Swahili Bible2

5

Khuuloomba kwa Esiteri isi umuyiinga

1Lwanyuma lwe biifukhu bitaru bye khubuya intsala nga byaweelekho, Esiteri wakwaara tsingubo tseewe tse bwa nabakyelama, waatsya mu lwaanyi lwe mukari, lwe mu lubili lw’omuyiinga, wemikha iburaangisi we shitsoloŋo she buyiinga. Umuyiinga naye aba wekhaale khu shitsoloŋo sheewe nga walolile imulyaango. 2Umuyiinga n’abona nabakyelama Esiteri nga wemile mu lwaanyi, wekhoya naabi. Shikila amwokyeselela imiimbo yeewe iye Zaabu isi aba wahaambile mu mukhono kweewe. Esiteri naye weetsa aambi isi ali, waatiilakho imurwe we miimbo iyo. 3Kila umuyiinga amureeba ari, “Nabakyelama Esiteri, shiina sheesi iwe ukana? N’umboolele sheesi ukana, ni nase kane ishikhuwe abe ikhaba khuukhuwa shisiintsa she buyiinga bwase.”

4Esiteri naye welamo ari, “Nikane ube nga waashisiimile, O umuyiinga, khali ufukiilisile wiitsa khu mayiiya keesi ise iŋoonaŋoonile shaleelo, iwe atweela ni Hamani.”

5Lwanyuma kila umuyiinga aloma babaakaanisi beewe ari, “Yuubakho mundereere Hamani, nio khunyale khuukhola khu sheesi Esiteri aama khuloma.” Baryo umuyiinga ni Hamani baatsya khu mayiiya keesi Esiteri aaba wateekhele. 6Ne ni baaba nga balikho banywa iviini, umuyiinga waareeba Esiteri ari, “Shiina sheesi ukana ise ikhukholele? Kane shikhuweebwe. Kane ikhuwe sheesi ukana abe ikhaba nga shoola shisiintsa she buyiinga bwase, kane shoolelesebwe.”

7Esiteri weelamo ari, “Sheesi inoomba luundi sheesi ingana nisho shino: 8iwe n’uba nga waamaambiile ise shiisa, O umuyiinga, naluundi n’uba nga waasiimile khukhuumba sheesi inoomba, fukiilila iwe ni Hamani khukhwiitsa khu mayiiya keesi ise kane imbe nga naaŋoonaŋoonele kumukaamba. Ni kumukaamba kweenekwo, ise kane ikhuboolele sheesi ingana.”

Hamani akhola luwomelo lwe khukhwiira Modekaayi

9Khu shifukhu sheene isho, Hamani waarura khu mayiiya nga wetsuule kumwikhoyo mu mwoyo kweewe. Ne n’abona Morudekaayi nga wekhaale aambi ni shilibwa she lubili, naluundi waabona nga Morudekaayi waakhwinyukha, namwe khuumwokyesanisa lukoosi ta, Hamani lirima lyaamuniina naabi. 10Ne shonyene Hamani waaliinda lirima lyeewe weelayo ingo weewe.

Ne lwanyuma waalaanga basaale beewe khukhwiitsa iweewe, waarumana baatsya balaanga n’umukhasi weewe Zeresi khuubetubaasakho. 11Aryo Hamani waarakikha khukhwibuyila umweene lwe buyiindifu bweewe ni basooleli beewe. Waababoolela ni saambo isi umuyiinga aamutsowesamo, waamwikyelisa umuundu umukhulu khuufuura babaami ni baakhulu babaandi boosi. 12Kila Hamani alooselakho nga aloma ari, “Ni shishifuura byoosi, nabakyelama Esiteri s’alaangile umuundu ukuundi yeesi khu mayiiya keesi ateekhile ta, khuurusakho alaangile umuyiinga atweela ni nase. Ni kumukaamba nakwo nabakyelama waakhulaangile luundi khuutsya n’umuyiinga. 13Ne bino byoosi mbaawo sheesi binjeetakho ta, ni mba nga ishibona umusaani yuno Modekaayi Umuyudaaya, nga wekhaale nga umuliindi khu shilibwa she lubili lw’omuyiinga.”

14Shikila umukhasi weewe Zeresi ni basaale beewe tsana bamuwa kamakyesi nga baloma bari, “Lakila basimikhe kuusaala kwe tsifuuti kamakhumi musaafu na tsiraano khuuniina mu ngaaki, kumukaamba kumutikhinyi naabi uloombe umuyiinga batsaangililekho Modekaayi afwe. Nio lwanyuma iwe utsye khu mayiiya n’umuyiinga nga uli musangaafu.”

Kamakyesi kano kekhoyesa naabi Hamani. Nashiryo waalakila ari basimikhe kuusala.