Swahili Bible2

28

Bikwaaro bye Basaayi

1“Laanga wandaayo Aroni, ni babaana beewe Nadabu, Abihu, Elieza, ni Isamari, ubaruse mu ba Isiraeli boosi, baraambe nga basaayi baase. 2Uli ni khuukholela wandaayo Aroni bikwaaro bikhosefu, nga bili bye shiriifwa naluundi biimiliwu. 3Lomela abo boosi beesi ise nawa kamakhula mu bye khuukhola bikwaaro, uri bali ni khuukholela Aroni bikwaaro bibimwawula khukhwaama khu baandu babaandi, abe umusaayi wase. 4Bali ni khuukhola bikwaaro bino: Shisiintsa she khuura khu shifuba, iye khukwaarira khu ngaaki, i kaanzu, isaati isi barukha busa, she khuubowa imurwe, ni kumusipi kwe khukhwibowa mu shikuute. Bali ni khuukholela wandaayo Aroni ni babaana beewe bikwaaro bikhosefu, nio baantsakaanise ise nga basaayi. 5Bikwaaro bino bili ni khuukholebwa khukhwaama mu ngubo imiliwu naabi, nga bakirukhakho izaabu, mu raangi imbuusi, inandaafu n’imbesemu.”

Shikwaaro she khu ngaaki

6She khu ngaaki bali ni khuushikhola khukhwaama mu ngubo imiliwu naabi, nga ilikho izaabu, n’iraangi imbuusi, inandaafu, n’imbesemu. Bali ni khuukirukha ni khukhwitsiliilisa khuukali. 7Ili ni khuuba mu bisiintsa bibili, shitweela ibweeni, shishiindi inyuma, ne nga yawaambanisibwila atweela khu mayi. 8Ni kumusipi kukukiwaamba, kuli ni khuukholebwa musaambo niyo indweela, khukhwaama mu ngubo indaayi naabi, nga kulikho izaabu, n’iraangi imbuusi, inandaafu n’imbesemu. 9Bukula kamabaale kakaalaangibwa onikisi kabili, ukhooremo kamasina ke bikuuka bye ba Isiraeli. 10Khu libaale litweela uronekho kamasina kasesaba, khu liindi nakhwo kasesaba, khuuloondekhana ni khuusaalikha khwe bakuuka baabwe ni khwaba. 11Khoora mu mabaale kano buulayi nga babaakhoora mu mabaale ke buukusi bwe angaaki ni bakhooramo khuukhola shangumu. Kamabaale kano uli ni khuukawakhakho izaabu khu ngaaki. 12Kamabaale kano uli ni khuukabowa khu shikwaaro she khu ngaaki, kabe nga she khushebulililakho isi ba Isiraeli. Aroni ali ni khuukwaara kamasina kano nga eetsa isi Umukasya khu mayi keewe, nga she khushebulililakho. 13Khu ngaaki kali ni khuuwashibwakho izaabu, 14nio ubowekho kiminyololo kibili nga kili kye zaabu yonyene busa, khu mayi ke shikwaaro she khu ngaaki shino.

Shikwaaro she khu shifuba

(She Lukyeendo 39.8-21)

15Naluundi uraambise babaarukha buulayi bikwaaro, bakhole shikwaaro she khu shifuba, she khuuraambisa khuumanya sheesi Wele akana. Raambisa bibiindu bibifwaanana nga bye khuukhola she khu ngaaki nga nibyo: Ingubo imiliwu nga baakisaayile ni buwutsi bwe zaabu, bwe raangi imbuusi, ni buurandaafu ni buubesemu. 16Iye khu shifuba yino ili ni khuufuumbibwamo khabili, nga ilekhaana iyi ni neeyi, khu buleeyi bubwoola aambi ifuuti indweela. 17Uli ni khuukirona nga uramo tsinyilili tsine tsye kamabaale. Lukiboole lwe kamabaale saradusi, topazi, ni ganeti. 18Lulukhola khabili lwe kamabaale emeralidi, safaya, ni dayamondi. 19Lwe khataru lwe kamabaale yasinisi, agate, ni amesisiti. 20Lwe khaane lwe kamabaale berili, onikisi, ni yasipa. Kano koosi kali ni khuuwashibwakho n’izaabu. 21Buli libaale lili ni khuubawo mu lisiina lye shikuuka sha Isiraeli, ni lisiina lya buli shikuuka lili ni khuukhoorebwamo libe busa nga shangumu.

22“Khola kiminyololo kibili kye zaabu nga kimiwulukuse, kiwaambile iye khu shifuba khu shikwaaro she khu ngaaki. 23Khola tsipore tsibili tsye zaabu nga tsimbotokhelele, utsire khu ndulo khwe she khu shifuba shino. 24Kiminyololo kye zaabu kibili ikyo kili ni khuubirira mu pore tsibili itsyo tsitsiili khu shikwaaro she khu shifuba. 25Bubwakamayo bwe kiminyololo kino buli ni khuubowebwa mu zaabu iili khu bisiintsa byoombi bye khu shikwaaro she khu ngaaki. 26Khola tsipore tsibili tsye zaabu, utsire ibikele we she khu shifuba, khu luwaande lwe mukari lulukobolela khu she khu ngaaki. 27Uli ni khuukhola tsipore tsibili tsye zaabu, utsiwaambise ibikele we luwaande lw’eburaangisi we bisiintsa byoombi bye shikwaaro she khu mayi, isi byakaananila ni kumusipi kwe she khu ngaaki. 28Lwanyuma raambisa tsipore tsitsiili khu she khu shifuba khushiwaambisa, ni tsipore tsitsiili khu she khu ngaaki nga muraambisa kumukosi kumubuusi. Shino kane shikone khu shikwaaro she khu ngaaki sheesi barukhile ni khukhwitsiliilisa, nio akile she khu shifuba shiwaambe shilekhe khukaangulukha ta. 29Nashiryo, musaambo yino, Aroni kane etwikhatsake kamasina ke bikuuka bya Isiraeli khu shikwaaro she khu shifuba khweewe, nga atsya isi Umukasya. Nashiryo shino kane shikile Umukasya busheele ashebulilatsake babaandu beewe. 3028.30: Bala 27.21; Maka 33.8; Ezira 2.63; Neh 7.65Mu sawu tsitsiili khu she khu shifuba shishiraambisibwa khuumanya sheesi Umukasya akana, uremo Urimu ni Sumimu, bisungwaatsile khu shifuba sha Aroni, buli lweesi atsiila isi Umukasya. Ni nashiryo Aroni kane etwiikhe ibyo byeesi Umukasya akhalilawo ba Isiraeli khu shifuba khweewe buli lweesi atsiila isi Umukasya.”

Bikwaaro bibiindi bye basaayi

(She Lukyeendo 39.22-31)

31Shikwaaro she khu ngaaki shoosi shili ni khuuba sh’eraangi imbuusi. 32Ili ni khuubakho ni isi abirisira kumurwe. Naluundi imurwe iyo ili ni khuusonebwa buulayi, nio ilekhe khukhwinuukha ta. 33Khwiikemo lye ikaantsu, khola kamafuundikho kamabuusi, kamarandaafu, ni kamabesemu, urekho. Akari aako, uli ni khuurawo kamayiimba ke zaabu. 34Kamafundikho kano ni kamayiimba ke zaabu bino bili ni khuutsya nga biloondekhana, khuumala shikwaaro shoosi. 35Aroni ali ni khuukwaara shikwaaro shino nga alikho atsya mu Lisaayilo khukhwakaanisa Umukasya. Kamayiimba kano kali ni khuukhupa nga atsya naluundi nga aama isi Umukasya, nio alekhe khufwa ta.

36“Lwanyuma uli ni khuubuumba isowaani iye izaabu yonyene busa, ukhooremo nga ni bakhoora khu shangumu uri, ‘Shikhosefu isi Umukasya.’ 37Isowaani yino uli ni khuukibowela khu sheesi ebowa khu murwe nga uraambisa lunyololo lubuusi, ili ni khuuba ibweeni we sheesi ebowa imurwe. 38Ili ni khuuba mu bweeni mwa Aroni busheele, nio Ise Umukasya ishebulilatsake biwaanwa byoosi byeesi ba Isiraeli bawaanayo isi ise, abe yakhaba nga babaandu balikho ni byeesi bakhakhola buulayi nga ni babiwaanayo isi ndi.

39“Uli ni khuusona ikaantsu khukhwaama mu ngubo imiliwu naabi, ikhaba she khubowa imurwe nasho shili ni khuuba she ngubo imiliwu. Uli ni khuumukholela kumusipi kwe khukhwibowa mu shikuute.”

Bikwaaro bye basaayi

(She Lukyeendo 39.27-29)

40Babaana ba Aroni uli ni khuubakholela tsikaantsu, kimisipi, ni bye khukhwibowa imurwe, khuubawa shiriifwa ni lukoosi. 41Bikwaarise wandaayo Aroni ni babaana beewe, uryo ubatsukhekho kamafura, ubarobore khukhwaama mu baandu babaandi. Bawe tsikhabi, nio banyalise khukhuuntsakaanisa ise nga bali basaayi baase. 42Bakholele tsingubo tseesi banyoowa khukwaara mukari, nio barekho bikwaaro bino. Tsino tsili ni khukhwaama mu shikuute tsiikhe khukhwoola khu maraango. 43Aroni ni babaana beewe bali ni khuukwaara bikwaaro bino, nga batsya mu lisari lye luubuusano, namwe nga ta, nga batsya aambi ni shisheeso khukhwakaanisa mu shifwo shikhosefu. Bali ni khuukhola shino nio balekhe khuba ni kumusaango ta, naluundi balekhe khufwa ta. Likaambila lino lili ni khuubawo khu Aroni ni lisaaye lyeewe, biilo ni biilo.