Swahili Bible2

34

Khuufwa khwa Musa

1Lwanyuma Musa waama mu shisiintsa shishilaangibwa shiri Mowabu, waaniina khu lukiingi Nebo, khu lukulu khukhulaangibwa khuri Pisiga. Luno nga lwaloleelela Yeriko. Nga ali ibweene iyo, Umukasya waamwokesa shibala, khukhwaama i Gileyadi khuutsya khukhwoola i Dani. 2Wokesa Musa liloba abe lyeesi atsya khuwa bikuuka bino: sha Nafutali, Efurayimu, Manase, ni Yuda, nga lino ibukwanyaanga litsya lyoolela ilala khu nyaantsa Meditereniani. 3Umukasya weloosela waamwokesa liloba liliili imwaalo, khukhwaamila mu litila aambi ni shiriimba Yeriko, shishimanyikhaane nga Shiriimba she Kimisaala Kimisheendu, khukhwiikha khukhwoolisa ilala khu shiriimba she Zowari.

434.4 a Rak 12.7; b: Rak 26.3; c: Rak 28.13Kila Umukasya amulomela ari, “Musa, ise ni neetsubila bakuuka boowo, Iburayimu, Isaaka, ni Yakobo, indi ikhaawe lisaaye lyaabwe liloba, naba indi khuukanikha khu liloba ilyo. Naakhufukiilisile iwe khuulibonakho busa, ne iwe singane ukhalise ulitsyemo ta.”

5Ni nashiryo, Musa umwakaanisi w’Omukasya, waafwiila awo mu Mowabu, khuuloondekhana ni sheesi Umukasya abe aaloma. 6Umukasya waasiikha Musa mu litila aambi ni shiriimba she Besi Pewori. Ne ni khukhwoolisa shaleelo shino, mbaawo umuundu uwamanyakho shiifwo shisheene ta. 7Musa aafwa nga abe oolisa kye buukhulu shitoondo shitweela ni kamakhumi kabili (120). Abe tsimoni tsyeewe tsibona buulayi, naluundi abe ashiili ni kamaani.

8Ba Isiraeli baamenya khu musaalela kwa Mowabu, nga bashiililila Musa, khuumala biifukhu kamakhumi kataru. Yino yaba isaambo yeewe iye khuulila babaandu baakhulu nga baafwiile.

Yoswa ekyela umuraangirisi wa Isiraeli

9Nga Musa ashiili khuufwa ta, waara kamakhono keewe khu Yoswa, waamurobora khuuba niye khuuba umwiilila mu bikele. Umukasya abe waawa Yoswa kamakhula, nashiryo ba Isiraeli baloondelelatsaka byeesi abe aloma, naluundi baloondelelaatsaka kamakaambila keesi Umukasya abe aawa Musa.

Musa abe ali umuŋoosi uwe angaaki

1034.10: Luky 33.11Mu Isiraeli simwabaatsakamo umuŋoosi ukuundi nga abe Musa ta. Umukasya abe akanikha ni naye nga umuundu n’akanikha n’uwashe. 11Naluundi Umukasya amataayi aamurumana niye khuutsya khuukhola bye kamakaanga mu moni tsy’omuyiinga wa Misiri, ni be linaambo lya Misiri boosi. 12Mbaawo ukuundi yeesi uwabaatsakakho ni bunyala bwe khuukhola bibiindu bye kamaani biryo, nga byeesi Musa aakhola buli mutweela waabona ta.