Swahili.Bible
Bible Society of Kenya
Bible Society of Kenya
Madaraka, Nairobi
PO Box 72983
Tel: 254 20602807
E-mail: info@biblesociety-kenya.org
6
Umuyiinga esamo Modekaayi lukoosi
1Mu shilo sheene isho, umuyiinga waalekha khukonakho liilo ta, shikila waalakila ari bamureerere shiitabo she buyiinga shishiilimo bibiindu bikhulu bibibakawo byeesi baarona, ne nga sibyaakha byebililwa ta. Baryo baabimulwaatsila. 26.2: Esit 2.21,22Nga baabimulwaatsila baryo, baanyoola isi sharonebwa khu Modekaayi nga n’afumbula luwomelo lulwakholebwa ni Bigitana ni Teresi, babaaba batweela khu boomole b’omuyiinga, babaaba baaliindi khu shilibwa. Shaanyoolekhana nga babili bano abe baafukiilisana khuukhola luwomelo lwe khukhwiira umuyiinga Ahasweero.
3Kila umuyiinga aloma ari, “Lukoosi shiina namwe bukhulu shiina byeesi Modekaayi aafuna lwe lomo nga yino?”
Babaakaanisi beewe beelamo bari, “Mbaawo sheesi aafuna lwe lomo yino ta.”
4Umuyiinga waareeba ari, “Naanu khu baakhulu uuli mu lwaanyi ano?” Mu mbuka nyeneyo, aba Hamani wenjiile mu lwaanyi lwe bulafu, nga akana khuukanikha isi umuyiinga, ari afukiilile Modekaayi eribwile khu kuusaala kweesi aaba waamalile khuusimikha. 5Kila babaakaanisi beewe bamwilamo bari, “O umuyiinga, Hamani niye uuli mu lwaanyi, waaliindile khuukhubona iwe.”
Umuyiinga waalakila ari, “Ni mumulome enjile mukari.”
6Nga Hamani wenjiile mukari, umuyiinga waamureeba ari, “Iwe waambaasa uri shiina sheesi ise inyala naakholela umuundu isi ingana khukhwiisamo lukoosi?”
Kila welomela mu mwoyo kweewe ari, “Ne muundu shiina ukuundi uliyo isi umuyiinga akana khuukoosa akhali iseese samweene?” 7Shikila Hamani elamo umuyiinga ari, “Khulw’omuundu uyo isi umuyiinga akana khuukoosa, 8lakila bareere tsingubo tseesi umuyiinga akwaaramo, ni iŋwaaŋwa isi ukyeendelakho, iŋwaaŋwa iyo ikwaarisibwile lihabi lye buyiinga. 9Ulakile uri bikwaaro ibyo ni iŋwaaŋwa iyo biwaambisibwe mutweela khu baandu boowo baakhulu mu buyiinga, abikwaarise umuundu uyo, aniinisibwe khu ŋwaaŋwa iyo, bamuraangilile khuumubirisa mu nguudo tse mu shiriimba. N’umukhulu woowo isi uroboole alaangilile ari, ‘Nimubone umuundu isi umuyiinga akana khuuwa lukoosi nga n’akhila khubirisibwamo!’ ”
10Kila alakila Hamani ari, “Ari tsya khaangu ureere bikwaaro ibyo, ni ŋwaaŋwa iyo. Byeesi ulomile, ubikhole khu Modekaayi Umuyudaaya, uwikhala a shilibwa she lubili lw’omuyiinga. N’umukholele byoosi nga niwaama khuloma, ukhalekhayo na shitweela ta.”
11Aryo Hamani waareera bikwaaro waabikwaarisa Modekaayi, ni Modekaayi mweene wekhasibwa khu ŋwaaŋwa, Hamani waamuraangilila waamubirisa mu nguudo tse mu shiriimba, nga alomela angaaki ari, “Ni mubone umuundu isi umuyiinga akana khuuwa lukoosi nga n’akhila khuubirisibwamo!”
12Bino ni byawa, Modekaayi welayo a shilibwa she lubili lw’omuyiinga. Ne Hamani waatimaka khaangu welayo ingo weewe, nga kumutaambo kwaamwitsuule naabi, nga waareere kamakhono khu murwe lwe kumutaambo kumukali. 13Hamani waaboolela umukhasi weewe Zeresi ni basaale beewe tsana ibyo bibyaba byaamukholikhilekho. Kila umukhasi weewe tsana ni basaale beewe bamuloma bari, “Iwe n’uba nga waarakikhile khukhwikhilisibwa mu moni tsa Modekaayi, ate nga niye Umuyudaaya busa, singene umunyale ta, khuurusakho kane wiloosele busa khuumalibwilawo ilala.”
14Nabo ni baaba nga bashiiloma baryo, babomole b’omuyiinga boola isi ali, khaangukho baayila Hamani khu mayiiya keesi Esiteri aaba waaŋoonaŋoonile.