Swahili Bible2

20

Bibiwaamba khu busoolo

1Ni muba nga mwibwakaale baasiku beenywe, mwaatsya mu busoolo ni nabo, ne mwaabona liiye liikali, nga lili ni tsiŋwaaŋwa ni kamakaali, mukharya ta. Khulwekhuuba Umukasya Wele weefwe uwakhwaamisa ifwe i Misiri, ali ni nanywe. 2Nga mukana khuutsya mu busoolo, umusaayi ali ni khukhwiimikha iburaangisi, akanikhe isi liiye lyoosi. 3Abalomele ari, “Ba Isiraeli, ni murekeerese! Shaleelo muli khuutsya khwibwakala baasiku beenywe. Ne mukhabamo ni khukhwiyembelela namwe mwaarya ta. Mukhanikina namwe mwaatitukha khukhwaama mu busoolo ta. 4Khulwekhuuba Umukasya Wele weefwe, ali niye utsya ni nanywe mu khusoolanisa baasiku beenywe, naluundi kane abayeete mubafuure.”

5“Baraangirisi be liiye bali ni khuureeba oba iliwo umusilikhale yeesi, uwamala khukhwombakha intsu imbya, ne nga ashiili khukiwa tsikhabi ta. Uyo ali ni khukhwiilayo ingo, khulwekhuuba anyala wafwiila mu busoolo, abawo umuundu ukuundi utsya khumenya muntsu yeewe. 6Nga iliwo umusaani uwabyaala kimizabibu, ne nga ashiili khukilyako ta, uyo naye ali ni khukhwiilayo ingo, khulwekhuuba anyala waafwiila mu busoolo, aabawo ukuundi ukilya. 7Ikhabawo uwaselela umukhaana, ne nga ashiili khumuyila ta? Khayo eleyo ingo weewe, khulwekhuuba anyala waafwiila mu busoolo, umuundu ukuundi waayila umukhaana uyo. 8Lwanyuma baraangirisi be liiye bareebe luundi bari, ‘Ikhabawo uyo uriire namwe uwiyembeleele? Uyo ni eleyo ingo, alekhe khukila babaandi nabo khuuba ni khuurya ta.’ 9Nga baaraangirisi baamalile khuukanikha isi liiye, lwanyuma barobore baabaraangirira.

10“Nga mushiili khukhwibwakala shiriimba ta, munyoowa mureebe babaamenyamo oba bakana khuusoolana, namwe bakana khukhwiwaanayo busa mu makhono keenywe. 11Ni bafukiilisa bekulawo bilibwa bye biriimba byaabwe, babaamenyamo boosi bali ni khukhwikela baraambi beenywe. 12Ne ni baloba khukhwiwaanayo mu makhono keenywe, baashuukha baabebwakala inywe, muli ni khukhwibotokhelela shiriimba isho. 13Nga Umukasya Wele weefwe waabasoolaniile mwaabafuurire, muli ni khukhwiira basaani babaalimo boosi. 14Bakhasi babaalimo ni babaana, ni bibyaayo ni bibiindu bibiramire mu shiriimba, ibyo muli ni khuubinuula mutsye ni nabyo. Bibiindu ibyo byoosi munyala mwaabiraambisa. 15Iyo niyo isaambo isi mubirisamo biriimba bibiili aleeyikho, bibikhali mu manaambo kakaabali aambi ta.

16“Ne mu biriimba bye mu manaambo keesi Umukasya Wele weenywe atsya khubawa inywe nga bye buusikha, mukhalekhamo shishiindu shoosi nga shilamu ta. 17Muli ni khuuboonakisila ilala boosi: Ba Hiti, ba Amori, ba Kanani, ba Perizi, ba Hivi, ba Yebusi. Muli ni khuukhola nga Umukasya Wele weefwe n’abalakiile. 18Ni mubalekha, kane babaleekele inywe bibiindu biibi, bye khukhwisaaya ba wele babaandi, muryo mube mwakholile bibyoonako isi Umukasya Wele weefwe.

19“Nga mwebotookheleele shiriimba mukana mushiwaambe, mukharemaka kimisaala kikiilimo mwaakimalamo ta. Khulwekhuuba munyala mwaalyakho bibyaamo byakyo. Kimisaala sikili babaandu ta, nashiryo mukhakiibwakala ta. 20Ne kimisaala kikiikhalikho bye khuulya ta, munyala mwaakirema mwaakiraambisa mu khwibotookhelela ukhwo.”