Swahili Bible2

31

Baabasi Bezaleli ni Oholiabu

(She Lukyeendo 35.30—36.1)

1Umukasya waalomela Musa ari, 2“Bona, ise naaroboore Bezaleli umwaana wa Uri, naluundi umwitsukhulu wa Huri, khukhwaama mu shikuuka sha Yuda. 3Ise naamwitsusile niye n’Umwoyo wa Wele, khuumuwa kamakesi, khuumanya, ni bye buubasi byoosi. 4Kane anyalise khuubasa bibiindu biimiliwu naabi khukhwaama mu zaabu, ifeetsa ni mu buroonzi. 5Kane abeetse kamabaale ke khuumiliisa bibiindu, ni khuukheenga bisaala. Kane abe umubeetsi umulayi naabi.

6“Ise naarobore ni Oholiabu, umwaana uwa Ahisamaki, uwe mu shikuuka sha Dani, khuumuyeetakho. Ni naabo boosi babaali ni kamakhula mu bye buubasi, ise naabaweele buumanyilifu bwa buraawa, nio banyalise khuubasa bibiindu byoosi byeesi ise ikhulakiile iwe khuukhola. 7Bakhole iweema iye luubusano, Isanduuku iye Indakaano, shitsoloŋo she khukhwiyakhila bibyoonako, ni bibimilisa iweema, 8imeetsa ni bipwakhuli byakhwo, shisiindi khweesi itaala yiimisibwakho, ni bipwakhuli byakhwo, ni shisheeso she khukhwookhelakho bubaani. 9Naluundi shisheeso she biwaanwa bibyooshe ni bipwakhuli byakhwo, ni lukalaaya ni kusiindi kwalwo, 10bikwaaro bya Aroni umusaayi ni babaana beewe byeesi bali ni khuuronakho buulayi, byeesi bali ni khuukwaara nga bakhola busaayi, 11ni kamafura ke khuubita, ni bubaani bubuwunya buulayi bwe mu shifwo shikhosefu. Bali ni khuuloondelela babikhole nga ise nikhulakiile iwe.”

Kamakaambila ke shifukhu sha Sabato

12Umukasya weloosela waalomela Musa ari, 13“Boolela ba Isiraeli uri bali ni khukhwiisamo lukoosi mu shifukhu sha Sabato. Khulwekhuuba khano khali khaabonelo akari eenywe ni nase, khuumala kimiboolo kyoosi. Shino shibashebusa inywe shiri ise Umukasya, niye ubekesa inywe khuuba baakhosefu. 14Muli ni khukhwiisamo shifukhu sha Sabato lukoosi, khulwekhuuba shili shifukhu shikwalaafu. Uyo yeesi ufwotsola Sabato ali ni khukhwiiribwa. Uyo yeesi uraamba kumulimo khu shifukhu isho, aakha khukhwiiribwa. 1531.15: Luky 20.8-11; 23.12; 34.21; 35.2; Lev 23.3; Maka 5.12-14Khola buraambi khuumala biifukhu bisesaba, ne shifukhu she kumusaafu shili sha Sabato, shikhulu she khuuwola, naluundi shikwalaafu isi Umukasya. Uyo yeesi ukhola kumulimo khu shifukhu sha Sabato ali ni khukhwiiribwa. 16Nashiryo ba Isiraeli bali ni khukhwiisamo Sabato shiriifwa khuumala kimiboolo kyoosi, nga ili ikwangwaani ikhaakama ta. 1731.17: Luky 20.11Sabato khali khaabonelo khe biilo ni biilo akari aase ni babaandu ba Isiraeli, khakhokesanisa khari mu biifukhu bisesaba, Umukasya aabuumba likulu ni shibala. Ne khu shifukhu she kumusaafu waawola, weelamo kamaani.”

18Lwanyuma nga Umukasya waamalile khuukanikha isi Musa khu Lukiingi Sinaayi, waamuwa kamabaale kabili abe khweesi aronile bibiwaamba khu ndakaano iyo. Bino byaronebwa ni lulwaala lwa Wele.