Swahili Bible2

4

Modekaayi ekoontselela Esiteri abayeete

1Modekaayi n’amanyakho bibiwaamba khu burone ubwo, wonuulaka tsingubo tseewe lwe kumutaambo kumukali, wakwaara tsisawu tsa makoongwe, weakha likoshe, waakyeenda waatsya mu shiriimba nga antsuwa luukali lulweene, nga akhupa luwuungu. 2Aryo waatsya woola aambi ni shilibwa she lubili, ne waalekha khwiinjilayo ta, lwekhuuba mbaawo umuundu uwafukiilisibwa khukhwiinjila mu lubili, nga waakwaarire isawu iya makoongwe ta. 3Ni mu bisiintsa byoosi mweesi likaambila ni biilakilo by’omuyiinga byoola, yabayo khuulila khuukali mu Bayudaaya, nga babuya ntsala, nga belootsa luundi nga baantsuwa naabi. Naluundi baakali khu nibo baakwaara tsisawu tsa makoongwe, beakha ni likoshe.

4Ne babaakaanisi ba Esiteri be khaana ni babomole ni beetsa baaboolela Esiteri bibiwaamba khu Morudekaayi, kumutaambo kwaamuwaamba naabi. Aryo kila akaanisayo isi Modekaayi tsingubo ari akwaare mu shifwo she tsisawu tsa makoongwe. Ne Modekaayi wekaana khuutsifukiilila.

5Kila Esiteri alaanga mutweela khu bomole b’omuyiinga uwaba amulolelela niye, uwaba alaangibwa bari Hataki, waamulakila atsye isi Modekaayi, amanye shinaanu shishiiliwo, ni lwashiina Modekaayi aaba akhola aryo.

6Hataki waarura waatsya isi Modekaayi akari mu shiriimba, iburaangisi we shilibwa she lubili. 7Modekaayi naye waamusontsoola bibyaba byaamwoolilekho, ni buukali bwe tsinusu tseesi Hamani aasuubisa khuuwaanayo mu libiikhilo ly’omuyiinga, khulwe khukhwiiribwa khwe Bayudaaya. 8Modekaayi waakaanisa Hataki buurone bubwabamo likaambila lilyasalanisibwa mu Susa mwoosi, lililakila khuuhesa Bayudaaya. Modekaayi waamulomela ari atsye akyokese Esiteri, naluundi amusontsoole byoosi, amulome atsye isi umuyiinga amwikoontselele luundi amukhoonjelese awaambile Bayudaaya shiisa.

9Aryo Hataki waatsya waasontsoola Esiteri byoosi byeesi Modekaayi aamuloma. 10Esiteri luundi waaha Hataki buurume bubuundi khukhwiisilayo Modekaayi, nga buloma buri, 11“Baawuli b’omuyiinga ni babaandu boosi be mu buyiinga buno, baamanya likaambila bari, umuundu yeesi umusaani namwe umukhasi, utsya khubona umuyiinga nga akhumulaanga ta, umuundu uyo, eribwa busa. Khuurusakho isaambo yonyene iye khuuwonesa umuundu uyo, iba nga umuyiinga waamwokyeseleele imiimbo yeewe iye zaabu, aryo s’eribwa ta. Ne bona ari ise naamalile biifukhu kamakhumi kataru nga naakhulaangibwakho khuutsya mu moni ts’omuyiinga ta.”

12Aryo Modekaayi nga waawuliile bino byeesi Esiteri aaloma, 13waabaloma beeleyo batsye baboolele Esiteri bari, “Iwe ukhambaasa uri, iwe kane uwone mu Bayudaaya boosi lwekhuuba uli mu lubili lw’omuyiinga ta. 14Lwekhuuba iwe n’ukane usile busa khu mbuka ifwaana nga yino, Bayudaaya kane bafune buyeeti bwe khuuwonesebwa nga bwaama mu shifwo shiindi busa. Ne iwe ni babaandu be mu ntsu ya paapawo, kane muhele. Ne umanyila shiina, iwe unyala khuuba nga wekyela nabakyelama, lwe khuuyeeta mu biseela bibifwaana nga bino biri!”

15Kila Esiteri arumanisa isi Modekaayi buurume buno, nga aloma ari, 16“N’utsye ubuusanise Bayudaaya boosi babaali mu Susa, mubuye intsala khu lwase. Mukhalya namwe mukhanywakho khakhaandu khoosi ta, khuumala biifukhu bitaru shiilo ni kumuusi. Ni nase samweene ni babaakaanisi baase, kane khukhole khuryo. Ni nashino nga shaaweele, kane ise intsye isi umuyiinga, ikhaba nga likaambila silifukiilisa ta. Oba bantsira lwashino, kane bantsire!”

17Aryo Modekaayi waatsya, waakhola byoosi nga Esiteri n’amulakila.