Swahili Bible2

34

Musa akhootsa kamabaale kakaandi

(Kamakaambila 10.1-5)

1Umukasya waalomela Musa ari, “Khootsa kamabaale kabili kabe nga abe kakaanyoowa. Ise intsya khukaronakho bilomo bibyaba khu kamabaale kakanyoowa, keesi iwe waaraaka amataayi. 2Kumutishinyi yirekekha uniine wiitse khu Lukiingi Sinaayi, wiitse isi ise ndi khu lukiingi khu ngaaki. 3Mbaawo umuundu ukuundi khukhwiitsa ni nawe ta, naluundi mbaawo umuundu uuli ni khukhwiima aambi ni lukiingi ta. Ikhaba tsikhaafu namwe kamasheese kakhaayila buunyaasi aambi ni lukiingi ta.”

4Nashiryo, Musa waakhootsa kamabaale kabili nga abe kakaanyoowa kaabili. Wenyukha mamilimili, waaniina khu Lukiingi Sinaayi nga Umukasya n’amulomela, nga waasutile kamabaale tsana mu makhono keewe. 5Lwanyuma Umukasya weekha nga ali mu namufweeli, weemikha awo, kila Umukasya ebuula lisiina lyeewe, nga Musa weemikhile awo. 634.6: Luky 20.5,6; Bala 14.18; Maka 5.9,10; 7.9,10Umukasya waabira ibweeni wa Musa, kila aloma ari, “Ise niye Umukasya, Ise niye Umukasya Wele uwe shiisa naluundi uwiyakhila. Ise s’ikhalalaka khaangu ta, naluundi ise ndi ni khuukana khuukali ni bubwiyikinwa bubukhawawo ta. 7Ise nookesanisa khuukana khwase khukhuukhakama ta, isi babaandu bikana ni bikana, niiyakhila bibyoonako ni naabo babaakhola bumiinyi. Ne shitweela busa, abo babaakhola bibyoonako imbawa shitaambiso, nga shitaambiso shino ishiwa ikhaba lisaaye ly’omwoonaki khukhwoola khu muboolo kwe khataru ni kwe khaane.”

8Khaangukho Musa weenamisa kumurwe kweewe aasi, wesaaya. 9Kila aloma ari, “Nishiba shaŋali shiri ise ndi ni tsikhabi khukhwaama isi iwe Mukasya, ise inoomba ndi khali utsiile ni nafwe. Shili shaŋali ndi ifwe khuli babaandu babaali ni bumiinyi, ne n’ukhwiyakhile bibyoonako byeefwe ni bumiinyi bweefwe, ukhuyile ifwe nga lisaaye lyoowo.”

Indakaano yiisibwa buyaakha

(She Lukyeendo 23.14-29; Kamakaambila 7.1-5; 16.1-17)

10Umukasya waamwiilamo ari, “Bona ari ise ndi khuukhola indakaano ni nawe. Kane ise ikhole bye kamakaanga mu moni tsye babaandu boowo boosi, bibikhakholikhatsakakho ahaandu oosi, namwe mu linaambo liliindi ta. Nashiryo babaandu beesi mulimo, kane babone buraambi bw’Omukasya, khulwekhuuba intsya khukhola shishiindu shishiyaangisa naabi. 11Ni muloondelele byeesi ise imbalakila khu shifukhu she shaleelo. Kane mubone nga ise ndimisa kamanaambo ako khuurura isi mulikho mutsya, ba Amori, ba Kanani, ba Hiti, ba Perizi, ba Hiivi, ni ba Yebusi. 12Muli ni khukhwitsiliilisa mubone muri, simukholakho ikwangwaani ni kamanaambo kakaali mu shibala sheesi mutsyamo ta. Ni mukhola isho, kane ukwo kube kumureko isi inywe muli. 1334.13: Maka 16.21Muli ni khuufuniaaka bibyeeso byaabwe, mufuniaake ni bisiindi byeesi abe besaayilakho, naluundi muminiangule bifwaani byeesi besaaya. 14Mukhesaayatsakaho wele ukuundi ta, akhali Umukasya yenyene, khulwekhuuba Umukasya uli Wele ali ni libuba liikali naabi.

15“Mukhakholakho ikwangwaani ni babaandu babaamenya mu shibala isho ta. Bali busa nga bamalaaya, khuuyiiyayiiya khu ba wele baabwe ni khuubawoongela biwaanwa. Mukhafukiilisa babaandu abo khuubalaanga mwaalya ni nabo byeesi bawoongeele ba wele baabwe ta. 16Mukhafukiilisa babaana beenywe baayila bakhaana baabwe ta, khulwekhuuba kane babaleekele khukhwisaaya ba wele baabwe. 1734.17: Luky 20.4; Lev 19.4; Maka 5.8; 27.15Mukhabuumba bifwaani byoosi khuuba ba wele beenywe ta.

1834.18: Luky 12.14-20; Lev 23.6-8; Bala 28.16-25“Muli ni khuukhola kamayiiya ke shifukhu she Kumukaati kukukhalimo kamamela ta, nga ise ni nabalomela. Mu mweesi kwa Abibu, muli ni khuulya kimikaati kikikhalimo kamamela ta, khuumala biifukhu musaafu. Khulwekhuuba mwaarura mu Misiri mu mweesi kwa Abibu.

1934.19: Luky 13.2“Buli shiikiboole shoosi shishisaalikha muungo mweenywe, ni biikiboole bibisaalikha mu khaafu, ni kamasheese, nga she seetsa shiba shishase. 2034.20: Luky 13.13Imoosi ingiboole iye sikilya nga ili iseetsa, uli ni khuukisikula khukhwaama isi Umukasya, nga uwaanayo lisheese lilyaana. Ne nga waakhalilewo khuulekha khukisikula ta, uli ni khuukifuna likosi ukiire. Ikhaba babaana beenywe besiinde, muli ni khuubaasikula. Mbaawo umuundu uuli ni khukhwiitsa isi indi nga ali busa mukhono ta.

2134.21: Luky 20.9,10; 23.12; 31.15; 35.2; Lev 23.3; Maka 5.13,14“Muli ni khuuraamba kimilimo khuumala biifukhu bisesaba, ne khu shifukhu she kumusaafu muli ni khuuwola, ikhaba mu mbuka iye khuumiitsa namwe iye likesa muli ni khuuwola. 2234.22 a Lev 23.15-21; Bala 28.26-31; b: Lev 23.39-43Muli ni khuukhola kamayiiya ke Likesa, nga muraambisa byeesi munyoowa khuukesa khukhwaama mu ŋaano, ni ke khuumaliilisa likesa, nga likesa liwakho. 23Basaani mu Isiraeli bali ni khuubonekha isi Umukasya Wele wa Isiraeli tsifuunda tsitaru mu mwiiko. 24Buli oosi isi mutsya, kane indimise kamanaambo karurewo, naluundi muwaambe liloba liikali. Nga mwaabonekhile isi Umukasya tsifuunda tsitaru, mbaawo umuundu ukane ebwakale liloba lyeenywe aliwaambe ta.

2534.25: Luky 12.10“Mukhawaanayo shishaayo khu sheeso isi ndi atweela ni kimikaati kikiilimo kamamela ta. Naluundi mbaawo inyama iye Kamayiiya ke Khuubirakho isi muli ni khuulekha yaakonawo khukhwoolisa kumutikhinyi ta. 2634.26 a Maka 26.2; b: Maka 14.21Buli mwiiko biilimwa byeesi muyila mu Lisaayilo ly’Omukasya Wele weenywe, bili ni khuuba ibyo bibifuurisayo buulayi.”

“Mukhawaamba imeeme mwaakiira, mwaakiteekhela mu mabeele ka maawe ta.”

27Umukasya waalomela Musa ari, “Rona bilomo bino byoosi, khuuloondekhana n’ikwangwaani isi ise ikholile ni nanywe ba Isiraeli.”

28Musa waamala khu lukiingi biifukhu kamakhumi kane, nga ali iyo kumuusi ni shiilo. S’alyakho shishiindu shoosi, namwe waanywakho kameetsi ta. Aryo waarona khu mabaale biilomo bye kwangwaani, nga nibyo Kamakaambila Likhumi.

Khuumelamela khwe mu moni mwa Musa

2934.29: 2 Kor 3.7-16Musa n’ekha aasi khukhwaama khu Lukiingi Sinaayi, nga waasutile mu mukhono mweewe kamabaale kabili abe khukhuuli ikwangwaani, niye s’amanya ari mu moni mweewe abe mulikho mumelamela nga aama khukanikha ni Wele ta. 30Aroni ni babaandu boosi ni baabona Musa, baabona nga shikhoba she mu moni mweewe shimelamela, baalekha khumwiitsa aambi ta. 31Ne Musa waabalaanga ari batsye isi ali, kila Aroni ni baaraangilisi be lituuli boosi bamukobolayo, Musa waabakanikhayo. 32Lwanyuma ba Isiraeli boosi baamwiitsayo, waabawa biilakilo byeesi Umukasya aamuwa, nga n’amukanikhayo khu Lukiingi Sinaayi.

33Nga Musa waamalile khuukanikha ni nabo, waabukula ingubo waabiimba mu moni mweewe. 34Ne abe buli lweesi Musa atsya mu weema khuukanikha isi Umukasya, arusakho ingubo iyo mu moni, khukhwoolisa n’arura antsye. Abe nga waarurire ibulafu, waabooleele babaandu byeesi Umukasya alomile, 35abe babaandu babona mu moni mwa Musa nga mumelamela. Ari abe Musa abiimba mu moni mweewe luundi, khukhwoolisa abe nga alikho elayo luundi khuukanikha isi Umukasya.