Swahili Bible2

33

Umukasya alomela ba Isiraeli khuurura khu lukiingi Sinaayi

133.1 a Rak 12.7; b: Rak 26.3; c: Rak 28.13Umukasya waalomela Musa ari, “Ari iwe yinyukha atweela ni babaandu beesi wareera khukhwaama i Misiri, mutsye mu shibala sheesi ise nasuubisa khuuwa Iburayimu, ni Isaaka, ni Yakobo. Babeene abo, ise nabalomela indi, ‘Shibala isho ikhaashiwe lisaaye lyeenywe.’ 2Ise ikhaasiindikhe malayika wase ibweeni weenywe, atsye atimise babaandu babashiilimo khuururamo. Bano nibo ba Kanani, ba Amori, ba Hiti, ba Perizi, ba Hivi, ni Yebusi. 3Mu shibala shino bubuushi ni kamabeele biikha busa nga kameetsi. Ne ise samweene singane intsye ni nanywe ta, khulwekhuuba muli babaandu be bumiinyi buukali naabi, lirima linyala lyaamaamba naabeerira khu ntsila.”

4Babaandu ni baawulila khuureewula khuno, boosi baarakikha khuulila khulwe kumutaambo kumukali, baalekha khukwaara bipaangiri byaabwe ni neebyo bibibamiliisa ta. 5Khulwekhuuba abe Umukasya waalomeele Musa ari, “Boolela ba Isiraeli uri, ‘Inywe muli ni bumiinyi buukali naabi, naaba utsya ni nanywe, lirima linyala lyaamaamba naabeerira khu ntsila. Nashiryo, ni mwiyabule bipaangiri byeenywe ni bye khukhwimiliisa, khukhwoolisa ise ni kane ikhalewo shinaanu she khuubakhola khusiinywe.’ ” 6Nashiryo nga bashiili khu Lukiingi Sinaayi, babaandu boosi beyabula bibiindu ibyo.

Iweema ibulafu we kaambi

7Abe buli busheele Musa ayila iweema iye khuubuusanilamo, waakisimikha aleeyikho khukhwaama mu kaambi. Abe buli muundu ukana khukhwireeba isi Umukasya, atsya mu weema iye khuubuusanilamo, nga yino ili ibulafu we kaambi. 8Abe buli lweesi Musa atsiila mu weema yino, babaandu boosi buli mutweela atsya wemikha mulyaango mwe liweema lyeewe, baloleelela Musa khukhwoolisa n’engilila ilala mukari. 9Abe nga Musa wengiile mu weema, lifuumbi liitsa lyebuusa imulyaango we weema, nga Umukasya ali khuukanikha ni Musa. 10Nga abe babaandu baaboone lifuumbi lyebuusile imulyaango we weema, boosi benyukha besaayila mulyaango mwe tsiweema tsyaabwe. 11Nga mu weema mukari, abe Umukasya akanikha ni Musa nga baalolelaniile, nga umuundu n’akanikha n’uwashe. Lwanyuma abe Musa arurayo khukhwiila mu kaambi, Yoswa nga abe niye umusooleli umuyeetakho, arama mu weema.

Musa abona shiriifwa sh’Omukasya

12Musa waalomela Umukasya ari, “Iwe waanomeele ise uri, ‘Yila babaandu bano mu shibala sheesi nabasuubisa.’ Ne iwe siwambooleele ise uyo isi ndi khuutsya ni naye ta. Iwe waanomeele ise uri, ‘Ise naamanya lisiina lyoowo, naluundi uri iwe waambeele ise tsikhabi.’ 13Nashiryo ise ndikho ikhuloomba iwe ndi, noola iwe wambeele ise tsikhabi, n’untsokese sheesi ukana ise ikhole, nio ise imanye ndi iwe wambeele tsikhabi. Naluundi uli ni khuushimanya uri linaambo lino lili lye babaandu boowo.”

14Umukasya waalomela Musa ari, “Kane samweene intsye ni nawe, imbone ndi siwiyembelela ta.” 15Musa wamukobolamo ari, “Noola iwe wamweene s’uli khuutsya ni nafwe ta, ukhakhulekha khwenyukha khukhwaama ano khwaatsya ta. 16Iwe n’ulekha khutsya ni nafwe, kane babaandu babaandi bamanye baryeena bari ise ni babaandu boowo, khuli ni tsikhabi khukhwaama isi iwe? Ne busa kane babaandu bamanye baarye bari, ise ni babaandu boowo khuli ba buraawa naluundi baarobore khu shibala khwoosi?”

17Kila Umukasya alomela Musa ari, “Shishiindu isho sheesi iwe ulomele, kane ise ishikhole, khulwekhuuba iwe uli umusaale wase isi nikhoyela, naluundi ise naakhumanya iwe lisiina.”

18Musa waamukobolamo ari, “Ise naakhuloombile, n’untsokese shiriifwa shoowo.”

1933.19: Roma 9.15Umukasya weelamo ari, “Ise inakhola buulayi bwase bubire ibweeni woowo, naluundi imbuule lisiina lyase mu moni tsoowo, ndi ‘Umukasya’. Kane ise imaambile shiisa naluundi niyakhile uyo yeesi isi samweene imba naasiimile. 20Ne iwe singene undole ise mu moni ta, khulwekhuuba mbaawo umuundu yeesi uwundola ise mu moni, waarama nga umulamu ta.” 21Umukasya waaloma luundi ari, “Yimikha andulo awo khu lulwaanda. 22Nga shiriifwa shase shibira, kane ikhubise mu lufwa lwe lulwaanda ikhubiimbekho ni kumukhono kwase khukhwoolisa nga naamalile khuubira. 23Lwanyuma kane indusekho kumukhono kwase, umbone imukoongo. Ne mu moni mwase singene mubonekhe ta.”