Swahili Bible2

33

Musa aloombela bikuuka bye ba Isiraeli tsiikhabi

1Musa abe ali umuŋoosi uwa Wele. Nashiryo nga ashiili khuufwa ta, waaloomba ari Wele awe ba Isiraeli tsikhabi, nga aloma ari:

2Umukasya aakhwiitsayo isi ifwe, nga aama khu lukiingi Sinaayi.

Nga ali mu Edomu, waamulikha buwaanga khu baandu beewe,

ni shiriifwa sheewe shaamelamela,

nga aama khu lukiingi Parani.

Abe bikana bye bamalayika bili ni naye,

ni kumulilo abe kulikho kwaaburukha khukhwaama mu makhono keewe.

3Umukasya akana bikuuka bye ba Isiraeli,

naluundi atseeta babaandu beewe.

Barekeeresa byeesi niye aloma,

naluundi bamwisaaya niye.

4Ise nalaanga lubuusano lwe bikuuka bye ba Isiraeli,

naabawa kamakaambila ka Wele.

5Lwanyuma inywe mwabeene ni baraangirisi beenywe,

ni mwabuusana, mwarawo Umukasya, khuuba umuyiinga weenywe.

6Musa waalomela babaandu be mu shikuuka sha Rewubeni ari,

“Khali mupilewo khabili,

be ikhaba nga simukhayiimbe mube mu bukali ta.”

7Waalomela babaandu be shikuuka sha Yuda ari,

“Khali Umukasya arekeeresire khuuloomba

khwe shikuuka she babaandu ba Yuda,

abakobosa atweela ni bikuuka bibiindi.

Khali Umukasya abaweele inywe kamaani,

naluundi abatseeta khukhwaama isi baasiku beenywe.”

833.8 a Luky 28.30; b: Luky 17.7; c: Luky 17.7; Bala 20.13Waalomela babaandu be shikuuka sha Levi ari,

“Khali be shikuuka sha Levi, Umukasya abaweele

Sumimu ni Urimu33.8 Sumimu ni Urimu: Lolakho mu shitabo she Lukyeendo ni luruungo lwe biilomo bikhulu.

Khulwekhuuba mu khukana khuubona oba muli ba saambo shiina,

nga muli i Masa ni i Meriba, Umukasya abakhakilisa inywe.

9Isi inywe, khuuloondelela indakaano isi Umukasya

abe amala khaale khuukhola ni ba Isiraeli,

shaba shishiindu she angaaki, khuuminyisakho

buulamu bwe ba paapa beenywe,

namwe ba maayi beenywe,

namwe babandaayeenywe

namwe babaana babeenywe babeene.

10Inywe nibo mumuuleekela ba Isiraeli kamakaambila ka Wele,

ni mu bifwo bye khukhwisaayilamo,

inywe nibo babaawaanayo tsisaayilo

ni khukhwoosha bubaani.

11Ise inoomba ndi khali Umukasya abaweele inywe tsikhabi

mu buli byoosi byeesi mukhola byoosi,

naluundi abawa kamaani kakaamala,

nio munyalisa khuufuura baasiku beenywe.”

12Musa waalomela babaandu be mu shikuuka sha Benyamini ari,

“Inywe muli shikuuka sheesi Umukasya uwe angaaki naabi, akana naabi.

Umukasya amenya mus’iinywe,

nga abatseeta inywe buli busheele”

13Musa waalomela be mu shikuuka sha Yusufu ari,

“Khali Umukasya abaweele inywe tsikhabi,

nio busheele muba ni kameetsi kamamiliwu khukhwaama musebele,

ni liime khukhwaama mu ngaaki.

14Khulwe kumuumu kumulayi,

khali buli kumweesi mufunile bibyaamo biikali.

15Khali mufunile bibyaamo biikali,

khukhwaama khu bikoongo byeenywe bya busheele.

16Inoomba ndi khali Umukasya,

uwabonekhela mu shitsakha nga shilikho shisha,

abaweele inywe biilimwa biilayi naabi.

Khali bibiindu biilayi bino bibeele bibyeenywe,

khulwekhuuba Yusufu niye uwaba umuraangirisi uwe babandaaye.

17Kamahe ke ba Efurayimu ni Manase,

kali kamarafu naluundi kali ke shiriifwa.

Kali busa nga tsiintsika tsy’ewuunwa.

Kamahe kano kakhebwakale baasiku baako,

kabatimise khuutsya khukhwoola khu ndulo khwe shibala.

18Musa waalomela be shikuuka sha Zebuloni,

ni sha Isakaari ari,

Khali babaandu ba Zebuloni bekhoyaatsakile

buli aandu oosi esi batsya;

khali babaandu ba Isakaari, bekhoyatsakiile muungo tsaabwe.

19Kane mufune buyiindifu khulwe khusubulila khu nyaantsa,

ni khusubulila khu ndulo khwe inyaantsa,

Nashiryo laanga kamanaambo kakaandi,

keetse kekhoyele atweela ni nanywe,

mu khuwaanayo tsisaayilo isi Wele.”

20Musa waalomela shikuuka sha Gadi ari,

Umukasya khali abaweele inywe tsikhabi

tsye khuufuna liiswa liikali.

Ni mukuukuule nga mumuruuya!

Shikuuka sheenywe shili ni kamaani,

nga italanyi nityenuulakamo sheesi itsya khulya.

21Baraangirisi beenywe bekhala aasi,

baroborera shikuuka sheenywe liloba lilifuurisa buulayi.

Ne shitweela busa inywe mwaloondelela byeesi Umukasya aloma,

mwayeetakho bikuuka bibiindi.

22Musa waalomela shikuuka sha Dani ari,

“Shikuuka sha Dani,

inywe muli busa nga italanyi ishiili inyana.

Khulwekhuuba mutsunukha khukhwaama mu lifuluma

lyeenywe mu Bashani,

mwaakulukhila baasiku beenywe.”

23Musa waalomela be shikuuka sha Nafutali ari,

“Be shikuuka sha Nafutali,

Umukasya waabekhoyela inywe naabi.

Kane abawe tsiikhabi,

abawe ni liiswa liliili ibukwanyaanga ni liliili imwaalo.”

24Musa waalomela shikuuka sha Asheri ari,

Shikuuka sha Asheri,

khali Umukasya abaweele inywe ikhabi khuuminyisa bikuuka byoosi.

Umukasya abakana inywe naabi khuuminyisa

n’akana bikuuka byoosi.

Kane mube ni kamafura kamakali khukhwaama mu kuusaala khu misaala ki olivu.

25Biilibwa bye mu biriimba byeenywe,

bikhaabe bye kamaani nga bili bye

biibya ni bya buroonzi.

Khali mubeele ni kamaani kamakali

khuumala buulamu bweenywe bwoosi.

26Ba Isiraeli, mbaawo wele ulekhaana ni Wele weefwe ta!

Kamafuumbi kali niko likaari lyeesi akeendelamo,

nga n’akeenda mwibaanga mu ngaaki,

khukhwiitsa khuukhuyeeta ifwe.

27Wele uliwo biilo ni biilo,

ali niye ingabo ikhutseeta ifwe.

Niye akhusuta ifwe ni kamakhono keewe.

Niye uwatimisa baasiku beefwe baatsya,

nga akhulakila ifwe khubahesa bawewo.

28Shino shaakila ba Isiraeli bamenya akhali bihangafu byoosi ta.

Ni nashiryo lisaaye lye ba Isiraeli lyamenya mu lukoosi,

nga bali n’ifula imala,

naluundi nga bali ni biilyo n’iviini mu bukali.

29Ba Isiraeli, nga muli n’ikhabi!

Linaambo shiina liliindi liliili nga inywe,

linaambo lyeesi Umukasya umweene awonesa,

naluundi waaba niye ingabo yaabwe,

nga abatseeta khukhwoolisa ni bafuura baasiku baabwe?

Baasiku beenywe bakhaabeetseyo,

nga babekoontselela bari mubawaambile shiisa;

ne inywe mukhaabakhaandakilile khu mikoongo kyaabwe.