Swahili Bible2

7

Buurume khukhwaama isi Umukasya

(1 Bye Kimiboolo 17.1-15)

1Imbuka ni yoola, umuyiinga Dawudi wengisa lubili lweewe lushaakha. Umukasya waamuyeeta buyiinga bweewe bwaaba mu lukoosi, nga mbaawo baasiku babashiiliwo ta. 2Kila shifukhu shitweela, umuyiinga Dawudi n’aaba nga alikho akanikha isi umuŋoosi Nasani, waalomela Nasani ari, “Bona ise imenya muntsu imiliwu, bakyombakhila tsimbaawo tsye kuusaala kedali. Ne bona Isaanduuku y’Omukasya imenya mu lisari.”

3Nasani waalomela umuyiinga ari, “Khukhwaama Umukasya n’aali ni nawe, n’ukhole sheesi wambaasa mu mwoyo kwoowo.”

4Ne mu shilo sheene isho, ilomo y’Omukasya yoolelela Nasani, nga iloma iri, 5“Tsya uboolele umwakaanisi wase Dawudi uri, ‘Umukasya alikho areeba ari, iwe niye uuli ni khukhuuntsombakhila ise intsu iye khuumenyamo?’ 6Khukhwaama khu shifukhu sheesi ise narusira ba Isiraeli khukhwaama mu Misiri, ise sinamenyatsakakho mu ntsu ta. Buli isi intsya, ise imenya mu lisari. 7Mu bifwo byoosi mweesi ise imbeele nga intsya ni ba Isiraeli, ise sinalomelakho ikhaba bawuli baabwe, beesi ise narawo khuuba babaayi be babaandu ndi, ‘Ni muntsombakhile intsu nga muraambisa kimisaala kedali ta.’ 8Nashiryo tsya uboolele umwakaanisi wase Dawudi uri, ‘Ise Umukasya uwe kamahe, niye uwakhurusa mu kyeewa nga waayisa kamakheese, indi ube umuraangirisi we babaandu baase, ba Isiraeli. 9Ise nabeele ni nawe buli aandu oosi isi utsya, naluundi nayiira baasiku boowo nga wamweene ubona. Kane ise ikhunyalise iwe khuuba umuundu umanyikhaane naabi, nga abo babaamala khaale khumanyikhana mu shibala shoosi. 10Ise naamalile khaale khuuwa babaandu baase ba Isiraeli shiifwo she khuumenyamo, nga bamenya mu lukoosi. Mbaawo shikane shibariiseriise luundi ta, namwe kamanaambo kakaandi singene kabebwaakale, nga ni kaakholatsaka amataayi, 11mu mbuka isi baakayi baabeela nga nibo baawuli be ba Isiraeli ta. Naakamisile baasiku boowo boosi, singene bakhwibwakale luundi ta. Ni khuuminyisilakho ilala, Umukasya alikho ashiŋaŋasa ari, be lisaaye lyoowo baliloosela khuuba bayiinga. 127.12: Zab 89.3,4; 132.11; Yok 7.42; Bur 2.30Nga iwe waamalile khuufwa, naluundi nga baakhusikhile mu biliindwa bye bakuuka boowo, ise ikhaarobore mutweela khu baana boowo, abe umuyiinga. Buyiinga bweewe buliba bwe kamaani. 13Buyiinga bweewe bulibawo biilo ni biilo. Umweeneyo niye ukhaantsombakhile ise Lisaayilo Likhulu. 147.14: Zab 89.26,27; 2 Kor 6.18; Heb 1.5Ise ikhaabe nga paapa weewe, ni naye aliiba nga umwaana uwase. N’akhola bibyoonako, samweene ikhaamukhomakekho, nga umusaali n’akhomaka khu mwaana. Ikharaambise babaandu babaandi, babe busa nga tsikhoba tsitsimunyweekha. 15Ne ise sikhaakamise indakaano isi imba naakholile ni naye, nga ni naakamisa iyo isi abe namala khukhola ni Saulo, uwaba umuyiinga nga iwe ushiili khwiitsawo ta. 167.16: Zab 89.36,37Ise ikhaaliindatsake lisaaye lyoowo ni buyiinga ubwo, nio akile be lisaaye lyoowo babe bayiinga, biilo ni biilo.’ ”

17Nasani waatsya waaboolela Dawudi ibyo byoosi byeesi aafuna nga buurume khukhwaama isi Umukasya.

Dawudi asiima Umukasya

(1 Bye Kimiboolo 17.16-27)

18Lwanyuma umuyiinga Dawudi wengila mu lisari, waatsya wekhala aasi aambi n’Isanduuku y’Omukasya, waaloomba ari, “O Umukasya Wele, ne ise niye naanu? Ni be muungo mwase nibo banaanu, shikilile iwe waakhureera wakhwoolisa khu mbuka ifwaana nga yino iri? 19Ate shishiindu shino shikyeekhe naabi mu moni tsoowo, O Umukasya Wele. Iwe wasuubisile uri kane ukhole ni bibiindu bibiminyisakho awo. Naluundi uri lisaaye ly’omwakaanisi woowo kane libe lye kamaani, khuumala imbuka indeeyi, ni mu miboolo kikiitsa. Shino shili shiilakilo isi babaandu boosi, O Umukasya! 20Shiina shishiindi sheesi ise nga Dawudi inyala khuukanikha isi iwe! Lwekhuuba iwe Umukasya Wele, waayimanya ise, umwakaanisi woowo. 21Iwe wakholile shishiindu she kamaani shiri khusintsiila khu ntsambaasa ye kumwoyo kwoowo, naluundi bona washintsokesanisa ise umwakaanisi woowo khuushimanya, khulwekhuuba iwe ukana khuuloondelela bibiili mu ndakaano yoowo. 22Ni nashiryo, O Umukasya Wele, uli umukhulu, mbaawo wele ukuundi uuli nga iwe ta, naluundi mbaawo uuli Wele ta, akhali iwe wenyene. Shino shiloondekhana ni bibiindu byeesi ifwe khuwuliile ni kamaru keefwe. 237.23: Maka 4.34Mbaawo linaambo liliindi khu shibala khuno, liliili nga lye ba Isiraeli, lyeesi Umukasya aatsya waamusa khukhwaama mu Misiri, ari libe lilyeewe ta. Iwe wamanyikhana naabi khulwa shino, khulwekhuuba waraambisa bye kamakaanga ni bibiyaangisa, nga utimisa kamanaambo kakaandi ni ba wele baabwe khuurura mu Kanani, nio akile babaandu boowo bamenyemo. 24Umukasya Wele, iwe warobora babaandu ba Isiraeli khuuba baboowo biilo ni biilo, naluundi iwe waayikela Wele waabwe. 25Ni nashiryo ari Umukasya Wele, n’ukhole ibyo byeesi iwe wasuubisa umwakaanisi woowo, ni be lisaaye lyeewe biilo ni biilo. 26Ni lisina lyoowo kane limanyikhane buli aandu, nga babaandu baloma bari, ‘Umukasya uwe kamahe, ali niye Wele uwula ba Isiraeli, ni be lisaaye lya Dawudi bali bayiinga beesi niye umweene aroboore.’ 27Khu lwoowo, O Umukasya uwe kamahe, Wele wa Isiraeli, abe ikhaba nga ise ndi busa umwakaanisi woowo, ne bona naafunile bunyindaalifu bwe khuuloomba musaambo yino, khulwekhuuba iwe wamweene waamalile khaale khurumburira umwakaanisi woowo byeesi utsya khukhola. 28Ni naari, O Umukasya, iwe uli Wele, naluundi byeesi iwe uloma bili bya ŋali. Iwe wasubisile umwakaanisi woowo bibiindu biilayi bino. 29Nashiryo ise ikhuloomba ndi khali uweele lisaaye ly’omwakaanisi woowo tsikhabi, nio linyalisa khukhwilooselayo biilo ni biilo. Khulwekhuuba iwe waasuubisile khaale, naluundi ise namanyile ndi kane uwe lisaaye lyase tsiikhabi, biilo ni biilo.”