Swahili Bible2

3

Ba Isiraeli bafuura umuyiinga Ogo mu busoolo

(Khuubala 21.31-35)

1Musa weloosela waalomela babaandu ari, “Nga ni khwaamala khukhwiira umuyiinga Sihoni ni liiye lyeewe, khwawaamba lukyeendo khuutsya i Bashani. Nga khwoolile i Edereyi, umuyiinga wa Bashani ni liiye lyeewe lyoosi, baakhwibwakala. 2Ne Umukasya waanomela ari, ‘Musa, ukharya Ogo ni liiye lyeewe ta. Ise inakhuyeeta ubafuure mu busoolo, ubakhole nga ni wakhola umuyiinga Sihoni uwe ba Amori abe umenya i Heshiboni, ni babaandu beewe.’ 3Nashiryo Umukasya waakhunyalisa ifwe khufuura Ogo, umuyiinga uwe ba Bashani, atweela ni liiye lyeewe. Khwabeera khwabamalawo boosi. 4Khwawaamba liloba liliili mu shisiintsa shilaangibwa Aragoba, ni biriimba byaabwe byoosi, abe bibiili kamakhumi kasesaba (60). 5Biriimba bino abe baabyoombakhila kamatikiiyi kamaleeyi, ni bilibwa bye bibyuuma, khuutubaasakho ni bibyaalo nga nibyo sibabyoombakhila kamatikiiyi ta. 6Khwabeera boosi, basaani, bakhasi, ni babaana, khwaabamalilawo ilala, nga ni khwakhola Sihoni umuyiinga uwe ba Amori, abe umenya i Heshiboni. Naluundi khwoonakisila ilala biriimba byaabwe byoosi. 7Ne tsikhaafu ni byeesi khwayaaya khukhwaama mu biriimba ibyo, khwasuta khwaatsya ni nabyo.

8“Bayiinga Sihoni ni Ogo, abe bali baawuli ba Amori, nga buyiinga bwaabwe buli ibwaamanyaanga we Luluutsi Yorudaani. Khwawaamba liloba lino, nga lirakikhila mu litila lye Arinoni, khuutsya khukhwoola khu Lukiingi Herumoni. 9Ba Sidoni balaanga Lukiingi Herumoni bari Siriyoni, ne ba Amoni balulaanga bari Seniri. 10Khwawaamba biriimba bye mu ngoongo, ni Gileyadi yoosi, ni Bashani yoosi, khwaatsya khwoolela ilala ni mu biriimba bye buyiinga bwa Ogo umuyiinga uwa Bashani, nga nibyo Saleka ni Edereyi.”

11Umuyiinga Ogo abe ali mutweela khu baaramilakho khu ba Refa. N’isanduuku yeewe isi baamusiikhilamo, baakikhootsa mu libaale, naluundi nga ili i Raba, mu ba Amoni. Ili buuleeyi tsimita tsine ni buubalaayi tsimita tsibili.

Bakabananisamo liloba lye bukwanyaanga wa Yorudaani

(Khuubala 32.1-41)

12“Mu mbuka iyo, nga ni khwamala khuuwaamba liloba ilyo, naaliwa shikuuka sha Rewubeni ni sha Gadi. Liloba lino abe lirakikhira mu shiriimba Aroyeri, shishiili khu ndulo khwe litila lye luluutsi Arinoni, khuutsya khwoola ni shisiintsa she tsingoongo tsye mu Gileyadi ni biriimba byamwo. 13Liloba lye mu shisiintsa she Aragoba, nga mulimo liloba lya Gileyadi liliramire, ni Bashani yoosi, ni buyiinga bubwaba bw’omuyiinga Ogo, bino naabiwa shisiintsa she shikuuka sha Manase.”

(Shisiintsa she Bashani isho shoosi bashilaanga bari liloba lye ba Refa. 14Yayiri uwe mu shikuuka sha Manase waayila liloba lye mu Aragoba lyoosi, nga lilimo Bashani, ni khuutsya khwoola khu ndulo khwe ba Geshuri, ni ba Makasite. Bibyaalo ibyo waabitwiikha lisiina lyeewe, kila babilaanga bari Havosi Yayiri, ni khukhwoolisa lwe shaleelo.)

15“Be shikuuka sha Makiri nabawa Gileyadi. 16Be shikuuka sha Rewubeni ni sha Gadi, nabawa liloba khukhwaamila i Gileyadi, khuutsya khukhwoola mu litila lye luluutsi Arinoni, ni khuutsya khwoola khu luutsi Yaboko, khu lwaakha ni ba Amoni. Akari e litila aaba niwo lulwaakha lwaabwe. 17Naluundi khuurakikhila mu kutila kwe luluutsi Yorudaani nga nilwo lulwaakha, ni khuurakikhila khu nyaantsa Galilaaya, ni bwaamanyaanga, aasi e lukiingi Pisiga.

183.18: Yos 1.12-15“Kila ise imbalakila inywe nga imbalomela ndi, ‘Umukasya Wele weefwe, waabaweele inywe liloba lino khuuba lilyeenywe. Basoolani boosi bali ni khukhwaambukha luluutsi Yorudaani, batsye bayeetekho bikuuka bibiramire, khulwekhuuba bali baalebe beenywe. 19Ne bakhasi beenywe, ni babaana beenywe, ni tsikhaafu tsyeenywe (naamanyile ndi muli ni tsiikhaafu tsingali), bali ni khuurama mu biriimba bibiili khu liloba lyeesi ise imalile khaale khuubawa inywe. 20Muli ni khuubayeetakho khukhwoolisa nga Umukasya waweele balebe beenywe liloba, nga n’abawa inywe liloba lye shangelekha we luluutsi Yorudaani. Nio lwanyuma buli mutweela eleyo khu liloba lyeesi ise imalile khuubawa inywe.’ 21Kila mu mbuka iyo, ise nalomela Yoswa ndi, ‘Iwe wamweene webooneelekho ni tsimoni tsyoowo byeesi Umukasya Wele weefwe n’akhuyeetile ifwe khwafuura umuyiinga Sihoni n’umuyiinga Ogo. Ni nashiryo, Umukasya kane akhuyeete iwe musaambo niyo ndweela, buli isi kane utsye. 22Nashiryo ukharya ta, khulwekhuuba Umukasya Wele weefwe niye uuli khuukhusoolanila.’

Musa s’afukiilisibwa khukhwiingila mu Kanaani ta

233.23: Bala 27.12-14; Maka 32.48-52“Mu mbuka nyene iyo, ise naloomba Wele nga imwikoontselela, naloma ndi, 24‘O Mukasya Wele, bona iwe waarakikha khukhwookesana umwakaanisi woowo kamaani koowo ni bunyala bwoowo. Wele shiina ukuundi uliwo mwikulu namwe khu shibala unyala waakhola bibiindu bye kamaani nga byeesi iwe ukhola? 25Naakhuloombile, n’ufukiilile ise ikhalise luluutsi Yorudaani, intsye mbonekho khu liiloba liilayi lye tsingiingi ilyo ni lya Lebanoni.’

26“Ne Umukasya waakhalalila ise khulweenywe, waaloba khuuwulila khuuloomba khwase ta. Waanomela ari, ‘Byeesi ulomile bimala, singana naakhuwulila luundi nga unganikhayo khu lomo iyo ta. 27Niina khu ngaaki khwe lukiingi Pisiga, winyuse tsimoni tsyoowo ulole ibukwanyaanga, ingaaki, imwaalo, ni bwaamanyaanga, wamweene wibonele ni tsimoni tsyoowo. Khulwekhuuba iwe singene ukhalise luluutsi Yorudaani ta. 28Ne shonyene ndi, khoonyakilila Yoswa, naluundi umwiisemo kamaani, khulwekhuuba niye ali ni khuuraangirira babaandu beewe, abayile abawe liiloba lyeesi kane iwe ubone.’

29“Nashiryo ifwe khwarama mu litila, nga shangelekha khwaaloleleele shiriimba she Besi Pewori.”