Swahili Bible2

27

Shisheeso she khukhwookhelakho biwaanwa

1“Khola shisheeso nga shilekhaana buuleeyi ni buubalaayi, khu fuuti musaafu ni shisiintsa buli luubeka, ne khuuniina mu ngaaki nga shili tsifuuti tsine ni shisiintsa. Uli ni khuuraambisa kuusaala ku akasiya. 2Buli isoonda ili ni khuubakho lulwiika, nga lwaayihaamba khu sheeso. Shisheeso ni tsiintsika bili ni khuureebwakho buroonzi khu ngaaki. 3Bibitaatilisa likoshe, bibitaha likoshe, tsingalaaya, byeesi basuungakho tsinyama, ni bisefuluya, byoosi bili ni khuuba bya buroonzi. 4Muli ni khuukikholela shitiindilo sha buroonzi, nga ilikho ipore iya buroonzi. 5Shitiindilo shino muli ni khuushira shinakari mu mayika, nga shekhaale aasi we shisheeso. 6Shisheeso mushikholele she khuukisuta, nga mukhola bisaala bi akasiya, mwibotokhelese bisaala bino khu ngaaki ni buroonzi. 7Bisaala bino mubibirisile mu pore, kirurire khu mbeka tsibili, nga basuta shisheeso. 8Shisheeso muli ni khuushikhola khukhwaama mu mbaawo tsinyangu, ne mukari mube mumwikule, nga ni baakhwookesa nga uli khu lukiingi.”

Lulwaanyi lwe Shisheeso

9Shisheeso muli ni khuushikholela lulwaanyi. Lubeka lululola imwaalo muli ni khuurayo tsingubo tsimiliyu naabi, nga tsoola tsifuuti shitoondo shitweela ni kamakhumi karaano (150) buuleeyi. 10Kimisiindi kikiwaamba tsingubo tsino kili ni khuuba kamakhumi kabili nga bakikhola mu buroonzi, naluundi nga kyaasimikhibwa mu buroonzi. Bibiwaamba tsingubo ni byeesi tsikhweeselakho bili ni khuuba bye ifeetsa. 11Ni luwaande lululola ingaaki muli ni khuulukhola musaambo niyo indweela. 12Tsingubo tsitsibiimba luwaande luluulola ibukwanyaanga, tsili ni khuuba tsifuuti kamakhumi musaafu na tsiraano buuleeyi, nga batsibowa khu bisiindi likhumi byeesi basimikhile mu bifwo likhumi. 13Luwaande lululola ibwamanyaanga nga nilwo lwe bweeni, luli ni khuuba tsifuuti kamakhumi musaafu na tsiraano. 14Ingubo ikhiisa khu luwaande lutweela lwe shiilibwa, ili ni khuuba tsifuuti kamakhumi kabili na tsibili ni shisiitsa buuleeyi, nga baakisuungile khu bisiindi bitaru, nga buli kuubira kweemikhile buraawa. 15Ingubo ikhiisa nga ili khu mukhono kumunyeletsi, nayo ili ni khuuba nga iyasheewe, ni bisiindi nabyo biryo.

16“Mu shilibwa shishiingila mu lwaanyi luno, suungamo ingubo nga ili tsifuuti kamakhumi kataru buuleeyi. Ili ni khuurukhibwa khukhwaama mu ngubo indayi naabi, nga ilimo iraangi imbuusi, ni inandaafu, n’imbesemu. Bali ni khuukisuunga khu bisiindi bine, nga bino buli shitweela bashisimikha buraawa. 17Kimisaala kimishiikha kyoosi kye lulwaanyi kili ni khuyuungibwa atweela ni tsiindisi ts’efeetsa, ni bibiwaamba ingubo bili ni khuuba bye ifeetsa. Ne muli ni khuubisimikha mu buroonzi. 18Nashiryo, lulwaanyi lwoosi luli ni khuuba buuleeyi tsifuuti shitoondo shitweela ni kamakhumi karaano (150), buubalaayi tsifuuti kamakhumi musaafu na tsiraano, buuleeyi bwe ngubo ikhiisa tsifuuti musaafu ni shisiitsa. Ili ni khuukholebwa khukhwaama mu ngubo imiliwu. Kimisiindi kikiwaamba ingubo kili ni khuusimikhibwa mu buroonzi. 19Bibiindu byoosi bibiili ni khuuraambisibwa mu Weema, ni bitsaangi byoosi bibikiwaamba, ni bitsaangi bibiwaamba ingubo ibiimba lulwaanyi, bili ni khuuba bya buroonzi.”

Kamafura ke taala iye mu shiifwo shikhosefu

(Ba Levi 24.1-4)

20Boolela ba Isiraeli khuukhureerera kamafura kakaakhalimo khakhaandu khoosi ta, niko keesi ura mu taala, nio yaaburukhe nga seesima ta. 21Itaala yino ili ni khuuba ibulafu we ngubo isungwaatsa nga ikhiisa shiifwo shishiminyisa Buukhosefu. Aroni ni basoleeli beewe bali khuukiliinda, babone bari yaaburukhila ibweeni w’Omukasya, kumuusi ni shiilo. Kane lino libe likaambila lye biilo ni biilo isi ba Isiraeli, naluundi bali ni khuuliloondelela kimiboolo ni kimiboolo.