Swahili Bible2

29

Khukhwaawula basaayi

1Ari mu khwaawula basaayi, nio banyalise khukhuuntsakaanisa ise nga bali basaayi, uli ni khuukhola bibiindu bino: Bukula imoosi iwuunwa ni kamamiiku kabili, biilamu buulayi nga sibilikho ilomo yoosi ta. 2Ubukule kumukaati kukukhalimo kamamela ta, ubukule bukeeki bubukhalimo kamamela ta, ne nga baatubaasilemo kamafura ke tsinyanyi, ni kamahaandu keesi batubaasilemo kamafura ke tsinyanyi. Bino byoosi bili ni khuuba bye buufu bwe ŋaano buulayi naabi. 3Aamba kimikaati ikyo kyoosi ukire mu shikono, ukireere nga mutsya khuwaanayo isaayilo iye tsimoosi tsiwuunwa tsibili ni kamamiiku kabili.

4Reera Aroni ni babaana beewe imulyaango kwe Tabenakulo, ubasiinge ni kameetsi. 5Lwanyuma ubukule bikwaaro ukwaarise Aroni. Mukwaarise ikaantsu, she khu ngaaki, shishiiba khu ye khu ngaaki, atweela ni kumusipi. 6Bukula ingubo iye khuura khu murwe ilikho isowaani, umure khu murwe khweewe. 7Bukula kamafura ke khuubita, umutsukhe khu murwe umubiite. 8Lwanyuma ureere babaana beewe, nabo ubakwaarise mu bikwaaro byaabwe. 9Bali ni khukhwibowa kimisipi naluundi bakwaare bye khu mirwe. Kane bekyele basaayi khuumala biilo ni biilo. Nashiryo iyino niyo isaambo isi uli ni khuubita Aroni ni babaana beewe.

10Nio lwanyuma ureere imoosi iwuunwa i mulyaango kwe Tabenakulo. Aroni ni babaana beewe bali ni khuura kamakhono kaabwe khu murwe kwayo. 11Abweene awo uli ni khuutsikhoonyela mu moni tsy’Omukasya, amulyaango kwe Tabenakulo. 12Raambisa lulwaala lwoowo, ubukule khu malasile ako, uwakhe khu ntsika tsye khu sheeso, ne kakaaramire ukatsukhe mwisina mwe shisheeso. 13Ubukule kiminaawa kye khu mala, ni luwaande luleeyi lwe shiini, ni tsimbiko tsoombi atweela ni kiminaawa kyakhwo, ubyookhele khu sheeso. 14Ne inyama iramire yoosi, atweela ni lihaafu, ni kamasisye, ubiyile ubyookhele ibulafu we kaambi, nga isaayilo irusawo bibyoonako.

15Lwanyuma ureere litweela khu mamiiku ako. Nga balikho balikhoonya, Aroni ni babaana beewe bare kamakhono kaabwe khu murwe khwalyo. 16Utaatilise kamalasile kaalyo, ukasalaase khu ndulo khwe shisheeso. 17Lwanyuma utanyakemo inyama iyo, usiinge bye muunda ni bileenge, ubire atweela ni kumurwe ni bisiintsa bibiramire. 1829.18: Efes 5.2; Filp 4.18Byoosi atweela ubyookhele khu sheeso. Shino shili isaayilo isi Umukasya, naluundi isilikakha yayo yikhoyesa Umukasya.

19Ureere limiiku liliramire. Nga balikho balikhoonya, Aroni ni babaana beewe bare kamakhono kaabwe khu murwe kwalyo. 20Bukulakho kamalasile uwakhe khu khuru khwa Aroni khu seetsa, ni khwe babaana beewe nakhwo uryo. Naluundi ubawakhe buli mutweela khu lwaala lukhuumwa lwe kumukhono ni lwe shikele, lwe luwaande luseetsa. Kamalasile kakaaramire kasalaase khu ndulo khwe shisheeso. 21Lwanyuma ubukule khu malasile kakaali khu sheeso, utubaasemo kamafura ke khuubita, ukasalaase khu Aroni ni bikwaaro byeewe ni babaana beewe, ni bikwaaro byaabwe. Shino kane shibakhole nibo khuuba baakhosefu ni bikwaaro byaabwe khuuba bikhosefu.

22“Khukhwaama lino ni lili limiiku lye khukhwaawula Aroni ni babaana beewe, bukula kiminaawa kyalyo, ni kye lisyeembe, ni kye khu mala, ni luwaande luuleeyi lwe shiini, ni tsimbiko tsoombi, ni kiminaawa kyakhwo, ni shinama sh’etakho she luwaande luseetsa, 23atweela ni kumukaati mutweela, ni kha keeki atweela ni kamafura kakaateekha, atweela ni lihaandu, khukhwaama mu shikono shishiili ibweeni w’Omukasya. 24Bibiindu bino byoosi uli ni khuubira mu makhono ka Aroni ni ke babaana beewe, babisute angaaki nga shiwaanwa sha buraawa isi Umukasya. 25Lwanyuma ubarusekho bibiindu byatsana, ubyookhele khu sheeso, atweela ni shiwaanwa sheesi umalile khukhwoosha, biweyo isilikakha indayi isi Umukasya, bimwikhoyese.

26“Ubukule inyama iye shifuba iye limiiku lye khukhwaawulibwa khwa Aroni, ukisute angaaki mu moni tsy’Omukasya. Lwanyuma iwe uyile inyama iyo. 27Tsinyama tsikhosefu tseesi uraambisire mu khwaawula Aroni ni babaana beewe, uli ni khuutsiira buraawa. Nga nitsyo: Inyama iye shiifuba ni shinama sh’omusaayi, byeesi basutile angaaki isi Umukasya mu mukholo kwe khukhwaawula. 28Ikhaba nyaanga, nga ba Isiraeli bawaanayo isi Umukasya biwaanwa bibireera lukoosi namwe bye khusiima, Aroni ni babaana beewe bali ni khuufunatsaka bisiintsa bino.

29“Bikwaaro bikhosefu byeesi Aroni araambisa ibyo, bili ni khuubiikhibwa buulayi, nio nyaanga lisaaye lyeewe lilimwiilila mu bikele nalyo libiraambise, nga baawulibwa naluundi nga baroborebwa. 30Uyo yeesi ukheele mu bikyele bya Aroni nga umusaayi ali ni khuukwaara bikwaaro ibyo khuumala biifukhu musaafu, nio lwanyuma eetse mu Tabenakulo khukhwakaanisa mu shifwo shikhosefu.

31“Bukula inyama iye limiiku liliraambisibwile mu mukholo kwe khukhwaawula, ukiteekhele mu shifwo shikhosefu. 32Aroni atweela ni basooleli beewe bali ni khuulya inyama iyo, nga bakiliilakho kimikaati kikiili mu shikono. Bali ni khuukiliila mulyaango kwe Tabenakulo. 33Nibo bonyene babaali ni khuulya khu nyama ni kimikaati byeesi baraambisile mu khurusawo bibyoonako, mu mukholo kwe khukhwaawula ni khuurobora. Babaandu ba busheele busa bakhalyakho ta, khulwekhuuba bibiindu bino bili bikhosefu. 34Noola inyama yoosi namwe kumukaati kwe khu mukholo kwe khukhwaawula kwaakonilewo khukhwoolisa shifukhu shishiilakho, ibyo uli ni khuubyoosha. Mbaawo khuubilya ta, khulwekhuuba bili bikhosefu.

35“Ni nashiryo uli ni khukhwaawula Aroni ni babaana beewe musaambo isi ikhubooleele. Kumukholo kuno kuli ni khuumala biifukhu musaafu. 36Buli shifukhu uli ni khuusala imoosi iwuunwa nga shiwaanwa she khuurusawo bibyoonako. Lwanyuma uli ni khuusala shishaayo she khuurusawo bibyoonako, she khuuwosa shisheeso, shiikele shikhosefu nga ushiwakha kamafura. 37Uli ni khuuwayo shiwaanwa she khuuwosa shisheeso shino buli shifukhu, khuumala biifukhu musaafu. Buli shishitiila khu sheeso isho, kane shikyele shikhosefu.

Biwaanwa bya buli shifukhu

(Khuubala 28.1-8)

38“Byeesi uli ni khuuwaanayo khu sheeso nibyo bino: Buli shifukhu uwaanayo tsimeeme tsye lisheese tsitsoolisa kumwiiko mutweela tsibili. 39Indweela uli ni khuukiwaanayo kumutikhinyi, ikiindi angoloobe. 40Inyoowa ili ni khuutsiilakho khasiintsa khe buufu buunose bubweene, nga baafukiilemo ni kamafura ke tsinyanyi, n’iviini ili ni khuutsukhibwa aasi nga shiwaanwa. 41Imeeme iramire uli ni khuukiwaanayo angoloobe, nga khulikho ni buufu, n’iviini nga kumutikhinyi. Kane shiwaanwa she kumulilo shino shibe shishiwunya buulayi shishireera isilikakha indayi isi Umukasya.

42“Shiwaanwa shishooshe shino shili ni khuukholebwa busheele khukhwaama khu muboolo mutweela khukhwoolisa khu kuundi. Muli ni khuushiwaanayo isi Umukasya, nga mushikholela imulyaango kwe Tabenakulo, isi kane ise ikhwaakananile iwe naluundi inganikhe ni nawe. 43Abweene awo niwo isi ise ikhakaananile ba Isiraeli, naluundi khuubawo khwase khukhaakhole i Tabenakulo khuuba ikhosefu. 44Ise ikhaakhole i Tabenakulo ni shisheeso khuuba bikhosefu naabi. Aroni naye ni babaana beewe ise ikhaabawe tsikhabi babe baakhosefu, nio banyalise khukhuuntsakaanisa ise nga basaayi. 45Ise ikhaamenye mu ba Isiraeli imbe Wele waabwe. 46Balimanya bari ise ndi Umukasya Wele waabwe, uwabarusa mu Misiri nabareera ino ndi nio imenye ni nabo. Ise niye Umukasya Wele waabwe.”