Swahili Bible2

8

Khuukhalawo khw’omuyiinga khulwe Bayudaaya

1Shifukhu sheene isho nga shishiili khuwakho ta, umuyiinga Ahasweero waakabila nabakyelama Esiteri bye buyiindifu byoosi bibyaba bya Hamani uwaba umusiku wa Bayudaaya. Nabakyelama Esiteri waaboolela umuyiinga nga n’ali ni bulebe ni Modekaayi. Ni khukhwaamila abweene awo, umuyiinga wekyelisa Modekaayi khuuba mutweela khu baakhulu be mu buyiinga bweewe. 2Aryo kila abukula intsiyi iyabakho khaabonelo kheewe, iyo isi aarusa khu Hamani, waakiwa Modekaayi. Esiteri naye wahaambisa Modekaayi bunyala bwe khuuloolela bye buyiindifu bubwaba bwa Hamani.

3Lwanyuma ndi nabakyelama Esiteri welamo khuukanikha isi umuyiinga. Khu mbuka yino waafukhamila aasi e bikyele byeewe nga alila kamasika, waamwikoontselela nga amuloma akhalemo iŋoonaŋoona imbi ni luwomelo, bibyaba bya Hamani uwaama mu shikuuka sha Agagi, byeesi akhola khulwe Bayudaaya. 4Kila umuyiinga okyeselela Esiteri imiimbo yeewe iye Zaabu, ni Esiteri naye waatsya weemikha mu moni ts’omuyiinga, 5waamuloma ari, “O umuyiinga, iwe n’uba nga waasiimile, ni nase n’imba nga naasiimibwile mu moni tsoowo, naluundi n’ukane ubone nga shilayi, n’uroneyo burone bubukhalamo burone bwa Hamani umwaana wa Hamedata, uwe mu shikuuka sha Agagi, tseesi aarona lwe khuukana khuhesa Bayudaaya boosi babaali mu bisiintsa bye buyiinga buno. 6Lwekhuuba ise inyala ndyeena khukhwinyindaalila nga mbona buwaangafu butsya khukwa khu baandu baase? Namwe ise inyala indyeena nasila busa nga babaandu baase batsya khuhela?”

7Lwanyuma umuyiinga Ahasweero welamo Esiteri ni Modekaayi Umuyudaaya ari, “Aluno ise naamalile khaale khuulakila khukhwiiribwa khwa Hamani khulwe tsimbomelo tse khuuhesa Bayudaaya, naluundi naakabiile Esiteri bye buyiindifu byoosi bibyaba bya Hamani. 8Ni naari nimurone buurone bubuundi mu lisiina ly’omuyiinga isi Bayudaaya, murekho ni khaabonelo khe ntsiyi yeewe, lwe khuuwonesa babaandu beenywe. Lwekhuuba mbaawo buurone bwoosi bubwiitsila mu lisiina ly’omuyiinga, nga baabureerekho khaabonelo khe ntsiyi yeewe, bubunyala khuukhalibwamo ta.”

9Lubaluba baryo balaanga baroni b’omuyiinga khu shifukhu she kabili na bitaru, mu mweesi kwe khataru, nikwo kumweesi kwa Sivani. Bano boosi barona byeesi Modekaayi abalakila khurona nga bitsya isi Bayudaaya boosi, ni baakhulu boosi babaaba bawula bisiintsa shitoondo shitweela ni kamakhumi kabili na musaafu, khukhwaamila ilala i Buyiindi khukhwoola i Esiyopiya. Burone buno bwaronebwa isi buli shisiintsa, ni mu buli lulimi lwa buli baandu mundona yalwo, ni Bayudaaya nabo babaronela mu lulomo lwe waabwe mu ndona iye waabwe. 10Modekaayi alakila burone buno bwaronebwa mu lisiina ly’omuyiinga Ahasweero. Waatsirakho khaabonelo khe ntsiyi y’omuyiinga. Buryo buurume buno bwaayilibwa khaangu naabi ni baarume babaatimila khu ŋwaaŋwa tsitsaraambisibwa mu milimo ky’omuyiinga.

11Mu burone buno, umuyiinga aafukiilisa Bayudaaya mu buli shiriimba khukhwibuusa atweela, nio banyale khukhwisoolanakho babeene. Bari nga yabeelewo linaambo lyoosi lilinyala lyeetsa khuluumba basaani ni bakhasi, ni babaana baabwe, nio banyale khusoolana, ni khukhwiira naluundi ni khumalilawo ilala baasiku baabwe boosi. Naluundi banyale khuyilila ilala bye buyiindifu bye baasiku baabwe. 12Shifukhu khweesi Bayudaaya baaba bali ni khuukholelakho byeesi likaambila lino liloma mu bisiintsa by’omuyiinga Ahasweero, shaba she likhumi na bitaru mu mweesi kwe likhumi nakibili, nikwo kumweesi kwa Adari. 13Ibyo byoosi bibyaronebwa byaarusibwa nga likaambila mu buli shisiintsa luundi shamanyisibwa isi babaandu ba buli linaambo. Ni Bayudaaya babeene beŋoonaŋoonela shifukhu isho lwe khukhwiliyaasa isi baasiku baabwe boosi.

14Kila baryo baarume babaarumanibwa bekhala khu ŋwaaŋwa tsitsiitima naabi, baatsya mu khaangu lwe likaambila ly’omuyiinga. Likaambila lino balilaangilila mu shiriimba shikhulu Susa.

15Lwanyuma Modekaayi waarura khukhwaama mu lubili lw’omuyiinga nga wakwaarire bikwaaro bye bukhulu bibyabamo ni buwaanga, nga wamwaatiilekho khu ngaaki ingubo imbesemu, naluundi nga wakwaarire ni liyabi lye shiriifwa lye zaabu. Likaambila ni balilaangilila, babaandu boosi mu shiriimba Susa bakhupa liyoombo lwe kumwikhoyo. 16Isi Bayudaaya boosi, imbuka iyo yaba indayi, iye kumwikhoyo, khusangaala naluundi iye shiriifwa.

17Mu buli shisiintsa, ni mu biriimba byoosi isi likaambila ly’omuyiinga lyelwaatsibwa, yabayo kumwikhoyo ni khuusangaala mu Bayudaaya. Ni babaandu be kamanaambo kakaandi baakali busa, belaanga khuuba Bayudaaya, lwekhuuba Bayudaaya baaba bekyelile babaandu be shiriisa.