Swahili Bible2

36

1Bezaleli, ni Oholiabu, ni naabo boosi beesi Umukasya aweele kamakhula ke khuunyalisa khuukhola ni khuumiliisa i Tabenakulo, kane baraambe khuuloondekhana ni byeesi Umukasya alakiile.

Babaandu bareera biwaanwa biikali

2Nashiryo Musa waalaanga Bezaleli ni Oholiabu, ni naabo beesi Umukasya aawa kamakhula khuukhola bibiindu, khuurakikha kumulimo ukwo. 3Musa waabawa ibyo abe bibikanibwa byeesi babaandu bawaanayo, mu khumaliilisa shiifwo shikhosefu isho. Abe buli kumutikhinyi babaandu beloosela khu bwaabwe busa khuureera biwaanwa bibiindi. 4Shino shaakila abo boosi abe babaali ni kamakhula mu buraambi bwa buli saambo nabo beetsa, nga buli mutweela ali ni likatala lyeesi akhola. 5Kila balomela Musa bari, “Babaandu baareerire bibiindu bibifuurisawo ibyo bibikanibwa khuukhola kumulimo kweesi Umukasya alakiile ari khukhole.”

6Lwanyuma Musa waarusa likaambila mu burume bubuloma buri, “Mukhareera biwaanwa bibiindi bye khukhwoombakha shiifwo shikhosefu ta.” Babaandu baakamisila awo khuureera bibiindu. 7Byeesi baareera abe bituumisakho buukali bweebyo abe bibikanibwa khuukhola kumulimo.

Khukhwoombekha i Tabenakulo

(She Lukyeendo 26.1-37)

8Nashiryo babaandu bano baanyoowa baakhola i Tabenakulo ni tsingubo tsitsikikhiisa likhumi, ni tsingubo tsimiliyu naabi nga tsilimo iraangi imbuusi, inandaafu ni mbesemu, nga waakirukhilemo shifwaani sha kerubi. 9Tsingubo tsitsikhiisa abe tsilekhaana, nga buli ndweela buuleeyi ili tsifuuti kane na tsibili, ne buubalaayi tsifuuti tsisesaba. 10Baawaamba tsingubo tsiraano baatubaasa atweela yaamamo indweela, ni tsitsiindi natsyo baryo. 11Baara khu ngubo iseembayo biŋoli bye raangi imbuusi kamakhumi karaano. 12Biŋoli bino byeesi baara khu ndulo khwe tsingubo tseesi baanyoowa khuubowa atweela, byaalekhaana ni n’ebyo bye khu ngubo iye khaabili. 13Waakholayo bububowa atweela biŋoli bye tsingubo khuutsitubaasa atweela. Nashiryo i Tabenakulo yoosi baakibowa yaaba shishiindu shitweela.

14Angaaki we Tabenakulo, waakhola shiilama shishibiimbakho, khukhwaama mu ngubo likhumi n’andweela tseesi bakhola mu bwooya bwe tsimbusi. 15Nga tsoosi tsilekhaana busa buuleeyi bwa fuuti kamakhumi kane na tsiraano, ni buubalaayi bwa fuuti tsisesaba. 16Bawaamba tsiraano baatsitubaasa atweela khukhwaamisamo indweela, ni tsitsiindi tsisesaba natsyo baamisamo ikiindi. 17Khu ngubo tsino tsyoombi, khu buli shisiintsa shishaseemba khu ndulo, baarakho biŋoli kamakhumi karaano. 18Baakholayo bubuwaambisa atweela biŋoli ibyo, bubwoola kamakhumi karaano, nio baabowa tsingubo itsyo atweela. Musaambo yino, shishibiimba khu ngaaki shaaba nga shili she ingubo imbuufu. 19Baakholayo bibibiimba khu ngaaki bibiindi bibili, nga shitweela khukhwaama mu mahafu ke kamamiiku, ni shishiindi khukhwaama mu mahafu ke tsimbusi.

20Lwanyuma baasimikha bisiindi bye tsifuremu khulwe Tabenakulo, nga bye kuusaala ku akasiya. 21Buli kuusaala abe kwoola tsifuuti likhumi na tsiraano buuleeyi, naluundi tsibili ni shisiintsa buubalaayi. 22Buli kusiindi kwabakho bitsaangi bibili bye khuubowela khu kuundi kukukwoongelakho. 23Baakhola bisiindi kamakhumi kabili khuutseeta luwaande lw’emwaalo, 24nga khulikho ni kamalowo kamakhumi kabili k’efeetsa mweesi basimikha, nga buli kusiindi kamalowo kabili. 25Lwanyuma baakhola kimisiindi kikiindi kye Tabenakulo kamakhumi kabili, kye luwaande lw’engaaki, 26nga khulikho ni kamalowo kamakhumi kabili k’efeetsa mweesi basimikha, nga buli kusiindi kamalowo kabili. 27Khu luwaande lw’ebukwanyaanga nga niyo iyaba imukoongo we Tabenakulo, waarayo bisiindi bisesaba. 28Mu buli isoonda iy’enyuma, baalooselamo kuusiindi kutweela. 29Abe aasi buli kusiindi kuli khubwakwo, ne imurwe baakhola ipore indweela, yaakiwaambisa atweela, waakila imurwe kyaba shishiindu shitweela. Tsipore baakhola tsibili, nga tsisoonda tsy’enyuma tsoombi, buli ndweela ilikho indweela. 30Nashiryo luwaande lw’ebukwanyaanga, kimisiindi kyaba shinaane, nga kilikho ni kamalowo k’efeetsa likhumi na kasesaba, nga buli kusiindi kabili.

31Lwanyuma baakhola kikikhiikha khu ngaaki kiraano nga kimi akasiya, khubowa atweela kimisiindi ky’emwaalo. 32Baakhola kikiindi kiraano kye luwaande lw’engaaki, ni kikiindi kiraano ky’ebukwanyaanga. 33Waakhola lwe akari khu tsikhiikha, khuuba shinakari she kimisiindi, nga kwaama khu ndulo khukhwoolisa khu ndulo. 34Kimisiindi ni kikikhiikha kyoosi khu ngaaki baarakho izaabu. Tsipore tseesi baraambisa khuubowa atweela kikikhiikha baakhola tsy’ezaabu inyene busa.

Ingubo iye mukari ibiimba khu lisari likhosefu

(She Lukyeendo 26.31-37)

35Ingubo ikhiisa mukari baakikhola nga imiliwu naabi, nga barukhilakho kerubi, naluundi nga ilimo iraangi imbuusi, inandaafu n’imbesemu. 36Ingubo yino baakibowa khu bihanikha bine, nga bye zaabu naluundi nga babiyabila mu bisiindi bya akasiya. Bisiindi bino baabiwakha izaabu khu ngaaki, naluundi baabisimikha mu malowo kane k’efeetsa. 37Lwanyuma baakhola ingubo ikiindi ikhiisa imulyaango kwe Lisari Likhosefu. Baakikhola khukhwaama mu ngubo imiliyu, nga ilimo iraangi imbuusi, inandaafu n’imbesemu. 38Bihanikha biraano nibyo bibyawaambila ingubo yino khu bisiindi. Bisiindi bino n’imurwe wabyo ni khu ndulo abe bilikho izaabu. Ne biifwo biraano mweesi baabisimikha abe bya buroonzi.