyuma Bezaleli waabukula kimisaala kimi akasiya wombekhamo Isanduuku. Buuleeyi abe tsifuuti tsitaru ni busiintsa butaru, buubalaayi tsifuuti tsibili ni khasiintsa khatweela khe khaane, khu fuuti tsibili ni khasiintsa khatweela khe khaane khuuniina mu ngaaki. 2Ibulafu ni mukari mwoosi waahakhamo izaabu, ni khuukibotookhelesa yoosi. 3Khu bikele byayo bine, baarakho tsipore tsy’ezaabu, nga buli luwaande lulikho tsibili. 4Waakhootsa kimisaala kimileeyi khukhwaama mu kusaala ku akasiya, waahakhakho izaabu. 5Weengisa kimisaala kimileeyi kino mu pore tsye khu ndulo khwe Indakaano, kye khuwaamba nga bakisuta. 6Wawaamba izaabu yonyene busa, waakhola she khu ngaaki khwe Isanduuku, nga shino shili shitsoloŋo she khukhwiyakhilakho bibyoonako. 7Waabukula izaabu, waabasamo bakeruubi babili, waabara khu buli luwaande lwe shitsoloŋo shatsana. 8Baakhola bikerubi bino byewaamba khu shitsoloŋo byaabeela ilala nga she khu bweene. 9Ba kerubi bano baaba nga buli mutweela waalolile isi uwashe, ne nga tsimoni tsyaloleele aasi khu shitsoloŋo. Tsindaha tsyaabwe ngatsyekukhile tsyaabiimbile khu shitsoloŋo, khuushitseeta.

Khuukhola i meetsa iye kumukaati kumukhosefu

(She Lukyeendo 25.23-30)

10Lwanyuma baakhola i imeetsa khukhwaama mu kuusaala ku akasiya, nga ili buuleeyi tsifuuti tsitaru, buubalaayi ifuuti indweela ni shisiintsa ni khuuniina mu ngaaki tsifuuti tsibili ni khasiintsa khatweela khe khaane. 11Yoosi baakiwakha izaabu inyene busa, naluundi bakibuumbilakho izaabu. 12Khu minwa ky’emeetsa, baarakho izaabu iyoola tsi milimita kamakhumi musaafu na tsiraano buubalaayi, naluundi baabuumbilakho izaabu khukhwibotokhelesa. 13Baabasa tsipore tsine tsy’ezaabu, baatsira khu bikele by’emeetsa, 14aambi ni kiminwa ky’emeetsa. Tsipore tsino abe tsili tsye khuuhandalasila kimisaala kye khuusuta mu shifwo shitweela. 15Baakhola kimisaala kimi akasiya kye khuusuta imeetsa, baakiwakha kyoosi n’izaabu. 16Lwanyuma nga baraambisa izaabu yonyene busa, baakhola tsisowaani, bipwakhuli, tsingalaaya, ni tsisaatsi. Bino abe bili ni khuuraambisibwa mu khwitsoloola biwaanwa bye khuunywa.

Khukhwoombakha shisiindi she taala

(She Lukyeendo 25.31-40)

17Bezaleli weelakho waaraambisa izaabu yonyene busa, waabasa kumukhoondi kwe taala. Kuukyele kwayo, kumukhoondi, bipwakhuli byakhwo, ni bimuli byakhwo, byoosi abe bili shishiindu shitweela. 18Itaala yabakho tsisakya tsisesaba, nga buli luwaande lulikho tsisakya tsitaru. 19Buli lutweela khu sakya itsyo, abe lulikho shikoombe, sheesi baakhoora nga shimuli, nga shilikho ni kumukhoondi ni busaafu. 20Akari we shisiindi sh’etaala yino abe basaahawo ni bimuli bine. 21Abe aasi a buli tsisakya tsibili isi tsyaamila khu mukhoondi tsyaasakalala, iliwo shimuli shitweela. 22Tsisakya ni bibisaaha itaala, abe byoosi byaayiwaamba atweela, nga babikhola khukhwaama mu zaabu inyene busa. 23Weloosela waakholayo tsitaala tsyayo musaafu, bibiwaambisa tsitaala tseene, ni bibitaatilisa likoshe, nga bino byoosi bili by’ezaabu yonyene busa. 24Itaala yoosi ni bikitsiilakho byamalawo izaabu iyoola tsikilo kamakhumi kataru na tsine.

Khukhwoombakha shisheeso she bubaani

(She Lukyeendo 30.1-5)

25Shisheeso she bubaani baashoombakha khukhwaama mu kuusaala ku akasiya. Buuleeyi ni buubalaayi abe ilekhaana busa nga buli lubeka tsi sentimita kamakhumi kane na tsiraano, ne khuuniina mu ngaaki tsi sentimita kamakhumi syeenda. Ikhaba tsiintsika tsye mu soonda baatsikhola tsyawaambanila atweela ni shisheeso shisheene. 26Khu ngaaki, khu ndulo, ni tsiintsika bye shisheeso waabiwakhakho izaabu yonyene busa, naluundi waabuumba izaabu waakilaandisa khu ndulo. 27Khu maande tsibili tsitsilolelanile, ne nga aasi e zaabu isi babuumbila khu ndulo, waarawo tsipore tsibili tsy’ezaabu, tsye khuuramo kimisaala nga bakisuta. 28Kimisaala kye khuusuta baakikhola mu kimi akasiya naluundi baakihakha izaabu.

Kamafura ke khuubiita ni bubaani

(She Lukyeendo 30.22-38)

2937.29: Luky 30.22-38Lwanyuma waakhola kamafura kamakhosefu, ke khuubiita basaayi, waakhola ni bubaani bubuwunya bulaayi, bweesi be kamakhula batubaasa ni khukhwitsiliilisa.