Swahili Bible2

SHIITABO SHA MUSA SHE KHARAANO SHEESI BALAANGA BARI

KAMAKAAMBILA

KHUKHWAANTSULA

Shiitabo shino she Kamakaambila shookesanisa luruungo lwe tsinganikha tseesi Musa aakanikhila babaandu ba Isiraeli, nga bali mu shibala sha Mowaabu, isi baaba beekamilekho lwanyuma lwe lukyeendo luleeyi naabi mu mubiimbi. Ano abe imbuka ili aambi ba Isiraeli bakhalise luluutsi Yorudaani, basoolanise babaandu naluundi bawaambe shibala shishilaangibwa Kanaani. Ne Wele waalekha khufukiilisa Musa araangirire babaandu bano khuutsya mu shibala isho ta. Akhali ndi, Wele waaloma ari, Musa ali khuutsya khufwiila khu luwaande lwe bwaamanyaanga we luluutsi Yorudaani. Nashiryo Musa waakanikha isi babaandu tsifuunda tsingali, nga mu nganikha tsino aaba eelakamo kamakaambila ka Wele kamakali.

Shiitabo shino shilaangibwa “Kamakaambila.” Khulwekhuuba abe Musa alikho awa ba Isiraeli kamakaambila ifuunda ikhola khabili.

Naluundi Musa waashebusa babaandu bibiwaamba khu miiko kamakhumi kane (40) kikyabira. Wele aaba waamusa ba Isiraeli khukhwaama mu Misiri, naluundi nga waabaliinda bweela nga bali mu mubiimbi. Ne abe mu buulamu bwaabwe sibaaba nga bali babawulila byeesi Wele aloma ta.

Musa waaboolela ba Isiraeli ari siinga baloondelela Indakaano isi baamala khuukhola, iye khukhwisaaya Umukasya ni khuumuwulila, kane babe linaambo lye kamaani, naluundi liliili buulayi. Ari ne ni baba bari sibesaayile Umukasya ta, ne besaaya bifwaani busa, Umukasya aasuubisa khuubatsuba. Abe kane baasiku baabwe babafuure mu busoolo, babaabukule shibala shaabwe, naluundi beeribwe.

Lwanyumakho naabi mu Ndakaano Imbya, nga bareebire Yesu bari likaambila shiina lya Wele liliminyisa buukhulu mu koosi, Yesu elamo nga awayo litweela khu makaambila ke mu shitabo shino, lililoma liri: Isiraeli, rekeeresa! Umukasya Wele weefwe, ali niye Wele mutweela yenyene. Nashiryo kanaatsaka Umukasya Wele woowo ni kumwoyo kwoowo kwoosi, ni buulamu bwoowo bwoosi, ni kamaani koowo koosi (6.4-5).

Inoondekhana iye bibiilimwo

1. Musa akanikha khu biindu biikhale (1.1—4.43)

2. Musa akanikha khu byeesi Umukasya akana (4.44—29.1)

3. Ba Isiraeli bali ni khuuloondelela indakaano y’Omukasya (29.2—30.20)

4. Khuuroborebwa khwa Yoswa (31.1-13)

5. Ba Isiraeli bakhaantsukhe Umukasya (31.14-29)

6. Kumweenya kwa Musa (31.30—32.47)

7. Umukasya okesa Musa shibala sha Kanaani (32.48—33.29)

8. Khuufwa khwa Musa (34.1-12)