Swahili Bible2

32

1Iwe likulu n’urekeerese, nga ise ndikho inganikha;

iwe shibala, wulila bilomo bibyaama mukhanwa mwase.

2Ba Isiraeli, kane ise imbe umuleekeli weenywe.

Kane inganikhe bilomo byase mumbola busa nga ifula n’ilakala,

nga n’ilakala khu bilimwa bibyaanakhe,

namwe nga liime khu bunyaasi.

3Khulwekhuuba ise kane ingukuule lisina ly’Omukasya,

Buli mutweela n’aruuye shiriifwa sha Wele weefwe.

4Wele ali niye ukhutseeta ifwe, akhola bibiindu biilayi naabi;

byeesi niye akhola busheele bili bya ŋali.

Ali Wele isi ifwe khwiyikina, naluundi s’aalikho shishoonako ta;

ali umulayi naabi.

5Ne bona inywe mwaayoonaka mu moni tsy’Omukasya,

ni khulwe bibyoonako byeenywe,

inywe simushiili babaana beewe ta;

inywe muli babaandu baboonaki naluundi be bubeeyi.

6Inywe mumuuli basilu naluundi babaakhalimo kamakesi ta,

iyo niyo isaambo isi muliyilamo Umukasya?

S’aali niye uwababuumba inywe, waabara mu shibala muno ta?

S’aali niye uwaakila inywe mwekela linaambo ta?

7Yambaasa khu byakholikha khaale,

shebulila kimiboolo kimitaayi;

reeba bakuuka beenywe, babokese;

reeba babaandu baakhulu kane bababoolele.

832.8: Bur 17.26Nga Wele, uuli angaaki e ba wele boosi, n’akabila kamanaambo liiloba lye khuumenyamo,

nga n’akabananisamo babaandu,

nga n’areerawo buli babaandu lulwaakha,

aashikhola khuuloondekhana n’isi babaandu beewe abe batsya khumenya.

9Ne Umukasya umweene,

niye uuli Wele uwe ba Isiraeli,

nga nibo lisaaye lya Yakobo.

10Ba Isiraeli, inywe Umukasya aabanyoola nga muli mu mubiimbi,

kumwoomu busa nga kulimo imbewo iwuutsa ni kamaani,

waabatseeta nga abawa byeesi mwekoomba,

wabeyembelela nga uwiyembelela imoni yeewe.

11Umukasya waaba busa nga ikhosi

n’ileekela kamaana kaayo khuupuruurukha,

nga yeerekekhile khukhwiwuta aasi

ikakaame nga ikawaambila mu ndaaha tsayo.

12Ba Isiraeli, Umukasya niye umweene uwabaraangirira inywe,

nga mbaawo wele ukuundi umuyeetakho ta.

13Umukasya niye uwaakila inywe mwawaamba shibala she Kanaani.

Niye waakila inywe mwaalya biilimwa bye mu shibala isho.

Waabanyalisa inywe khuulya bubuushi bwe ntsushi khukhwaama mu mabaale,

ni khuulya khu mafura khukhwaama khu mi olivu abe kikyatsowa khu mabaale.

14Umukasya waabaliinda inywe nga abawa

kamabeele kamabowu, ni ke tsimbusi.

Waabawa inywe tsinyama tsinulu khuulya,

waabaliisa iŋaano inose naabi ni iviini ifuura buulayi.

15Ne inywe babaandu b’Omukasya mweekela baanefu, muryo mwaamuminyaalila.

Mwaanera, mwaafuna buyiindifu,

mwaantsukha Wele uwababuumba inywe,

uyo uwaba umuwonesi weenywe.

16Khulwe khukhwisaaya bifwaani ni ba wele babaandi,

inywe mwaakila lirima ni libuba byawaamba Wele.

1732.17: 1 Kor 10.20Mwawaanayo tsisaayilo isi bisaambwa bibikhali wele ta

mu shifwo she khuuwaanayo isi Wele.

Bano baaba abe ba wele beesi inywe nio mwaama khufuumbula,

bano abe beesi bakuuka beenywe bakhesaayatsakho ta.

18Inywe mwebilila Wele, uyo uwababuumba,

mwebilila umutseeti weenywe, uwabasaala inywe.

19Inywe abe muli babaana b’Omukasya,

ne n’abona sheesi inywe mwakhola,

niye waabekaana inywe.

20Kila Umukasya aloma ari, “Inywe simuli babaandu babeyikinwa ta,

ise siinyala naabeyikina ta.”

Nashiryo ise singene niloosele khuubayeeta inywe ta.

Akhali kane niime indoleelele busa,

imbone shishinabakholikha khus’iinywe.

2132.21 a 1 Kor 10.22; b: Roma 10.19Inywe mwesaaya bifwaani bye ba wele,

mwaakila libuba lyamaamba,

naluundi naakhalala naabi.

Nashiryo, kane nase imbasiindikhile babaandu

babaali be aasi naluundi baasilu,

akile nanywe libuba ni lirima bibawaambe.

22Baandu baase, kane ise imbokesanise lirima liliili nga kumulilo,

nio likile inywe mwiikhe muumbo wa naleme,

imakoombe isi babaafwa bamenya.

Kane lirima lyase lyooshe kimikuunda kyeenywe,

ni khukhwoolisila ilala mwisina mwe tsingiingi.

23Kane ise imbasiindikhile inywe kimitaambo,

kitsye nga kiloondekhana busa,

kifwaane busa nga buyiingo ni bubawuna.

24Intsala ikhaabewunemo,

ni tsiifu tsiimbi naabi tsibebwakale.

Ikhaba tsindemu tsye butsiba buubi naabi,

ni tsisolo tsindafu naabi, bikhaabebwaakale.

25Basoleeli ni bakhaana babaashili khukhwaalikha ta,

ikhaba babaana babaashinuuna ni babaandu baakhulu,

boosi bakhaabeerire abulafu busa ni lurima,

naluundi muungo tsyeenywe kamariisyo kabawaambe.

26Khali ise naakhalawo imbasalanisa mu shibala she aleeyi,

nio ilekha khubawo umuundu khu shibala shoosi ubashebulila ta.

27Ne narya indi baasiku beenywe,

kane bebuyile bibikhalimo ta,

nga bambaasa bari nibo baabawulile inywe mu busoolo,

nga sibamanya bari Umukasya niye ushikholile ta.

28Musa weloosela waaloma ari,

Khulwekhuuba ba Isiraeli sibali ni kamakhula ta,

sibambaasa buulayi ta.

29Baba babaali ni kamakesi, khali batekeelile shino,

namwe khali baamanyile shishiitsya khubakholikhakho.

30Ne abe busa shaama shiryeena,

umusiku mutweela khuutimisa basilikhale ba Isiraeli shikana shitweela (1,000),

namwe baasiku babili khutimisa basilikhale ba Isiraeli bikana bibili (2,000)?

Shino shanyalikha khulwekhuuba abe Umukasya,

umutseeti waabwe, wabaantsukhiile baasiku.

31Khulwekhuuba, ni baasiku beefwe babeene baashimanya bari,

ba wele baabwe babaliinda nibo,

sibali ni kamaani nga Wele, umutseeti weefwe ta.

32Khulwekhuuba nabo abe bali busa

nga babaandu be mu Sodomu ni Gomora32.32 Sodomu ni Gomora: Biriimba bino abe byaamanyikhana naabi lwe bubwoonaki bwaabwe.

Bali busa nga kimizabibu kikyaama bibyaamo bibikhalimo kumukaso ta,

nga byaluluwa naluundi bye butsiba.

33Bali busa nga indali isi basuura mu butsiba bwe indemu,

nga butsiba bw’endemu ikhilakhima.

34Ne ise Umukasya, naamala khaale khuurona kumunyele kwe bibyoonako byaabwe,

naakura mu libiikhilo lyase.

3532.35: Roma 12.19; Heb 10.30Khulwekhuuba imbuka isi ise ingana khukhwilihaasilamo

naluundi imbawe nibo shitaambiso, ili aambi.

Imbuka ilyoola, mubafuure nibo mu busoolo,

nio abweene awo ingunyi ibawaambe.

3632.36: Zab 135.14Umukasya akhaakhalewo ari babaandu beewe sibali ni kumusaango ta,

naluundi awaambile babaakaanisi beewe shiisa,

nga waaboone ari kamaani kaabwe kaabaweelemo,

ari mbaawo umulekhuule namwe umubowe, babaaramirewo ta.

37Lwanyuma Umukasya areeba ari,

Ba wele baabwe abe beesi beyikina,

abe babaabatseeta, bali waheena?

38Ba wele beesi inywe mwawaanayo iviini,

naluundi mwabawayo tsisaayilo, bali waheena?

Shiina kila ba wele abo bakhabayeeta ari,

namwe babatseeta inywe?

39Inywe simubona muri,

ise senyene niye Wele uliwo,

naluundi mbaawo ba wele babaandi ta?

Ise niye ukaba buulamu,

naluundi ise niye urusawo buulamu bw’omuundu.

Ise nabawa shitaambiso she khuubonabona.

Ne bona ari ise ingana khubawonesa inywe,

mbaawo shishinyala shantsakamisa ise ta.

40Ari ise imbetsubila inywe nga isuta kamakhono kaase mu ngaaki,

indi nga ise n’imenyawo biilo ni biilo,

41kane nilihaase khu baasiku baase

besi nabiyila naabi abo.

Ise ikhaawakale luurima lwase,

lumulikhe busa nga luheni.

42Kane buyiingo bwase bwisikikhe

mu mibili kye baasiku baase bumenye mu bweene;

kane inaambise lurima lwase khuutanyaka baasiku baase,

lurame nga lwehakhile kamafuki.

Ise ikheere bawaambe boosi,

imbabekekho litsuune lyaabwe lileeyi ilyo.

4332.43: Roma 15.10; Bimb 19.2Musa weloosela waaloma ari,

“Babaandu be kamanaambo mweesi,

ni mubuyile babaandu beewe.

Nga beerire babaandu beewe, niye eliyaasa,

naluundi awa baasiku beewe shitaambiso.

Apyeluusa shibala she babaandu beewe, waashirusakho bibyoonako.”

44Lwanyuma Musa ni Yoswa, umusoleeli uwa Nuni, baatsya baakanikhila biilomo bye kumweenya ukwo, mu moni tsye babaandu boosi. 45Nga Musa waamalile khukanikhila ba Isiraeli boosi bilomo bye kumweenya kuno, 46waabalooselakho ari, “Busheele muli ni khuuwaambila kumweenya kuno mu myooyo kyeenywe, nio akile muleekele babaana beenywe. Shino shibanyalise nibo mu khwitsiliilisa nga baloondelela kamakaambila kano. 47Khulwekhuuba kamakaambila kano sikali biilomo busa ta, ne akhali niko kakaabawa inywe buulamu. Ni nashiryo, niko kakaakhaakile inywe mumenyewo imbuka indeeyi khu liloba lyeesi mutsya khwingilamo, nga mwaakhalisile Yorudaani.”

Umukasya aboolela Musa khu khufwa khweewe

4832.48: Bala 27.12-14; Maka 3.23-27Kila khu shifukhu isho, Umukasya aalomela Musa ari, 49“Tsya khu ngiingi tsitsilaangibwa Abarimu, uniine khu lulaangibwa luri Nebo, luluuli mu shibala she ba Mowabu, khu luwaande lululoleleele Yeriko. Kane ubone shibala she Kanani, sheesi intsya khuwa ba Isiraeli, shibe shishaabwe. 50Kane ufwiile khu lukiingi lweene ulwo, bakhusiikhe ni khubweene, ube busa nga yaaya woowo Aroni, ni afwa bamusiikha khu lukiingi Hori. 51Khulwekhuuba iwe ni Aroni, nga muli ni babaandu khu sebele iye Meriba, aambi ni Kadesi mu mubiimbi kwe i Zini, inywe simwookesanisa bubwiyikinwa ta. Nga ni mwaba ni babaandu, simwaantsisamo ise shiriifwa, abe shishintsakhila ise nga Wele ta. 52Ni nashiryo, kane ubone liiloba lyeesi ise intsya khuwa ba Isiraeli, ne iwe singane ulitsyemo ta.”