Swahili Bible2

26

Bye khuubiimba khu Weema Ikhosefu

(She Lukyeendo 36.8-19)

Umukasya waalomela Musa ari:

1“Ikhola ye lisari likhosefu yino muli ni khuukikhola khukhwaama mu bisiintsa likhumi bye ngubo imiliwu naabi. Bisiintsa bino muli ni khuubinaba mu buwutsi bwe raangi imbuusi, ni inandaafu, ni imbesemu. Muli ni khuubinaba byookesanise bifwaani bye bibuumbe bibiili ni tsindaha. 2Buli shisiintsa she ngubo iyo shili ni khuuba buuleeyi bubwoola tsimita likhumi na tsibili, ni buubalaayi tsimita tsibili. Bisiintsa byoosi bili ni khuuba nga bilekhaana. 3Munabamo tsingubo tsibili, nga buli ngubo bawaambilisilemo bisiintsa biraano. 4-6Khu luwaande luleeyi lwa buli ngubo, nabilakho ingubo iye raangi imbuusi nga yaafuumbibwilemo. Ari uraambise buubya kamakhumi karaano nga bwe zaabu khuubowa tsingubo tsyoombi atweela. 7Kane uwaambe bubwooya bwe tsimbusi unabemo shishibiimba khu weema. Uli ni khuunaba bisiintsa bibilekhaana likhumi na shitweela. 8Buli indweela ili ni khuuba ni buuleeyi bubwoola tsimita likhumi na tsitaru, ni buubalaayi tsimita tsibili. 9Bisiintsa biraano binabile atweela byaamemo luwaande lutweela, ni bibiramire bisesaba nabyo ubinabila atweela byaamemo luwaande lwe khaabili. Shisiintsa shishikhola khasesaba, shifuumbemo khabili shibiimbe ibweeni we liweema. 10Khu luwaande luleeyi lwa buli ingubo, nabilakho ingubo nga yafuumbiwilemo. 11Ari uraambise buubya kamakhumi karaano nga bwe zaabu khubowa tsingubo tsyoombi atweela. 12Shisiintsa shikane shiramekho she ngubo ibiimba khu Lisari Likhosefu iyo, shili ni khuurama nga shisungwaatsa busa imukoongo we Lisari Likhosefu. 13Bisiintsa bino bili ni khusungwaatsa khu buli lubeka lwe Lisari Likhosefu.

14“Kholayo bye khuubiimbakho bibiindi bibili, shitweela nga shaama mu mahafu ke kamasheese, shishiindi nga shaama mu mahafu ke tsimbusi.

15“Kamatikiiyi kakaakhiisa Lisari Likhosefu lino, uli ni khuukombekhela kuusaala ku akasiya. 16Liitikiiyi lili ni khuuba tsifuuti likhumi na tsiraano khuuniina mu ngaaki, ne buubalaayi tsifuuti kabili na musaafu. 17Buli luwaande lwe litikiiyi luli ni khuubakho bitsaangi bibili ibikele. 18Muli ni khuukhola tsimbaawo kamakhumi kabili khuuba khu luwaande lw’ebikele. 19Aasi bili ni khukhwikhala mu malowo kamakhumi kane bye feetsa, kamalowo kano kali ni khuuba aasi a buli lubaawo, nio musobekhemo bubwooki bubili. 20Khu luwaande lw’emurwe nayo ili ni khuubayo tsimbaawo itsyo kamakhumi kabili, 21nga tsili ni kamalowo ka feetsa kamakhumi kane mweesi tsiikhala. 22Khu luwaande lw’ebukwanyaanga ili ni khuubayo tsimbaawo tsisesaba. 23Ili ni khuubayo tsimbaawo tsibili mu soonda. 24Ibikele buli ibira ili ni khuuba khubwayo, ne nga tsoolile imurwe, mutsitubaase atweela nga muraambisa ipure, nio akile kwikyele kutweela. Shino shikile ibewo tsikoona tsibili. 25Ili ni khuubawo tsimbaawo shinaane ni kamalowo kaakhwo likhumi ni kasesaba k’efeetsa, nga kali ni khuuba kabili aasi a buli lubaawo.

26“Muli ni khuukhola kimikhiikha likhumi na kiraano nga kye kuusaala ku akasiya, kiraano nga kili ingaaki we Isanduuku, 27kiraano nga kili khu lubeka lw’ebikele. Kikiindi kiraano kili ni khuuba imukoongo wayo, nga shino shilola ibukwanyaanga, 28kukuukhiikha kwe akari, nga kuli akari e tsimbaawo tsisimikha, kuli ni khuubiramo kutuume iyi ni n’eyi. 29Khu ngaaki khwe tsimbaawo tsino muli ni khuubiimbakho izaabu, naluundi mukhole tsipore tsye zaabu, khuubowa atweela tsitsiitsya bukhiikha. Ikhaba tsitsiitsya bukhiikha tsili ni khuubiimbibwakho izaabu. 30Uli ni khukhwiimisa i sanduuku yino musaambo isi baakhwookesamo nga uli khu lukiingi.

31“Mulikhola ingubo imiliyu naabi nga ilimo iraangi imbuusi n’inandaafu ni buubesemu, nga baanabiilekho bakeruubi. 32Nga mwaamalile khuukirakho buulobo bwe zaabu bubukiwanikha, iyino muli ni khuukihanikha khu bisiindi bine bya akasiya nga baabireerekho izaabu. Muli ni khuukisimikha mu malowo k’efeetsa. 3326.33: Heb 6.19; 9.3-5Nga mwaamalile khuuhanikha ingubo iye mukari, bukula isanduuku mure inyuma wayo, ikikhiisye. Iyino kane irewo lulwaakha lwe shifwo shikhosefu ni n’esho shishifuurisa bukhosefu. 34Lwanyuma ubukule shishibiimba khu sanduuku ushire khu ngaaki khwayo, mukari mwe shiifwo shishiminyisa bukhosefu. 35Ibulafu we ngubo yino, rawo imeetsa. Imwaalo we sanduuku rayo shisiindi sh’etaala, nga shaloleleele imeetsa. Imeetsa ili ni khuuloleelela ingaaki.

36“Muli ni khuukhola ingubo ikiindi iyarukhibwa mu bumiliyu naabi, nga ilimo iraangi imbuusi, inandaafu n’imbesemu, nga yino bakikhola busa ni kamakhono, mukire mulyaango mwe weema. 37Bibisuunga ingubo yino bili ni khuuba nga by’ezaabu nga yemisibwile khu bisiindi biraano bye kuusaala ku akasiya byeesi babiimbilekho izaabu. Bisiindi bino bili ni khukhwiimisibwa mu bibya biraano.”