Swahili Bible2

35

Indeekela iwaamba khu Sabato

1Musa waabusaasa lituuli lye ba Isiraeli boosi waabalomela ari, “Bino nibyo byeesi Umukasya abalakiile ari muli ni khuukhola. 235.2: Luky 20.8-11; 23.12; 31.15; 34.21; Lev 23.3; Maka 5.12-14Muli ni khuuraamba kimilimo khuumala biifukhu bisesaba, ne khu shifukhu she kumusaafu muli ni khuuba ni khuuwola khuukhosefu, khukhuuli khw’Omukasya. Umuundu yeesi ukhola buraambi khu shifukhu isho, ali ni khukhwiiribwa. 3Khu shifukhu sha Sabato, mukhabwaanakho kumulilo muungo tsyeenywe ta.”

Biwaanwa bye Tabenakulo

(She Lukyeendo 25.1-9)

4Musa weloosela waalomela lituuli ari, “Ishino nisho sheesi Umukasya alakiile. 5Buli mutweela n’abukule shiwaanwa ayile isi Umukasya. Uyo uuli ni kumwoyo kukuwaana, naayilile Umukasya biwaanwa bino: Izaabu, ifweesa, ni buroonzi, 6tsingubo tsimiliyu nga baatsirukha buulayi, nga tsilimo iraangi imbuusi, inandaafu n’imbesemu, bubwooya bwe tsimbusi, 7kamasyeelo ke kamasheese ni ke tsimbusi, keesi bamalile khuuhala, kimisaala kimi akasiya, 8kamafura ke mutaala, bibiwunya buulayi bye khuutubaasa mu mafura ke khuubiita, ni bubaani, 9kamabaale keesi balaanga bari onikisi, ni kamabaale kakaamiiliisa, ke khuura khu shikwaaro she khu ngaaki ni she khu shifuba.

Bibiraambisibwa khu Weema

(She Lukyeendo 39.32-43)

10“Abo boosi babaamanya buubasi ni beetse bakhole byeesi Umukasya alomile ari khukhole. Nga nimwo mumuuli, i Tabenakulo, 11iweema yayo ni shishibiimba khu ngaaki, bubuuma bubuwaamba tsingubo ni kimisiindi, kimikhiikha, tsifuremu, ni mweesi babisimikha. 12Isanduuku iye Indakaano ni bisaala bye khuukisutilakho, shitsoloŋo she khukhwiyakhila bibyoonako, n’ingubo ikhiisa mukari, 13imeetsa ni bisaala bye khuuraambisa khuukisuta, atweela ni bipwakhuli byakhwo; Kumukaati kwe Khuubawo khw’Omukasya, 14itaala ni bipwakhuli byayo, ni kamafura ke mutaala, 15bubaani bwe khu sheeso, ni kamafura ke khuubita ni bibiwunya buulayi, ni shishibiimba imulyaango, ni kumulyaango kwe Tabenakulo, 16shisheeso she khukhwookhelakho tsisaayilo, ni shiibya shakhwo, ni kimisaala kye khuukisutilakho ni bipwakhuli byakhwo, ni byeesi shiimikhakho, 17tsingubo tsye khuusuunga tsikhiise lulwaanyi, kimisimikha ni kyeesi kiimikhakho, n’ingubo ibiimba imulyaango we lulwaanyi, 18bitsaangi bibiwaamba i Tabenakulo ni bitsaangi bye lulwaanyi, ni kimikosi kyakhwo, 19bikwaaro byeesi barukhire buulayi bubweene bye basaayi babaakaanisa mu shifwo shikhosefu, bikwaaro bikhosefu byeesi Aroni ni babaana beewe bali ni khuukwaara, nga bakaanisa nga basaayi.”

Biwaanwa bireerebwa isi Umukasya

20Lwanyuma lituuli lye ba Isiraeli lyoosi lyaarura isi Musa, buli mutweela weelayo isi amenya. 21Abo beesi bilomo bino byawaamba khu myoyo kyaabwe, baakhola nga ni baakana, baareera isi Umukasya biwaanwa byaabwe, khuuraambisibwa mu khwoombakha i Tabenakulo, ni bibikanibwamo ni bikwaaro bikhosefu. 22Nashiryo, basaani ni bakhasi babaali ni kimyoyo kimilayi, abo abe babeeweleyo baareera biwaanwa byaabwe bya buli saambo nga mulimo, kimidaali, bye khu maru, tsintsiyi tsye khu ntsala, bipaangiri bye khu makhono, ni bibiindu bye zaabu, nga babiwaanayo isi Umukasya. 23Abo babaaba ni tsingubo tsimiliyu nga tsili tsy’eraangi imbuusi, namwe inandaafu, namwe imbesemu, namwe be bubwooya bwe tsimbusi, namwe kamasheelo keesi bahalile ke tsimbusi ni kamasheese, byoosi baabireera. 24Babaandi baareera ifeetsa ni bibiindu bya buroonzi, baabireera nga biwaanwa isi Umukasya. Ikhaba abo babaaba ni kimisaala kimi akasiya naabo baakireera.

25Bakhasi abe babaali ni kamakhula mu bye khuunaba bikwaaro ni kamakhono, baareera biilayi naabi abe byeesi banabile nga mulimo bye raangi imbuusi, birandaafu ni bibesemu. 26Aabawo bakhasi beesi kumwoyo kwawa, nabo baarukha tsingubo khukhwaama mu bwooya bwe tsimbusi. 27Baaraangilisi baareera kamabaale ka onikisi, ni naako kakaamiliisa, nga kano ke khuuraambisa khu shikwaaro she khu ngaaki ni khu she khu shifuba. 28Baareera bibiwunya bulaayi, ni kamafura ke mutaala, atweela ni bubaani. 29Nashiryo, ba Isiraeli boosi, basaani ni bakhasi, babaabona bari shaabawaambilekho naabi mu myoyo kyaabwe, khuureerera Umukasya shoosi sheesi aaba waalakiile Musa khuukhola, baabireera khu bwaabwe busa, baabiwayo isi Umukasya.

Baabasi Bezaleli ni Oholiabu

(She Lukyeendo 31.1-11)

30Kila Musa alomela babaandu ari, “Bona Umukasya waaroboore Bezaleli umwaana wa Uri, naluundi umwitsukhulu wa Huri, uwe mu shikuuka sha Yuda, 31waamwitsusile ni Mwoyo wa Wele, uwe buunyala, kamakhula ni khuumanya bye buubasi bwa buli saambo. 32Umukasya akana Bezaleli khuukhala kamakesi ke khuukhootsa bibiindu, nga bikholebwa mu zaabu, ifeetsa ni buroonzi, 33mu khubeetsa kamabaale kakaamiliisa, khuubeetsa bisaala, ni kimilimo kyoosi kye buubasi. 34Umukasya waamuweele niye ni Oholiabu, umwaana wa Ahisamaki, uwe mu shikuuka sha Dani, likatala lye khuuleekela babaandi kamakhula kano. 35Umukasya waabaweele buumanyilifu bwa buraawa buno, bubukholibwa ni baabasi, namwe babaamiliisa, namwe babaakhola bikwaaro biilayi naabi, nga bye raangi imbuusi ni birandaafu ni bibesemu, namwe babaanaba busa ni kamakhono.”