Swahili Bible2

30

Babaandu balikobolayo isi Umukasya

1Musa waaloma ari, “Indikho mbawa bibiindu bibili, ndi muroborekho shitweela: oba mukana bibiindu biilayi byeesi Umukasya atsya khubakholela inywe, namwe murobora bitaambiso byeesi Umukasya atsya khubawa, nga inywe mwamwantsukhile niye. Nga bibiindu bino byoosi byeesi ise imalile khuubaboolela inywe byaabakholikhilekho, naluundi nga mulikho mumenya mu bibala bibiili aleeyi isi Umukasya atsya khubasalanisa inywe, mulishebulila sheesi ise nabalomela inywe khuukhalawo. 2Isho shikile inywe mwabeene, atweela ni lisaaye lyeenywe, mwiileyo isi Umukasya Wele weefwe, muloondelele byeesi niye aloma ni kimyoyo kyeenywe kyoosi, ni buulamu bweenywe bwoosi, bibiili nibyo bibiindu byeesi ise imbalakila inywe lwe shaleelo. 3Nio Umukasya akile inywe mube ni buyiindifu luundi, abawaambile inywe shiisa, ababusaase inywe khukhwaama mu manaambo keesi umweene aalekha baasiku babasalanisa inywe, abakobose. 4Abe ikhaba bari mwasalanilaka, mumenya mu manaambo kakaali aleeyi naabi, Umukasya Wele weefwe, aliitsya ibweene iyo, aliibabusaasa inywe, abaruseyo abakoboseyo mu shibala sheenywe. 5Umukasya akhaabakoboseyo abawe inywe shibala shishaba she bakuuka beefwe, shiikele shisheenywe. Akhaabawe buyiindifu bubuminyisakho bweesi bakuuka beenywe baaba nabwo, naluundi musaalane mwitsule khuubaminyisa nibo. 6Umukasya Wele weefwe, akhaabashuuse inywe ni lisaaye lyeenywe, mube babaloondelela byeesi niye aloma, nio akile inywe mumukane niye ni kimyoyo kyeenywe kyoosi, ni buulamu bweenywe bwoosi. Shino shikhaakile inywe mwiloosele khuumenya mu liloba ilyo. 7Nio shikile Umukasya alekhele awo khuubawa inywe biitaambiso, aryo abishuuse abiwe baasiku beenywe babaamala khaale khuubamiinikhilisa inywe.

8“Singa murekeeresela ilala byeesi Umukasya Wele weefwe aloma, naluundi mwaloondelela kamakaambila keewe keesi ise mbawa inywe lwe shaleelo, Umukasya Wele weefwe kane abaniinise inywe angaaki khufuurisakho kamanaambo kakaandi koosi. 9Umukasya Wele weefwe kane akile mube ni buyiindifu bwe angaaki naabi, ni lisaaye lyeenywe libalaahe luukali naabi. Ikhaba bibyaayo byeenywe ni bilimwa byeenywe kane biiloosele bukali. Umukasya kane abekhoyele inywe bushaakha, akile inywe mube ni buyiindifu, shibe busa nga ni ekhoyela bakuuka beenywe. 10Ne bino kane bibe biryo, ni muba bari mwaloondeleele ibyo byeesi Umukasya Wele weefwe ababoolela. Muli ni khuuwaamba kamakaambila keewe, ni biilakilo byeewe mu myoyo kyeenywe, ni buulamu bweenywe, bibyaronebwa mu shitabo shino she Kamakaambila.”

11Musa weloosela waaloma ari, “Khulwekhuuba kamakaambila keesi ise ndikho imbawa inywe lwe shaleelo, sikali bari kamakumu naabi, namwe kali aleeyi naabi ta. 1230.12: Roma 10.6-8Sikali bari kali aleeyi mu ngaaki, nio akile inywe mwireebe muri, ‘Ne naanu ukane aniine mu ngaaki nio atsye akakhureerere ifwe, nio khukaloondelele?’ 13Namwe sikali bari kali shangelekha she inyaantsa, nio akile mwireebe muri, ‘Ne naanu ukane ambukhe inyaantsa nio atsye akakhureerere, nio akile khukaloondelele?’ 14Sishili shiryo ta! Kamakaambila kali aambi ni nanywe. Kali mu luulomo lweesi inywe mukanikha, naluundi inywe mwaakamanya. Ni nashiryo muli ni khuukaloondelela.

15“Bona lwe shaleelo indikho imbawa inywe bibiindu bibili, mukhalewo sheesi mukana: bibiindu biilayi namwe biibi; buulamu buuleeyi namwe khuufwa. 16Umukasya Wele weefwe kane abawe inywe tsikhabi nga mumenya mu shibala sheesi atsya khubawa, ni muba bari mwaaloondeleele kamakaambila keewe keesi ise ndikho mbawa inywe khu shifukhu she shaleelo. Muli ni khuukana Umukasya Wele weefwe, nga muloondelela byeesi aloma, naluundi nga mutsiila khu makaambila keewe, ni biilakilo byeewe, ni indeekela yeewe. Nio akile munyalise khuumenyawo luleeyi, naluundi lisaaye lyeenywe libalaahe.

17“Ne ni muminyaala mwaalekha khuuloondelela byeesi niye aloma ta, mwaatsya mwesaaya naluundi mwaakaanisa ba wele babaandi, 18ise imbaboolela lubuula lwe shaleelo indi, mukhaahele muwewo; simukhaamenye luukali mu shibala sheesi mutsya khukhalisa Yorudaani mwingilemo ta.

19“Lwe shaleelo ise ndikho inaanga likulu ni shibala khuuba bajulisi mu sheesi mulikho mukhola, khuuroborawo akari e buulamu ni khuufwa, namwe akari e ikhabi ni shitsubo. Ni nashiryo, nga mukana muri nio inywe ni lisaaye lyeenywe mumenyewo luukali, robora buulamu. 2030.20 a Rak 12.7; b: Rak 26.3; c: Rak 28.13Robora khuukana Umukasya Wele weefwe, nga muloondelela byeesi niye aloma, naluundi mube babeyikinwa. Khulwekhuuba isho kane shibayeete inywe mumenyewo imbuka indeeyi khu liloba lyeesi Umukasya aasuubisa khuuwa bakuuka beenywe, Iburayimu, Isaaka, ni Yakobo, ari kane abawe inywe.”