Swahili Bible2

1

Nabakyelama Vasuti aminyaalila umuyiinga Ahasweero

11.1: Ezira 4.6Mu biifukhu bya Ahasweero, nga Ahasweero yuno niye uwaba uwula shisiintsa shikali khukhwaamila ilala i Buyiindi khukhwoola i Esiyopiya, nga shilimo kamasaza shitoondo shitweela ni kamakhumi kabili na musaafu (127).

2Mu biifukhu ibyo, shiirebe shikhulu she buyiinga bwa Ahasweero shaba shili mu shiriimba Susa. 3Mu mwiiko kweewe kwe khataru kwe buwuli nga umuyiinga, aakabulila baaraangilisi beewe baakhulu ni bawuli babaandi kamayiiya. Ni baaraangilisi be kamaye ka Pasiya ni Mediya ni baaraangilisi baakhulu ni bawuli babaandi nabo baabawo. 4Umuyiinga yuno okyesanisa bye buyiindifu bweewe bukali, ni bye shiriifwa bye buyiinga bweewe khuumala biifukhu biikali bibyoola shitoondo shitweela ni kamakhumi shinaane (180).

5Lwanyuma lwe biifukhu bino nga byaaweelekho, umuyiinga Ahasweero waakabulila babaandu boosi babaabawo mu Susa kamayiiya, bayindifu ni bataambi beene. Kamayiiya kano kaamala biifukhu musaafu bibuufu, nga babaandu balya luundi nga banyweela mu lubili lw’omuyiinga. 6Mu lwaanyi mweesi bekhala baaba balutiimbile ni tsingubo tsiwaanga ni tsimbuusi, nga tsabowebwele ni kimikosi kikyokusibwa khukhwaama mu ngubo tsinandaafu ni bibyuuma bye feetsa khu bisiindi biimiliwu naabi. Aabawo ni bibiindu bibifwaana nga bitaanda bibyakholebwa khukhwaama mu zaabu ni feetsa nga byareerebwele mu lwaanyi lweene, lulwaba lwabuumbibwakho ni kamabaale ke tsisaambo tsitsikhali ndweela ta; kamawaanga, kamabesemu kakaamulikhamulikha luundi nga kamamiliwu naabi, luundi ke buukusi bwe angaaki naabi. 7Bye khuunywa baabikabulila mu bikhopo bye zaabu, nga buli shikhopo shili she saambo kiindi busa. Bye khuunywa baabikabula nga umuyiinga umweene n’akana. 8Bye khuunywa bino byanyweebwa akhali shishakamo namwe khuwanyinyiibwa ta, lwekhuuba umuyiinga aarusa likaambila isi babaakaanisi beewe nga liloma liri buli mukyeni anywe nga n’akana.

9Bino biba biryo, nabakyelama Vasuti naye aba alikhukabulila bakhasi boosi kamayiiya mukari mu lubili lw’omuyiinga Ahasweero.

10Khu shifukhu she kumusaafu she kamayiiya kano, umuyiinga Ahasweero waaba nga waasaangalile naabi, lwekhuuba aaba nga wanyweele iviini, walaanga babaakaanisi beewe babomole1.10 Baaba babomole lwekhuuba nibo babaaba baliinda nabakyelama musaafu nga nibo: Mehumani, Bizuta, Harubona, Biguta, Abaguta, Zetari, ni Karukasi. 11Waabalakila ari batsye bamureerere nabakyelama Vasuti nga wakwaarire ikuutwa ye shiriifwa sheewe. Lwekhuuba nabakyelama yuno abe abonekha buulayi naabi, shishakila umuyiinga aakana khuumwokesanisa isi babaandu beewe ni bawuli boosi bamubone. 12Ne babaakaanisi ni beetsa baboolela nabakyelama Vasuti sheesi umuyiinga akana, wekaana khuumutsyayo. Shino shakhalasa naabi umuyiinga.

13Umuyiinga aaba ni saambo iye khukhwireeba khu baandu bakesi mu bye kamakaambila, ni khukhwiwula khwe linaambo lyaabwe. Aryo kila abalaanga bamuboolele shiina she khuukhola. 14Basaani beesi umuyiinga afuura khukhwireebakho baaba nibo: Karisena, Shetari, Adimata, Tarushiishi, Meresi, Marisena, Memukani. Nibo babaaba basaani barobole musaafu khukhwaama mu Pasiya, ni Mediya, babaaba bafuura khuuba ni biifwo bye angaaki mu buyiinga ubwo.

15Umuyiinga waakanikha isi basaani bano ari, “Khuuloondekhana ni kamakaambila, shiina shishaakhila khuukholekha khu nabakyelama Vasuti? Lwekhuuba ise nga umuyiinga Ahasweero indumanile babaakaanisi baase is’ali, ne waalekha khukhola sheesi imulomeele khuukhola.”

16Kila Memukani alomela umuyiinga ni baakhulu be mu lubili ari, “Nabakyelama Vasuti waakhuminyaalila umuyiinga yenyene ta, ne waakhomyaasile ni babaami b’omuyiinga Ahasweero boosi babaamenya mu masaza koosi! 17Ari ni bakhasi boosi babaali mu buyiinga buno nibakane bawulile khu shiindu shino, nabo banarakikha khuuminyaalila baseetsa baabwe. Shino kane bashikhole nga baloma bari, ‘Umuyiinga Ahasweero alakiile nabakyelama Vasuti khukhwiitsa is’ali, ne waaminyaala waalekha khukhwiitsa ta.’ 18Ni baakyelama be babaami be mu Pasiya ni Mediya, nikane bawulile sheesi nabakyelama Vasuti akholile, kane bashikhole baryo isi baseetsa baabwe. Ni neesho shinakila baakyelama boosi balekhe khukhwiisamo baseetsa baabwe lukoosi ta, ni baseetsa nabo babaakhalalile. 19Ni nashiryo, O Umuyiinga, iwe nikane ube nga waashisiimile, rusa likaambila lilikhanyala khuushuusibwamo ta, litsye isi babaandu be Pasiya ni Mediya. Likaambila lino lilome liri, Vasuti s’aliilayo luundi khuubonekhakho mu moni ts’omuyiinga Ahasweero ta. Ni shiifwo sheewe shiweebwe ukuundi unyala khukhwiisamo lukoosi. 20Ni likaambila lino nga lyaarurire, lyaamanyikhile oosi mu buyiinga bukali buno, bakhasi boosi kane beesemo baseetsa baabwe lukoosi, khukhwaamila ilala khu bayindifu khukhwoola khu bataambi beene.” 21Umuyiinga ni baakhulu be mu lubili lweewe baasiima kamakyesi kano, aryo waakhola nga Memukani n’ateesa. 22Aryo umuyiinga waarusa likaambila lyaatsya mu masaza koosi ke mu buyiinga bweewe, nga litsiila mu lulomo ni musaambo isi luronebwamo iya buli lisaza, nga liloma liri, buli musaani yeesi ali ni bunyala khu baandu boosi be muungo mweewe.