Swahili Bible2

10

Kamakaambila kumuluundi kwe khaabili

(She Lukyeendo 34.1-10)

Musa waalomela babaandu ari,

1“Mu mbuka iyo, Umukasya waanomela ise khuukhootsayo kamabaale kakaandi kabili, kakaali nga abe keesi nanyoowa khuukhootsa, ikhole isanduuku, lwanyuma iniine ni kamabaale ako khu lukiingi khu ngaaki. 2Waanomela ise ari niye atsya khurona khu mabaale ako bilomo byeesi abe aarona khu mabaale kakaanyoowa, keesi ise naaraaka. Nio lwanyuma ingare mu sanduuku.

3“Nashiryo ise naakhola isaanduuku khukhwaama mu kuusaala ku akasiya, naakhootsa ni kamabaale kabili, kakaali nga abe kakaanyoowa. Lwanyuma ise naaniina khu lukiingi nga naasutile kamabaale ako. 4Umukasya waarona khu mabaale ako kamakaambila likhumi, nga n’arona kumuluundi kukwanyoowa. Bino byaba bilomo ni bibyeene byeesi Umukasya aabakanikhila inywe nga n’akanikha isi lituuli, nga ali mu mulilo khu lukiingi. Umukasya waamaambisa ise kamakaambila ako. 5Ise naama khu lukiingi khu ngaaki, naakobola aasi, naawaamba kamakaambila ako, naakara mu sanduuku tsana isi nakhola, nga Umukasya n’andakila. Kashiili ni mu sanduuku umwo.

Khuufwa khwa Aroni

(Khuubala 20.22-29)

610.6: Bala 20.28; 33.38“Lwanyuma babaandu baakyeenda khukhwaama i Beyerosi Bene Yakani, khuutsya khukhwoola i Mosera. Nga bali ibweene iyo, Aroni waafwa, baamusiikha iyo. Umusoleeli weewe Eliyazaari, waamwiila mu bikele byeewe nga umusaayi. 7Khukhwaama awo, baakyeenda baatsya i Gudagoda. Khukhwaama awo, baatsya i Yotibasa, shibala shishiilimo tsintsitsi tsingali.”

Kumulimo kwe ba Levi

810.8: Bala 3.5-8Musa weloosela waaloma ari, “Lwanyuma lwayo, Umukasya waarobora be shikuuka sha Levi khuuba nibo babaasuta i sanduuku iye indakaano, ni khuuba basaayi babaawa babaandu tsikhabi. Bashiikhola buuraambi ubwo khukhwoolisa ni shaleelo. 9Ni nashiryo be shikuuka sha Levi singane bafune kumukabo kwe liiswa ta, khulwekhuuba Umukasya umweene niye akhaabawatsake sheesi bakana.”

Umukasya awa Musa byeesi aaloomba

(She Lukyeendo 34.9-10,27-29)

1010.10: Luky 34.28Musa weloosela waalomela ba Isiraeli ari, “Nga ni naba naayilile kamabaale kaabili khu lukiingi, naamalayo biifukhu kamakhumi kane ni biilo kamakhumi kane, nga abe ni namala kumuluundi kukwanyoowa. Kumuluundi kuno nakwo, Umukasya waamba ise sheesi namuloomba, waalekha khubahesa inywe ta. 11Ne akhali waanomela ise ari, ‘Musa, raangirira babaandu bano, ubayile batsye bawaambe shibala sheesi ise netsubila bakuuka baabwe, indi ikhaawe lisaaye lyaabwe.’

Sheesi Umukasya akana ba Isiraeli bakhole

12“Ne ari ba Isiraeli, sheesi Umukasya abakanakho shili shiri: Mwisaayatsake Umukasya Wele weenywe, muloondelele byeesi abalakila, mumukane, naluundi mumwakaanise niye ni kimyooyo kyeenywe kyoosi, ni buulamu bweenywe bwoosi. 13Naluundi, muloondelele kamakaambila keewe, ni biilakilo byeewe, byeesi ise imbaweele inywe, khukhwaama shaleelo ni khukhwoolisa ni mufwa. 14Muli ni khuushimanya muri likulu, ni shibala, ni n’ebyo byoosi bibiili mu shibala, bili by’Omukasya, Wele weefwe. 15Ne shitweela busa, Umukasya waakana bakuuka beenywe, kila lwanyuma alekha kamanaambo koosi, waarobora lisaaye lye bakuuka beenywe.

16“Nashiryo, ari ni mulekhe khuumiinyaalila Umukasya. 1710.17: 1 Tim 6.15; Bimb 17.14; 19.16; Bur 10.34; Roma 2.11; Gal 2.6; Efes 6.9Khulwekhuuba Umukasya Wele weefwe, ali Wele uwe ba wele, naluundi ali Umukasya uwe bakasya. Ali uwe angaaki, naluundi uwe kamaani, ukhola bye kamakaanga, uwamanya khuukhala kimisaango, naluundi ukhalya iwoongo ta. 18Umukasya waamanya khuutseeta banamulekhwa ni baafuubi. Enaanayo kh’ubeetswa, nga abawa biilyo ni bikwaaro. 19Muli ni khuukana babeetswa nga mubenaanakho, khulwekhuuba nanywe mwaba babeetswa mu Misiri.

20“Nashiryo muli ni khukhwisaaya Umukasya Wele weefwe, mumwakaanise niye yenyene nga mumwiyomisilakho. Ikhaba byeesi musuubisa, muli ni khuuraambisa lisiina lyeewe. 21Ali Wele weenywe, niye yenyene isi muli ni khuuruuya. Khulwekhuuba niye waabakholeele inywe bibiindu bye kamakaanga, byeesi mwabeene mwiboonelekho ni tsiimoni tsyeenywe. 2210.22 a Rak 46.27; b: Rak 15.5; 22.17Isi bakuuka beenywe baatsiila khuumenya mu Misiri, abe bali babaandu kamakhumi musaafu bonyene. Ne bona Umukasya Wele weefwe waabawa inywe tsikhabi, ari muli busa nga tsinieniesi tse khwikulu.”