Swahili Bible2

9

Bayudaaya bahesa baasiku baabwe

1Ari khu shifukhu she likhumi na bitaru, mu mweesi kwe likhumi na kibili, nikwo kumweesi kwa Adari, nga nisho shifukhu shishaba she khukhwooleleselakho likaambila ly’omuyiinga lyeesi arusa, naluundi nga nisho shifukhu khweesi baasiku be Bayudaaya baaliindilila khuweselakho Bayudaaya; bibiindu byashuukha. 2Bayudaaya baabuusanaka atweela mu biriimba oosi mweesi bamenya. Baryo beŋoonaŋoona khuluumba baasiku baabwe babaaba batsya khubakholakho buubi. Lwe khuurya khuukali, mbaawo na mutweela khu baasiku uwanyalisa khukhola khu Bayudaaya buubi ta.

3Baakhulu be bisiintsa, baawuli, ba gafana, ni babaami babaandi bayeetakho Bayudaaya, lwekhuuba baarya naabi Modekaayi. 4Buli muundu mu buyiinga ubwo bwoosi, ashimanya ari Modekaayi aba wekyelile umuundu umukhulu naabi mu lubili lw’omuyiinga, ni bukhulu bweewe bwaba bwiloosela busa.

5Baryo Bayudaaya baabukula tsiindima tsaabwe, baahesa baasiku baabwe nga babasala, baabahesela ilala akhali shiisa shoosi ta. 6Mu shiriimba shikhulu Susa mwoonyene, Bayudaaya beera luundi baahesa baasiku baabwe baboola bitoondo biraano (500). 7Mu baandu babeeribwa mwabamo Parisadata, ni Dalifoni, ni Asipata, 8ni Porata, ni Adaliya, ni Aridata, 9ni Parimasita, ni Arisayi, Aridayi ni Vayizata 10Bano baaba babaana likhumi ba Hamani, umwaana wa Hamedata, uwaba umusiku we Bayudaaya. Ne shonyene sibatiilakho khu bye buyiindifu ta.

11Lwanyumakho khu shifukhu sheene isho, baatsya baboolela umuyiinga bukali bwe babaandu beesi beera mu shiriimba shikhulu Susa. 12Lwanyuma umuyiinga waalomela nabakyelama Esiteri ari, “Mu shiriimba shikhulu Susa Mwonyene, Bayudaaya beerire babaandu bitoondo biraano, nga waareerekho babaana ba Hamani likhumi. Ari waambaasa uri babaandu beenga beesi beerire mu bisiintsa bibiindi bibiramile byoosi? Ari uliyo ni shishiindu shishiindi sheesi ukana ikhukholele? N’umboolele kane shikholikhe.”

13Nabakyelama Esiteri welamo ari, “O umuyiinga, iwe n’ukane ube nga waasiimile, lekha Bayudaaya babaali mu Susa ndi bakhole kumukaamba sheesi bakholile shaleelo. Naluundi ulakile uri kimilaambo likhumi kye babaana ba Hamani kitsangililwe khu misaala, lwe babaandu boosi khubona.”

14Umuyiinga Ahasweero waalakila aryo shikholebwe shiryo. Likaambila lyaarusibwa mu Susa, ni kimilaambo kye babaana ba Hamani kyaatsangililwa khu misaala lwe babaandu boosi khuubona. 15Ni khu shifukhu she likhumi na bine, mu mweesi kwa Adari, Bayudaaya boosi be mu Susa baabuusana luundi, beera babaandu babaandi bitoondo bitaru (300). Ne shonyene ndi sibaatiilakho khu bye buyiindifu bwe baasiku baabwe ta.

16Ibyo nga bili biryo mu Susa, Bayudaaya babaandi babaaba mu bisiintsa bibiindi bibyawulibwa n’umuyiinga Ahasweero, nabo baabuusana atweela khukhwisoolanakho. Baryo nabo beera baasiku kimikaanda musaafu ni bikana biraano (75,000). Ne ndi shonyene sibaatiilakho khu bye buyiindifu bwe baasiku baabwe ta. 17Bino byoosi byakholekha khu shifukhu she likhumi ba bitaru she kumweesi kwa Adari. Ne khu shifukhu shisheelakho she likhumi na bine, baawola, baashikyelisa she shifukhu she kamayiiya ni khukhwikhoya.

18Ne Bayudaaya babaaba mu Susa, baabuusana khu shifukhu she likhumi na biraano, shaaba she khuuwola, khuuliilakho kamayiiya ni khukhwikhoya, lwanyuma lwe khuuhesa baasiku baabwe khu shifukhu she likhumi ni bitaru ni likhumi na bine. 19Shino nisho shishikila Bayudaaya babaamenya mu byaalo, batsowesa shifukhu she likhumi na bine she kumweesi kwa Adari, nga nisho shifukhu she khuuliilakho kamayiiya ni khuuwola, ni khuukabananilakho biwaano buli muundu isi uwashe.

Kamayiiya ka Purimu

20Modekaayi waarona bibiindu bino byoosi bibyabawo, aryo waakaanisaka buurone isi Bayudaaya boosi babaaba mu bisiintsa byoosi, bibyaba biwulibwa n’umuyiinga Ahasweero. 21Waabalakila ari batsohese shifukhu she likhumi na bine, ni she likhumi na biraano, bye mu mweesi kwa Adari, nga babitsowesa buli mwiiko. 22Bino nibyo bibyaba biifukhu byeesi Bayudaaya bewoneselakho isi baasiku baabwe, naluundi nikwo kumweesi kukwekyela kwe khuusangaala mu shifwo she khuulila. Aabaronela bakhutsowese biifukhu bino, bawole, nga balya kamayiiya luundi nga bekhoya. Bifukhu bino bibe bye khukhwakaanisana biwaano, ni khuukabilakho bataambi nabo.

23Bayudaaya baaloondelela byeesi Modekaayi aabaronela, khuubatsaka ni kamayiiya kano, baryo baafukiilisana khuushikholatsaka buli mwiiko. 249.24: Esit 3.7Lwekhuuba Hamani umwaana wa Hamedata, uwe mu shikuuka sha Agagi, aaba umusiku we Bayudaaya, nga waakhalile luwomelo lwe khuubahesa. Naluundi waakhupisa khaakokha khakhalaangikha Puri, khuumalilawo ilala Bayudaaya ni khuubahesa boosi. 25Ne Esiteri n’atsya isi umuyiinga Ahasweero, waamuloomba khuuwonesa babaandu beewe. Aryo umuyiinga waarusa likaambila nga alakila ari, luwomelo lwe khuuhesa Bayudaaya lushuukhile Hamani umweene, ni babaana beewe, khukhwiiribwa musaambo isi baasuubila Bayudaaya khukhwiiribwamo. Baryo baabatsangilila nibo mu misaala. 26Nashiryo biifukhu bino bye khuuwolelakho baabilaanga bari Purimu, khukhwaama mu lisiina Puri khakhaaba khaakokha kheesi Hamani aalaangilila. Shino shabawo lwe bilomo byeesi Modekaayi aarona, ni neebyo byeesi baaba batsya khwoolakho, ni neebyo byeesi baabiramo. 27Shino shaakila Bayudaaya baashikyelisa likaambila khu beene, babaana baabwe, ni naabo boosi babaalikyela Bayudaaya, nga shiloma shiri, biifukhu ibyo byoombi bitsowesebwe buli mwiiko akhali khuukoosamo ta, nga ni shabalomelwa khuushikhola. 28Naluundi baashikhalilawo atweela bari, biifukhu bino bya Purimu byaakha byaatsowesebwa mu buli muungo mwa buli Muyudaaya, mu buli muboolo kwoosi, ni mu buli shisiintsa, ni mu buli shiriimba, buli mwiiko akhali khukhwiibilila ta.

29Kila nabakyelama Esiteri, umukhaana wa Abihayili, waarona bibiindu bino byoosi nga araambisa buunyala bweewe bwoosi, khukhwoomisa buurone bweesi Modekaayi aarona bubuwaamba khu Mayiiya ka Purimu. 30Buurone buno bwaarumanibwa isi Bayudaaya boosi, mu bisiintsa shitoondo shitweela ni kamakhumi kabili na musaafu, bibyaba mu buyiinga bwa Ahasweero, nga bubakanisa lukoosi ni khuubakhupilisa babe buulayi. 31Naluundi burone buno bwabakaambilila buri, biifukhu ibyo bya Purimu byaakha bitsowesebwe mu biseela byabyo bibyeene, nga Modekaayi Umuyudaaya ni nabakyelama Esiteri ni babalakila. Naluundi shibe nga nibo ni berekekhela biifukhu bye khubuya intsala, ni biifukhu bye khukhwibukuutsa.

32Likaambila lya nabakyelama Esiteri lilyahandalasa ikhola yino iya Purimu, lyaronebwa ni mu shitabo.