Swahili Bible2

32

Imoosi iy’ezaabu

132.1: Bur 7.40Babaandu ni baabona bari Musa s’alikho akobola khukhwaama khu lukiingi khaangu ta, baabuusana atweela, baatsya isi Aroni. Kila bamulomela bari, “Bona Musa, umusaani uwakhureera ifwe khukhwaama i Misiri s’abonekha ta. Sikhumanya oba shinaanu shishimwoolilekho ta. Nashiryo, iwe n’ukhubuumbileyo ifwe ba wele babaanyala baakhuraangilila ifwe.”

2Kila Aroni abalomela ari, “Lomela bakhasi beenywe, ni basooleli, ni babaana bekhaana, beyabule birere bye zaabu byeesi besaaha mubindereere.” 3Nashiryo babaandu beyabula birere bye zaabu khukhwaama khu maru kaabwe, baabiyila isi Aroni. 432.4: 1 Bay 12.28; Bur 7.41Aroni waabukula izaabu yino, waakiyengulaka, waakikhupa buulayi, waabuumbamo imoosi. Kila babaandu bekhoya nga bakuukuula bari, “O Ba Isiraeli, abano nibo ba wele beefwe babaakhureera ifwe khukhwaama mu Misiri!” 5Aroni n’abona ari shino shekhoyesele babaandu, woombekha shisheeso ibweeni w’emoosi. Kila akuukuula ari, “Kumukaamba khuli ni khuukholela Umukasya kamayiiya.” 632.6: 2 Kor 10.7Ni bwasha kumutikhinyi, babaandu benyukha mamilimili, bawaanayo tsisaayilo tsyaabwe tsye bibyookhe, ni biwaanwa bye lukoosi. Lwanyuma bekhala aasi khuulya ni khuunywa, baryo baakyelawo, bewaambila mu biindu bye buyeyani.

7Kila Umukasya alomela Musa ari, “Kobolayo aasi wangu, khulwekhuuba babaandu boowo beesi iwe waraangilila khukhwaama i Misiri baakholile bibyoonako. 8Baarurire khu mukhoosi kweesi isi nabalakila khuumenyamo, bebuumbiileyo babeene imoosi iye shiibya, baakisaayile naluundi baakikholeele iwoongo, nga baloma bari, ‘O Ba Isiraeli, bano nibo ba wele beenywe babaabarusa inywe khukhwaama mu shibala she Misiri!’ ”

9Kila Umukasya alomela Musa luundi ari, “Ari ise naaboone nga babaandu bano bali ni shikyili naabi naluundi bali ni bumiinyi. 10Nashiryo ari indurewo utsye, undekhe khulwekhuuba indi ni lirima liikali naabi, ingana khuubahesa boosi. Ne iwe Musa, kane ise ikhulekhe wikyelemo linaambo lye kamaani.”

1132.11: Bala 14.13-19Ne Musa wekoontselela Umukasya Wele weewe nga aloma ari, “O Umukasya, shiina kila iwe ukhalalila babaandu boowo, beesi iwe wamweene warusa mu Misiri nga uraambisa kamaani koowo ni bye kamakaanga? 12Kane isho shikile ba Misiri balome bari, ‘Umukasya aabakholela luwomelo waabarusa mu Misiri, waatsya waabahesela khu ngiingi, waabamalawo khu shibala shoosi.’ N’ushuusekho shishambaaso shoowo ulekhe khuuhesa babaandu boowo ta. 1332.13: Rak 22.16,17; 17.8Shebulila byeesi iwe wamweene wetsubila babaakaanisi boowo Iburayimu, ni Isaaka, ni Yakobo, nga ni wabalomela uri, ‘Lisaaye lyeenywe likhaabalaahe libe nga tsinieniesi tsye mwikulu, naluundi uri ikhaabawe liloba lino bamenyemo.’ ” 14Lwanyuma Umukasya waashuusakho shishambaaso sheewe waalekha khubahesa nga abe n’aloma ta.

15Lwanyuma Musa waashuukha weekha aasi khukhwaama khu lukiingi, nga waasutile kamabaale katsana kabili keesi Umukasya aronirekho mu makhono keewe. Umukasya abe waaronirekho ikwangwaani khu mbeka tsoombi, ibweeni n’inyuma. 16Wele umweene niye uwakhola kumulimo kwe kamabaale kano, niye umweene uwarona bilomo bibyabakho.

17Ne Yoswa n’awulila liyoombo abe lyeesi babaandu balikho bakhupa, kila alomela Musa ari, “Shibonekhana iliyo buusoolo mu kaambi.” 18Ne Musa waamwiilamo ari, “Seshinyala khuuba shiryo ta. Ilyo shilili liyoombo lye khuufuura busoolo, namwe bari baabafuurire ta. Khuli khukhwiimba khwe kumwikhoyo.”

19Ne ni boola aambi n’ikaambi, Musa waabona imoosi ni babaandu nga bashina. Khulwe lirima liikali, waatuuma kamabaale katsana aasi, mwisina mwe lukiingi kaamenyukhamo. 20Waabukula imoosi isi abe baakhola, waakiyengulila mu mulilo, lwanyuma waakisya yekela buufu, waasalaasa mu meetsi, waalakila ba Isiraeli khuukanywa.

21Kila Musa atsya isi Aroni amureeba ari, “Babaandu bano iwe bakhukholile baryeena kila ubareerirekho kumusaango kumuboofu kuno?”

22Aroni welamo ari, “Musaakhulu, iwe lirima likhakhwiira ta, iwe wamweene wamanya uri babaandu bano bali baboonaki. 23Khulwekhuuba ise baanomeele bari, ‘Musa uwakhurusa ifwe mu Misiri sikhumanya shishamwoolakho ta. Nashiryo iwe n’ukhubuumbile ifwe bawele babaakane bakhuraangilile.’ 24Kila ise imbalomela indi, ‘Ni mureere birere bye zaabu byeesi muli ni nabyo’. Ne ni babireera nase nabituuma mu mulilo, mwamamo imoosi iyino.”

25Ne Musa n’abona ari Aroni walekhile babaandu khuutsya khu bwaabwe, ate nga baasiku baabwe balikho babatsakhilila, 26Musa waatsya weemikha mu shilibwa sh’ekaambi, waaloma ari, “Abo boosi babaali khu luwaande lw’Omukasya ni beetse ano baantsitubaasekho.” Babaana be nda iya Levi boosi baatsya baamwitubaasakho.

27Waabalomela luundi ari, “Umukasya Wele uwa Isiraeli alikho aloma ari, ‘Buli mutweela n’awaambe lurima lweewe. Kyeenda mu kaambi mwoosi khukhwaama iyi ni neeyi, khukhwaama khu ndulo khukhwoola khu ndulo, nga mwiira ikhaba bayaaya beenywe, basaale beenywe, ni bahesana beenywe.’ ”

28Babaana ba Levi baakhola nga Musa n’abalomela, shifukhu isho beera babaandu baboola nga bikana bitaru (3,000).

29Lwanyuma ndi Musa waabalomela ari, “Shifukhu she shaleelo mwaamalile khuurobolebwa nga basaayi babaakaanisa Umukasya. Khulwekhuuba mumuwuliile, ikhaba nga ibeelemo khukhwiira babaana beenywe ni bayaaya beenywe. Khulwe shisheene isho, shaleelo Umukasya waabaweele inywe ikhabi.”

Musa ekoontselela lwe ba Isiraeli

30Khu shifukhu shisheelakho, Musa waalomela babaandu ari, “Mwaakholile shishoonako she kamaani naabi. Ari ingana khukhwiilayo isi Umukasya imbaloombele inywe, winyoola anyala waabeyakhila.” 31Nashiryo, Musa waakobolayo isi Umukasya kila aloma ari, “She khabi imbi, babaandu bano baakholile shishoonako she kamaani naabi. Bebuumbiileyo babeene ba wele be zaabu. 3232.32: Zab 69.28; Bimb 3.5Ne ari ise ikhuloomba iwe indi, ubeyakhile shishoonako shino. Ne noola ta, n’unduse ise mu shitabo sheesi waronamo lisiina lyase.”

33Ne Umukasya weelamo Musa nga aloma ari, “Abo babaakholile bibyoonako nibo beesi kane ise isyangule khukhwaama mu shitabo shase. 34Ne ari, n’utsye uraangilile babaandu ubayile mu shifwo sheesi ise nakhubolelakho. Bona, Malayika wase kane abaraangilile inywe. Ne shitweela busa, khu shifukhu khweesi indilaangilakho babaandu, abo be bibyoonako ikhaabawe shitaambiso.”

35Kila Umukasya abasiindikhila buulwaale buubi naabi, khulwekhuuba babaandu besaaya imoosi isi Aroni aabuumba.