Swahili Bible2

5

Kamakaambila Likhumi

(She Lukyeendo 20.1-17)

1Musa walaanga ba Isiraeli boosi baabuusana, kila abalomela ari, “Ba Isiraeli bashaase, ni murekeerese mwiyike, naluundi muloondelele kamakaambila ni indeekela, byeesi ise ndikho imbaboolela inywe khu shifukhu she shaleelo. 2Umukasya Wele isi ifwe khwisaaya, aakhola ni nafwe indakaano nga khuli khu lukiingi Horebu. 3Indakaano iyo s’akikhola ni bakuuka beefwe bonyene ta, ne ikhaba ni nafwe khukhuuli ano lwe shaleelo. 4Umukasya umweene aabakanikhayo, nga ali mu mulilo khu lukiingi. 5Ne kumulilo kwaabariisa inywe, mwaalekha khuuniina khu lukiingi khu ngaaki ta, nashiryo ise nakanikha n’Umukasya mu lisina lyeenywe, nio ise naababoolela inywe byeesi niye aaloma. Aaloma ari: 6‘Ise ndi niye Umukasya Wele weenywe, uwabarusa inywe mu Misiri, abe isi mumenya mu bukulwa. 7Mukhesaayatsaka ba wele babaandi ta, akhali ise senyene. 85.8: Lev 26.1; Maka 4.15-18; 27.15Mukhabuumbayo shishiindu shoosi, shishifwaana nga isho shoosi shishiili mwikulu mu ngaaki, namwe aasi khu shibala, namwe mu meetsi aasi, 95.9: Luky 34.6,7; Bala 14.18; Maka 7.9,10mwaafukhamila aasi mwaashisaaya ta. Khulwekhuuba ise Umukasya Wele weenywe, indi uwe libuba, singana mwesaaya ba wele babaandi ta. Nga mwaantsikaanile ise mwaatsiile khukhwisaaya bifwaani, kane imbe tsiingo tsyeenywe shitaambiso, ni khukhwoola khu muboolo kukuukhola khataru, ni kukuukhola khane. 10Ne abo babaangana ise, naluundi baaloondelela kamakaambila kaase, ise imbookesanisa khuukana khukhuukhakama ta, khuumala kimiboolo ni kimiboolo. 115.11: Lev 19.12Mukharaambisatsaka lisina ly’Omukasya Wele weenywe, mu biindu bibikhalimo ta. Khulwekhuuba umuundu ukhola aryo, ise Umukasya, kane imuwe niye shitaambiso.

125.12: Luky 16.23-30; 31.12-14“‘Muli ni khukhwitsiliilisa mubone muri muyila shifukhu sha Sabato, nga shifukhu shikhosefu, nga ise Umukasya ni namala khuubalakila inywe. 135.13: Luky 23.12; 31.15; 34.21; 35.2; Lev 23.3Muli ni khuukhola buraambi bweenywe mu biifukhu bisesaba. 14Ne shifukhu she kumusaafu shili she khuuwola, shishiili ni khuuweebwayo buraawa isi Umukasya Wele weenywe. Mbaawo ukhola buraambi bwoosi khu shifukhu isho ta, oba iwe wanweene, namwe babaana boowo besiinde ni bakhaana, namwe baakulwa boowo be seetsa ni bekhasi, namwe tsikhaafu tsyoowo, namwe tsisikilya tsyoowo, namwe umukeendaani umenya ni nawe ta. Shino shikhunyalisa iwe wamweene khuuwolamo, ikhaba ni baakulwa boowo, besaani ni bekhasi. 15Shifukhu shino she khuuwola kane shibashebuse inywe shiri, mwamiinikhilisibwa mu khuraamba nga muli i Misiri, naluundi muri ise Umukasya Wele weenywe naraambisa kamaani kamakali naabi, khuubarusa inywe ibweene iyo. Shino nisho shishikila, ise Wele weenywe indakila indi muli ni khukhwitsililisa mubone muri muwolakho khu shifukhu sha Sabato.

165.16 a Maka 27.16; Mat 15.4; 19.19; Mako 7.10; 10.19; Luka 18.20; Efes 6.2; b: Efes 6.3“‘Paapa woowo ni maayi woowo, ubeesatsakamo lukoosi, naluundi ubawulile, nga ise Umukasya ni namala khaale khuubalakila. Shino kane shibanyalise inywe ni lisaaye lyeenywe khuumenya imbuka indeeyi, khu liloba lyeesi Umukasya Wele atsya khubawa inywe.

175.17: Rak 9.6; Lev 24.17; Mat 5.21; 19.18; Mako 10.19; Luka 18.20; Roma 13.9; Yak 2.11“‘Mukheera umuundu yeesi ta.

185.18: Lev 20.10; Mat 5.27; 19.18; Mako 10.19; Luka 18.20; Roma 13.9; Yak 2.11“‘Mukhayeyana ta.

195.19: Lev 19.11; Mat 19.18; Mako 10.19; Luka 18.20; Roma 13.9“‘Mukheeba ta.

205.20: Luky 23.1; Mat 19.18; Mako 10.19; Luka 18.20“‘Mukhawatsakayo bujulisi bwe bubeeyi, khu basheenywe ta.

215.21: Roma 7.7; 13.9“‘Mukhekoomba khukhwitubaasa n’umukhasi wabeene ta, mukhekoomba khuubukula intsu y’owasheenywe, namwe liloba lyeewe, namwe umuraambi weewe, umusaani namwe umukhasi, namwe bibyaayo byeewe, namwe tsisikilya tsyeewe, namwe shishiindu sheewe shoosi ta.’”

225.22: Heb 12.18,19Umukasya aakanikha bibiindu bino ni likono liikali, khukhwaamila mu mulilo ni kamafumbi kamamali, nga ali khu lukiingi, isi abo boosi babaaba baabusaane mwisina mwe lukiingi. Bino bili ni bibyeene byeesi Umukasya aakanikha, lwanyuma waabirona khu mabaale kabili, waakamaambisa ise.

Babaandu barya naabi

(She Lukyeendo 20.18-21)

23Musa weloosela waaloma ari, “Inywe ni mwawulila likono nga lyaamila mu mafuumbi kamamali, nga kumulilo kuli khu lukiingi, baraangirisi be bikuuka ni baraangirisi babaandi, baantsitsayo isi ise, 24kila baloma bari, ‘Umukasya Wele weefwe, waakhwookesanisile ifwe kamaani keewe ni shiriifwa sheewe. Khwaawuliile likono lyeewe khukhwaamila mu mulilo mukari. Khweyikile khuri, khana abe Wele akhakanikha isi umuundu, umuundu uyo anyala weloosela khuuba umulamu. 25Ne ari shiina kila khwisungula khweererera khuufwa? Khulwekhuuba Umukasya n’eloosela khuukanikha ni nafwe, ifwe ni khwiloosela khurekeeresa likono ly’Omukasya Wele weefwe, kane khufwe. 26Khulwekhuuba mbaawo umuundu yeesi, uwawulilakho nga likono lya Wele yenyene uuli umulamu, nga lilikho lyaamila mu mulilo, ne umuundu uyo weloosela khuuba umulamu, nga ifwe ni khuli shaleelo ta. 27Musa, iwe n’utsye aambi ni Wele akanikhe ni nawe, nio nawe wiitse ukhuboolele ifwe byeesi Umukasya alomele. Kane ifwe khuloondelele byeesi Umukasya kane abe waakhulomele ifwe khuukhola.’

28“Umukasya waawulila ibyo byoosi byeesi inywe mwaloma. Kila anomela ise ari, ‘Ise naawuliile byeesi babaandu abo bakanikhile, byeesi bakhuboolele iwe. Buli shitweela bashilomele buulayi. 29Khali busheele babeelatsakile ni bibyambaaso biilayi nga ibyo, bye khukhuuntsisaaya ise ni khuuloondelela byeesi kamakaambila kaase kaloma. Shino shandibanyalisile nibo ni babaana baabwe khuumenya mu bulamu buulayi busheele.’ 30Ari tsya ubalomele uri, ‘Ni mwiileyo mu masari keenywe. 31Ne iwe kobola wiimikhe ano, ikhuwe kamakaambila koosi ni biilakilo byoosi, ni indeekela yoosi, byeesi utsya khubaleekela nibo. Nio nga boolile khu liloba lyeesi intsya khubawa, babiloondelele.’”

32Kila Musa akanikha luundi isi ba Isiraeli nga aloma ari, “Muli ni khukhwitsiliilisa mubone muri muloondelela kamakaambila keesi Wele abalakiile khuuloondelela. Mbaawo khuufuniaakakho ikhaba litweela ta. 33Muli ni khuuloondelela kamakaambila keesi Wele abalakiile, nio munyalise khuumenyatsaka mu bulamu buulayi busheele. Naluundi nio munyalise khuumenya imbuka ingali khu liloba lyeesi Umukasya atsya khubawa inywe.”