Swahili Bible2

2

Kimiiko kye khuukyeendaana mu mubiimbi

12.1: Bala 21.4Lwanyuma khwashuukha, khwawaamba intsila itsya kwe Inyaantsa Imbesemu, nga khubirira mu mubiimbi nga Umukasya n’akhulomela khuukhola. Khwamala kimiiko kimikali nga khumenya a lukiingi Seyiri. 2Khukhwoolisa Umukasya n’anomela ise ari, 3“Musa, inywe mwaamalile imbuka indeeyi naabi nga mumenya naluundi nga mwibotokhelela mu lukiingi luno. Ari ni muwaambe intsila mutsye kwe ngaaki. 42.4: Rak 36.8Lomela babaandu bano uri muli aambi khuubirira mu liloba lye balebe beenywe, babaana ba Esawu, babaamenya mu Seyiri. Nibo baariire khulweenywe. Ne muli ni khuushimanya muri, 5mbaawo khuubasoolanisa ta, khulwekhuuba ise singane imbawe inywe liloba lyaabwe nakhari ta, abe ikhaba lilyoola shikele shitweela shonyene. Khulwekhuuba ise naamala khaale khuuwa be nda ya Esawu liloba ilyo. 6Nga mubira mu liloba lyaabwe, muli ni khuusasulila biilyo byeesi babawa ni kameetsi keesi babawa. 7Khulwekhuuba Umukasya waamala khaale khuubawa inywe tsiikhabi mu buli byeesi mukhola byoosi. Imbuka iye kimiiko kamakhumi kane isi mumalile mu mubiimbi, Umukasya Wele weenywe wabeele ni nanywe naluundi mbaawo sheesi mwikoomba ta. Ikhaba ari Umukasya waamanyile ari inywe mulikho mubira mu mubiimbi kumuboofu kuno. 8Nashiryo khwabirira mu liloba lye baalebe beefwe be nda iya Esawu, babaamenya a lukiingi Seyiri, khwelooselayo khwaatsya. Khwaalekha khuraambisa lukuuto lwe Araba, lulwaama i Elasi khuutsya i Esiyoni Giberi ta.

“Khuryo khwashuukha khwaatsya kukuulola mu mubiimbi kwe Mowabu.

92.9: Rak 19.37“Kila Umukasya anomela ise ari, ‘Mukhasoyasoya namwe mwebwakala babaandu be mu Mowabu ta. Khulwekhuuba liloba lye Ari ilyo, ise naaliwa be lisaaye lya Loti khuuba busikha bwaabwe, nashiryo singane indibawe inywe ta.’”

Bikuuka bibyamenya aambi ni Kanaani

10Makiboole babaandu babaamenyatsaka mu liloba ilyo, abe babalaanga bari ba Emimu. Abe bali baakali, naluundi kimisaani kimileeyi naluundi kimiboofu, nga be lisaaye lya Anaki. 11Abe nibo ni ba Anaki, babaandu babalaanga bari ba Refayi, ne abe ba Mowabu babalaanga bari ba Emimu. 12Makiboole ikhaba ba Hori abe nabo bamenya a lukiingi Seyiri, ne be lisaaye lya Esawu baababukula liloba ilyo, baabeera baabamalawo, nibo beelawo. Baakhola nga ba Isiraeli ni baakhola khu baandu be khu liloba lyeesi Umukasya aabawa.

Ba Isiraeli bakhalisa Zeredi

13Kila Musa alomela babaandu ari, “Nashiryo ni mwinyukhe khukhalise litila lye Zeredi, khwambukhe khutsye. 142.14: Bala 14.28-35Mu mbuka isi khwakhalisilamo litila lye Zeredi, abe abirirewo kimiiko 38 khukhwaama nga ni khwaarura i Kadeshi Barineya. Khwatsya khwoola i Zeredi, nga basaani babaaba basoolani be kamaani boosi, abe baafwa baawawo, nga Umukasya n’aloma. 15Ilala, Umukasya aabawelela khuubawa shitaambiso khukhwoolisa boosi ni baafwa baawawo.

16“Ni nashiryo nga boosi baafwiile baaweelewo, 17Umukasya waanomela ise ari, 18‘Shaleelo muli ni khuubirira mu Mowabu, nga mubirira aambi ni shiriimba Ari, 192.19: Rak 19.38mutsye mu Amoni. Ne mukhasoyasoya, namwe mwebwakala babaandu babaamenya mu Amoni ta, khulwekhuuba ise singene imbukule liloba lyaabwe imbawe inywe ta. Liloba ilyo ise naaliwa lisaaye lya Loti, nga buusikha bwaabwe.’”

Kamanaambo kakaandi kakaamenya aambi mu Kanani

20(Liloba lino abe alala balilaanga bari lye ba Refa, khulwekhuuba nibo babaamenyatsakamo. Ne abe ba Amoni babalaanga bari ba Zamuzumi. 21Babeene bano abe bali babaandu baakali naabi, naluundi kili kimisaani kimiboofu, kimileeyi nga be lisaaye lya Anaki. Ne shitweela busa Umukasya waayeeta ba Amoni baabawula mu busoolo, baababukula liloba ilyo, nibo beliilisa shibala isho. 22Shaaba shitweela busa nga Umukasya n’ayeeta be lisaaye lya Esawu babaamenya mu Seyiri, baafuura ba Hori mu busoolo, waakila baawaamba liiloba ilyo, nibo babeene baarakikha khuulimenyamo, ni khukhwoolisa shifukhu she shaleelo. 23Ni musaambo niyo indweela, ba Kafatori babaama i Kafatori, ni baawula ba Avi mu busoolo, baawaamba liiloba lyaabwe baalimenyamo.)

Ba Isiraeli bakhalisa Arinoni

24Musa waalomela ba Isiraeli ari: “Nga khwaamalile khuubirira mu Mowabu khwaatsiile, Umukasya waakhulomela ifwe ari, ni mwiloosele ni lukyeendo, mukhalise luluutsi Arinoni. Tsya mwibwakale, khulwekhuuba ise inabanyalisa inywe khuusoolanisa naluundi muwule ba Heshiboni, n’umuyiinga waabwe Sihoni, umu Amori. 25Khukhwaama shifukhu she shaleelo, inakhola kamanaambo koosi khu shibala kabarye inywe naabi. Nga baababoonekho inywe, kane babe ni khuurya khuukali ni khukhwiyembeelela naabi.”

Ba Isiraeli bafuura Sihoni mu busoolo

(Khuubala 21.21-30)

26“Nashiryo nga khuli mu mubiimbi kwe Kedemosi, ise nasiindikha baarume baatsya isi Sihoni, umuyiinga uwe ba Heshiboni, nga ingana khumenye mu lukoosi. Namulomela ndi, 27‘N’ufukiilile ba Isiraeli babirirekho mu shibala shoowo. Kane khubirire busa khu ntsila, nga mbaawo sheesi khutiilakho mu shibala shoowo ta. 28Kane khusasulile biilyo byeesi kane khulye, ni kameetsi keesi kane khunywe. Akhali n’ukhulekhe khubirirekho busa mu liloba lyoowo. 29N’ukhulekhe khubire busa nga be lisaaye lya Esawu lilimenya mu Seyiri, ni ba Mowabu babaamenya mu Ari, ni baakhufukiilisa ifwe khwaabirira mu liloba lyaabwe. Khulikho khukana khukhalise luluutsi Yorudaani, khutsye khwoole khu liloba lyeesi Umukasya Wele weefwe akhuweele ifwe.’ 30Ne Sihoni umuyiinga uwe ba Heshiboni, waalekha khukhufukiilila ifwe khuubirira mu liloba lyeewe ta. Khulwekhuuba Umukasya Wele weefwe aakhola kumwoyo kweewe kwaaba kwe shikili, ari nio akhunyalise ifwe khuumuwula niye mu busoolo khu shifukhu isho.”

31Kila Umukasya anomela ise ari, “Bona ari ise naarakikhile khuuwaanayo Sihoni ni be mu shibala sheewe mu bunyala bweenywe. Nashiryo ni murakikhe khuushiwaamba, mushimenyemo. 32Lwanyuma umuyiinga Sihoni waarura mu shiriimba she Heshiboni ni liiye lyeewe, wakhwiibwakala ifwe nga khuli i Yahazi. 33Wele Umukasya weefwe waakhusoolanila, khwabafuura boosi mu busoolo. 34Khwawaamba biriimba byaabwe, naluundi khwaabyoonakisa. Ikhaba abe babaandu babaarama, oba basaani, bakhasi, ni babaana, boosi khwabeera, mbaawo na mutweela uwawona ta. 35Akhali tsikhaafu ni byeesi khwayaaya mu busoolo, byonyene byeesi ifwe khwasuta khwaatsya ni nabyo. 36Khukhwaamila ilala mu shiriimba she Aroeri, shishiili khu ndulo khwe luluutsi Arinoni, ni khukhwaamila mu shiriimba shishiili mu litila khuutsya khukhwoola i Gileyadi, mbaawo shiriimba shishakhukhaasa ifwe khuuwaamba ta. Umukasya aakhuyeeta ifwe khwaabiwaamba byoosi. 37Akhali liloba lye lisaaye lya Amoni, liliili khu ndulo khwe luluutsi Yaboko, nilyo lyeesi khukhengilamo ta. Ikhaba biriimba bye shibala she bikoongo ni neeyo yoosi isi Umukasya akhukaanisa ifwe khuutsya, niyo isi khukhaatsya ta.”