Swahili Bible2

21

Nga uwirire ukuundi siwamanyikhaane ta

1Nga mumenya khu liloba lyeesi Umukasya Wele weefwe atsya khubawa, ne mwanyoola nga beerire umuundu, ne umwirire nga s’amanyikhana ta, 2baraangirisi ni baakayi bali ni khuutsya bapime buuleeyi akari e kumulaambo ni shiriimba shishiili aambi. 3Baraangirisi be mu shiriimba shishiili aambi ni kumulaambo, bali ni khuubukula ikhaafu imasoti ikharaambatsakakho namwe yaasutakho likyooki ta, 4bakiyile mu litila mwirome busa, mweesi bakhaalima namwe babyaalamo shishiindu ta. Nga boolileyo, bali ni khuukifuna likosi. 5Nio lwanyuma basoleeli be ba Levi, besyeende aambi, khulwekhuuba Umukasya Wele weefwe waabarobora nibo khuuba babaakaanisi, ni khuuwa tsikhabi mu lisina ly’Omukasya. Naluundi bali ni khuukhalawo bibiwaamba khu misaango kikikhali mitweela ta. 6Lwanyuma baraangirisi be mu shiriimba isho shishiili aambi ni kumulaambo, basaabile kamakhono kaabwe khu masoti isi bayilile mu litila bakifuna likosi. 7Awo balome bari, “Sishili khuli ifwe nibo babeerire umuundu yuno ta, naluundi sikhuboone n’umwiirire ta. 8Mukasya, yaakanila khukhwibiiyisa khwe babaandu boowo ba Isiraeli, beesi iwe wawonesa. Ukhabakhalalila khulwe khuufwa khw’omusaani yuno ta.” Ni musaambo iyo, kane shishoonako isho shiiyakhilwe. 9Nashiryo muli ni khukhwirusakho kumusaango kw’oyo isi beerire nga s’aali ni kumusaango ta. Khulwekhuuba muba mwaakholile shishikanibwa mu moni tsy’Omukasya.

Umukhasi isi banuula khukhwaama mu busoolo

10Umukasya Wele weefwe n’aaba waabaraangiriire khuutsya mu busoolo ni baasiku beenywe, ne aabawo babaandu beesi munuula mwaatsya ni nabo, 11ne mu baandu abo, mwaabonamo umukhaana umumiliwu ne waamwikoomba, unyala waamuyila khuuba umukhasi woowo. 12Umuyila ingo woowo, abekekho litsuune lyeewe, akhalekho ni kamatere, 13naluundi enyusemo tsingubo tseesi aabamo nga ni baamuwaamba, akwaare tsitsiindi. Nga waamenyile muntsu mwoowo khuumala kumweesi mutweela, naluundi nga waamalile khuulila paapawe ni maayi weewe, unyala waatsya ni naye wekyela umukhasi woowo, nawe wekyela umuseetsa weewe. 14Nga siwakhusangaasile ta, mulekhe atsye oosi isi akanile. Ukhamukulisa, namwe waamubirisa nga umuraambi woowo ta, khulwekhuuba waamumalilemo lukoosi lweewe.

Buusikha bw’omusoleeli umukiboole

15Umusaani n’aaba nga ali ni bakhasi babili, ne boombi baamusaalila babaana besiinde, ne siinga umusooleli umukiboole umweene aba uw’omukhasi isi akhakana ta. 16Nga imbuka yoolile iye khuukabila basoleeli beewe bye buusikha, s’ali ni khuukabila bye buusikha bw’omwaana w’omukhasi isi akhakana isi umwaana w’omukhasi isi akana ta. Buli ni khuutsya isi umwaana w’omukhasi isi akhakana ta. 17Ali ni khuufukiilila ari umwaana weewe uw’omukhasi isi akhakana ta, niye umukiboole, nashiryo amuwe buusikha bubwoolisamo kimiluundi kibili nga buusikha bweesi awa babaandi. Umwaana uyo niye uwokesanisa ari umusaani uyo ali ni lisaaye. Ikhabi iye khuuba umukiboole ili iyeewe.

Umusoleeli uminyaalila basaali

18N’oola umusaani ali n’umusooleli ukhakana waarekeeresa byeesi basaali beewe bamuboolela ta, 19basaali beewe bali ni khuumuwaamba bamuyile isi baraangirisi khu shilibwa she mu shiriimba. 20Baboolele baraangirisi bari, “Umwaana weefwe yuno ali ni bumiinyi, naluundi ali uwe shituluungu. S’akhuwulila ifwe ta. Ali ni kumuluungo naluundi ali umumeesi.” 21Abweene awo, basaani be mu shiriimba boosi bali ni khuumukhupa kamabaale bamwiire. Muli ni khuurusawo kumusaango kuno khukhwaama mu lituuli lyeenywe. Ba Isiraeli boosi nga baashiwuliilekho, kane babe ni khuurya.

Kamakaambila kakaakhali matweela ta

22Umusaani nga waasaalile kumusaango kwe kamaani, bali ni khuumwiira, kumulaambo kweewe bakusuunge khu kuusaala. 2321.23: Gal 3.13Mukhalekha kumulaambo kwaakona khu kuusaala ta. Muli ni khuumusiikha shifukhu sheene isho, khulwekhuuba uyo yeesi isi basuunga khu kuusaala aba ali ni shitsubo khukhwaama isi Umukasya Wele weefwe. Mukhareera imbikho khu liiloba lyeesi Umukasya Wele weefwe atsya khubawa ta.