Swahili Bible2

4

Ba Isiraeli bali ni khuuwulila Wele

1Lwanyuma Musa waaloma ari, “Ari ba Isiraeli bashaase, muli ni khuuwulila naluundi muloondelele kamakaambila ni biilakilo byeesi intsya khubaleekela inywe. Nga mwaabitsiililekho, kane mumenyewo imbuka indeeyi, naluundi kane mutsye muwaambe liswa lyeesi Umukasya Wele uwe bakuuka beefwe alikho abawa inywe. 24.2: Bimb 22.18,19Khu byeesi ise intsya khubaleekela, mukhalooselakho namwe mukharusakho shoosi ta. Muli ni khuuloondelela kamakaambila keesi Umukasya Wele weefwe abawa.

34.3: Bala 25.1-9“Inywe mwabeene mwebonela ni tsimoni tsyeenywe byeesi Umukasya aakhola i Bayaali Peyori, nga n’akhoonya mus’iinywe babaandu abe babesaaya wele isi balaanga bari Bayaali uwe Peyori. 4Ne inywe mumwarama mweyomiisila khu Mukasya Wele weefwe, mushiiliwo baalamu khukhwoolisa ni shaleelo.

5“Bona ise naabalekeele kamakaambila ni biilakilo byeesi Umukasya Wele weefwe andakiile ise khuubaleekela, indi nio mukaloondelele nga mwoolile khu liloba lyeesi ali khuutsya khubawa inywe. 6Kawaambe naluundi mukaloondelele, nio isi kamanaambo kakaandi mumanyikhane nga babaali ni kamakhula naluundi ni khuumanya. Khulwekhuuba kamanaambo kakaandi nga kaawuliile kamakaambila keenywe kane kalome kari, ‘Ilala, linaambo lino lili lye babaandu babaali ni kamakhula ni khuumanya.’ 7Linaambo shiina liliindi khu shibala khuno, liliili ni wele ulili aambi nga Umukasya Wele weefwe n’aali aambi, naluundi waakhwiilamo ifwe buli lweesi khumuloomba? 8Naluundi linaambo shiina khu shibala khuno, liliili ni biilakilo ni kamakaambila kakaali kamakhosefu, nga kamakaambila keesi ise ndikho imbawa inywe lwe shaleelo?

9“Muli ni khuurekeeresa, kimyoyo kyeenywe kili ni khukhwitsiliilisa, mubone muri simwibilila bibiindu byeesi muboone ni tsimoni tsyeenywe ta. Muli ni khuubishebulila mu buulamu bweenywe bwoosi, naluundi muli ni khuubileekela babaana beenywe ni babetsukhulu beenywe. 10Muli ni khuushebulila shifukhu sheesi mwemila mu moni tsy’Omukasya Wele weefwe, khu lukiingi Sinaayi. Khu shifukhu khweesi Umukasya aandakila ise ari, ‘Musa, busaasa babaandu, ubareere ano. Ingana khubakanikhayo, nio biilo ni biilo banyalise khuuloondelela byeesi ise inoma, naluundi nio banyalise khuuleekela lisaaye lyaabwe khuuloondelela byeesi ise inoma.’

114.11: Luky 19.16-18; Heb 12.18,19“Nga kamafumbi kamamali keboweleele khu lukiingi Sinaayi, ni kumulilo kulikho kwaaburukha nga kuniina mu ngaaki, inywe mweetsa mweemikha mwisina mwe lukiingi. 12Kila Umukasya abakanikhayo isi inywe khukhwaamila mu mulilo umwo. Ikhaba nga mwawulila likono lyeewe, ni bilomo byeesi abe alikho aloma, ne simwamubonakho umweene ta. 134.13: Luky 31.18; 34.28; Maka 9.10Umukasya aloma ari alikho akhola indakaano ni nanywe, ari inywe khu luwaande lweenywe, muli ni khuuloondelela Kamakaambila Likhumi, keesi aarona khu mabaale kabili. 144.14: Luky 21.1Awo niwo esi Umukasya aandakila ise khuubaleekela inywe bilakilo n’indeekela yeewe, ari muli ni khuubiloondelela nga mwoolile khu liloba lyeesi atsya khubawa, libe lilyeenywe.”

Mukhesaaya bifwaani ta

15Musa weloosela waaloma ari, “Nashiryo muli ni khukhwitsiliilisa naabi. Khulwekhuuba lweesi Umukasya aabakanikhayo nga ali mu mulilo, isi mwabeela mwisina mwe Lukiingi Sinaayi, simwamubonakho ta. 164.16: Luky 20.4; Lev 26.1; Maka 5.8; 27.15Yitsiiliilisa mubone muri simukhola shishoonako shoosi, nga mwisaaya bifwaani ta. Mukhakhola shibuumbe shoosi, oba shishifwaana nga umusaani, namwe nga umukhasi, mwaashisaaya ta. 174.17: Roma 1.23Namwe ikhaba shibuumbe shoosi shishifwaana nga isolo yoosi, namwe binywiinywi bibipururukha, 18namwe shiimusiru shoosi shishikhururira aasi, namwe inyeeni ta. 19Namwe ikhaba nga mwenyusile tsimoni tsyeenywe mu ngaaki mwaaboone inyaanga, ni kumweesi, ni tsinieniesi, ni neebyo byoosi bibiili mwibaanga, mukhakhongelesebwa mwaabisaaya ta. Bibiindu bino, Umukasya waabireerawo kamanaambo ke khu shibala kakaandi khuubisaaya. 204.20: Luky 19.5; Maka 7.6; 14.2; 26.18; Tito 2.14; 1 Pet 2.9Ne inywe muli babaandu b’Omukasya, khulwekhuuba aabarusa inywe khukhwaama i Misiri, abe isi muli mu mutaambo kumukali naabi.

214.21: Bala 20.12“Ni khuuminyisawo, inywe mwaakila Umukasya waakhalalila ise, nga antsitsubila ari ise singane ikhalise luluutsi Yorudaani ningile khu liloba liilayi lyeesi atsya khubawa inywe ta. 22Nashiryo ise ndi ni khufwiila mu liloba lino, singane ikhalise Yorudaani ta. Ne inywe kane mukhalise, mutsye muwaambe liiloba liilayi ilyo.

23“Busheele muli ni khuushebulila indakaano isi mwakhola n’Umukasya Wele weefwe. Umukasya Wele waabalomeele ari mukhakholakho shibuumbe she saambo yoosi ta. 244.24: Heb 12.29Khulwekhuuba Umukasya Wele weefwe, ali ni libuba liikali naabi, kane lirima limuwaambe.

25“Nga mwaamenyile mu liloba ilyo khuumala imbuka ngali, mwaasaalile babaana, naluundi nga mwaafunile babetsukhulu, ni mwiibirisa buubi mwaakholayo shibuumbe shoosi, muba mwaakholile shishoonako isi Umukasya Wele weefwe. Shino kane shikile akhalale naabi. 26Likulu ni shibala bili bajulisi baase khu shifukhu shino. Ni muba mwaakholile bifwaani mwaabisaayile, singane mumenyewo imbuka ingali khu liloba lyeesi mutsya khuwaamba shangelekha wa Yorudaani ta. Kane Umukasya abeere mweesi muwewo. 274.27: Maka 28.36Umukasya kane akile inywe musalanile mu manaambo kakaandi, ibewo bafwiiti bari musiinywe babaakane baramewo mu manaambo ako. 28Nga mwoolile ibweene iyo, mukhesaaye ba wele beesi babuumba busa khukhwaama mu bisaala ni mu mabaale, babaakhali ni tsimoni ta, namwe babaakhali ni kamaru ta, namwe babaakhali ni kiminwa ta, namwe babaakhali ni kamoolu ta.

294.29: Yer 29.13“Ne nga muli mu bihangafu ibyo, munyala mwaakobolayo khukhwisaaya Umukasya Wele weefwe. Nga mwaamukobooleyo ni kimyoyo kyeenywe kyoosi, ni buulamu bweenywe bwoosi, kane ndi abe Wele weenywe luundi. 30Nga nyaanga bibiindu bino byaabakwiilekho, muli mu mutaambo, muli ni khuukobolayo isi Umukasya Wele weefwe, muloondelele byeesi aloma. 31Khulwekhuuba Umukasya Wele weefwe, ali Wele uwe shiisa. Singane abaantsukhe namwe aboonakise, namwe ebilile indakaano isi aakhola ni bakuuka beenywe, ni byeesi aabasuubisa nibo ta.

32“Abe mwaakhawentselesa mu biindu biikhale, bibyakholikha nga inywe mushiili khusaalikha ta, namwe khu shibala khwoosi, oba shaabatsakawo namwe shaawulilikhanakho, khukhwaama nga Wele n’abumba likulu ni shibala, oba shiindu nga shino shaabatsakawo. 33Manya iliwo babaandu boosi babaawulila likono lya Wele, nga akanikhila mu mulilo, nga inywe ni mwawulila, lwanyuma baarama nga bashiiliwo baalamu? 34Namwe iliwo wele yeesi uwakhakakho waatsya webukulila umweene linaambo khukhwaama mu linaambo liliindi, nga araambisa bye kamakaanga, ni busoolo? Namwe nga araambisa kamaani keewe, ni bibiriisa biikali, nga Umukasya Wele weefwe, n’akhola byeesi inywe mwabona ng’abakholela mu Misiri? 354.35: Mako 12.32Umukasya waabokesanisa inywe bibiindu bino, ari nio inywe mumanye muri, Umukasya ali Wele, mbaawo ukuundi ta, akhali niye yenyene. 36Niye aabafukiilisa inywe mwaawulila likono lyeewe nga ali mwikulu, ari nio abaleekele inywe. Nga ali khu lukiingi, aabafukiilisa inywe mwaabona kumulilo kwe kamaani, naluundi mwawulila bilomo byeesi aloma. 37Umukasya umweene aabawo, waaraambisa kamaani kamakali, mu khubarusa inywe mu Misiri, khulwekhuuba abe akana bakuuka beenywe, naluundi abe waamala khaale khuurobora lisaaye lyaabwe. 38Umukasya aatimisa kamanaambo ke kamaani khuubafuurisa inywe kaarurawo, ari nio abawe inywe liloba lyaabwe khuuba busikha bweenywe mumenyemo, nga n’alikho akhola shaleelo.

39“Ni nashiryo, shaleelo ni mushimanye naluundi mushikhebulilatsake mu myoyo kyeenywe muri, Umukasya ali Wele, oba mwikulu, namwe khu shibala. Mbaawo wele ukuundi ta. 40Nashiryo muli ni khuuloondelela bilakilo ni kamakaambila keewe, keesi ise ndikho imbawa inywe shaleelo. Shino kane shibayeete nywe ni lisaaye lyeenywe, mumenye buulayi, naluundi mumenye buulamu buleeyi khu liloba lyeesi Umukasya Wele weefwe alikho atsya khubawa inywe.”

Biriimba bye khuumulilamo

414.41: Yos 20.8,9Lwanyuma Musa wawaamba biriimba bitaru, nga bili ibwaamanyaanga we luluutsi Yorudaani, waabikhola khuuba bya buraawa. 42Waaloma ari, abe noola umuundu weerire uwashe nga saashikeendelela ta, namwe nga abe bashiili khulomanakho ta, ali ni khuumulila ibweene iyo. Shino kane shimuyete awonese buulamu bweewe. 43Biriimba bino nibyo: Bezeri shishiili mu bikiingi bye mu mubiimbi mu bisiintsa bya Rewubeni; Ramosi shishiili mu Gileyadi, nga shili mu liloba lye be lisaaye lya Gadi, ni Golani shishiili mu Bashani, nga shili mu liloba lye be lisaaye lya Manase.

Musa aboolela babaandu byeesi Umukasya akana bakhole

Ba Isiraeli nga bali i Beesi Peyori

44Akano niko kamakaambila keesi Musa aawa ba Isiraeli. 45Indeekela yino, ni biilakilo bino, Musa aawa ba Isiraeli nga baamile mu Misiri, 46nga bali shangelekha we luluutsi Yorudaani, mu litila lililoleleele Besi Pewori. Abe bali mu liloba lya Sihoni umuyiinga uwe ba Amori, abe umenya i Heshiboni. Musa atweela ni ba Isiraeli nga baamile i Misiri, baafuura Sihoni yuno mu busoolo. 47Naluundi baafuura ni Ogo, umuyiinga uwe ba Bashani. Buyiinga bwe bayiinga bano boombi abe buli ibwaamanyaanga we luluutsi Yorudaani. Ni baabafuura baababukula liloba lyaabwe. 48Buyiinga bwa Sihoni ni Ogo abe butsya khukhwaamila i Aroweri, shishiili khu ndulo khwe litila lye Arinoni, khukhwoolela ilala khu lukiingi Siriyoni (namwe Herumoni), 49naluundi abe bayila ni kumubiimbi kukuuli ibwaamanyaanga we luluutsi Yorudaani, khuutsya khwoola imwaalo khu nyaantsa Dedi Si, mwisina mwe lukiingi Pisiga.