Swahili.Bible
Bible Society of Kenya
Bible Society of Kenya
Madaraka, Nairobi
PO Box 72983
Tel: 254 20602807
E-mail: info@biblesociety-kenya.org
9
Dawudi akholela Mefibosesi biilayi
19.1: 1 Sam 20.15-17Shifukhu shitweela Dawudi waareeba ari, “Manya ikhabayo ikhaba umuundu mutweela, khu be lisaaye lya Saulo, uwaramawo, ise imukholele biilayi khu lwa Yonasani?” 2Ari, abe iliwo mutweela khu baraambi ba Dawudi, nga bamulaanga bari Ziba. Dawudi waalakila ari balaange Ziba uyo, eetse isi ali. Nga weetsile, kila Dawudi amureeba ari, “Iwe niye isi balaanga bari Ziba?” Welamo ari, “Uwe lukoosi, niye ise.”
39.3: 2 Sam 4.4Umuyiinga waamureeba ari, “Iliyo umuundu yeesi uwe muunda iya Saulo ushiiliwo umulamu? Abe nga aliwo, ise ingana imukholele bibiindu biilayi.”
Ziba weelamo ari, “Iliyo umwaana uwa Yonasani mutweela; ne waalemala bikele.”
4Umuyiinga waareeba ari, “Ali waheena?”
Ziba waamuboolela ari, “Amenya ni Makiri, umwaana uwa Amiyeli, mu shiifwo shilaangibwa shiri Lodebari.”
5Umuyiinga Dawudi waarumanisa babaandu khuutsya i Lodebari, muungo mwa Makiri, umwaana uwa Amiyeli, khuureera Mefibosesi. 6Kila Mefibosesi umwaana uwa Yonasani, nga ali umwitsukhulu uwa Saulo waayilibwa isi Dawudi. Nga wolile isi Dawudi, wenamisa kumurwe kweewe aasi, nga esamo umuyiinga shiriifwa. Dawudi waamureeba ari, “Iwe niye Mefibosesi?” Naye welamo ari, “Niye ise, Umuyiinga.”
7Kila Dawudi amulomela ari, “Ukhaba ni khukhwiyembelela khwoosi ta. Khulwekhubeela indi khuutsya khukhukholela iwe bibiindu biilayi, khulwa paapa woowo Yonasani. Kane ikhukobosele liswa lyoosi lilyaba lya kuuka woowo Saulo. Naluundi, kane busheele khulyatsake ni nase khu shikabilo shitweela she biilyo.” 8Kila Mefibosesi enamisa luundi kumurwe nga esamo umuyiinga lukoosi. Kila alomela umuyiinga ari, “Ne ise niye naanu ne untsinaanekho? Ise ndi busa nga imbwa iyamala khaale khuufwa.”
9Lwanyuma umuyiinga waalaanga Ziba, uwabakho umwakaanisi uwa Saulo, kila amulomela ari, “Khukhwaama Mefibosesi n’aali umwitsukhulu uwa Saulo, kane ise imukoboseleyo buli shitweela shishaba sha Saulo ni lisaaye lyeewe. 10Ari, iwe ni babaana boowo likhumi na baraano, ni baraambi boowo kamakhumi kabili, mukhaamuraambire niye. Mukhaamulimile biilyo, naluundi mumukesele, nio be intsu iya Saulo ni baraambi beewe babe ni biilyo. Ne Mefibosesi, umwitsukhulu uwa Saulo, kane alyaatsake khu shikabilo shitweela she biilyo, ni nase.”
11Kila Ziba alomela umuyiinga ari, “Uwe lukoosi, kane ise ikhole ibyo byoosi byeesi iwe unomele ise khuukhola.”
Nashiryo, Mefibosesi waaliilatsakila bilyo atweela n’umuyiinga Dawudi, waaba busa nga mutweela khu baana b’omuyiinga. 12Mefibosesi aaba n’umwaana umusoleeli isi balaanga bari Mika.
Abo boosi abe babaamenya muntsu iya Ziba, beekela baraambi ba Mefibosesi. 13Nashiryo, Mefibosesi waamenya mu Yerusalemu. Ikhaba nga abe waalemala bikele byoombi, ne nga abe aliila biilyo atweela n’umuyiinga.