Swahili Bible2

24

Dawudi abala babaandu

(1 Bye Kimiboolo 21.1-6)

1Imbuka ni yoola ndi luundi, Umukasya waakhalalila ba Isiraeli. Nashiryo wekhila mu Dawudi, waafuna shishambaaso she khuubala babaandu mu Isiraeli ni mu Yuda. 2Nashiryo Dawudi waalomela Yowabu ni baraangirisi be kamahe ari, “Ni mutsye mu bikuuka bye mu Isiraeli byoosi, khukhwaamila i Dani khukhwoolesa i Basisheba, mubale babaandu. Khulwekhuuba ise ingana imanye buukali bwaabwe.”

3Yowabu weelamo umuyiinga ari, “Ise inoomba indi khali Umukasya Wele woowo akhuweele baselikhale babaandi babaafuurisawo kimiluundi shitoondo shitweela. Naluundi khali upilewo khabili, nio ubona bino byoosi. Ne shiina kila iwe ukana khuukhola shishiindu nga shino shiri?”

4Ne umuyiinga waabalakila khuukhola nga niye abe ni aloma. Nashiryo Yowabu, ni baraangirisi be liiye baarura isi umuyiinga, baatsya baarakikha khuubala babaandu. 5Baakhalisa luluutsi Yorudaani, baarakikhira i Aroweri, ni shiriimba abe shishiili akari we litila lye luluutsi ulwo. Khukhwaamila abweene awo, baatsya mu Gadi, beloosela baatsya khukhwoola i Yazeri. 6Baatsya boola i Gileyadi, ni Kadeshi, shishiili mu Siriya. Baamawo baatsya i Dani, Iyoni, ni khuulola i Sidoni, 7boola mu shiriimba Tuulo abe shishiili mu kutikiiyi, baatsya mu biriimba bye ba Hivi ni ba Kanaani. Ikhumaliilisa, baatsya i Basisheba, abe shishiili mu mubiimbi kwe mu Yuda. 8Lwanyuma lwe khukhwibotookhelela buyiinga bwoosi, kila bakobolayo i Yerusalemu. Shabayilila kimyeesi syeenda ni bifukhu kamakhumi kabili, khuukhola buraambi ubwo bwoosi.

9Kila Yowabu atsya khuboolela Dawudi ari, “Mu Isiraeli mulimo basaani basoolani baboola kimyeeka shinaane (800,000). Ne mu Yuda boola kimyeeka kiraano (500,000).”

Umukasya awa Dawudi shitaambiso

(1 Bye Kimiboolo 21.7-17)

10Ne lwanyuma lwe khuubala babaandu, Dawudi waashibona nga kumusaango kwaamufuurire. Kila alomela Umukasya ari, “Mukasya, ise naamanyile ndi sheesi ikholile shili she bubwoonaki, ni kumusaango ise kwaafuurire. Ne Mukasya, ise ndikho inoomba ndi untsiyakhile bubwoonaki bwase; khulwekhuuba nakholeele ibyo mu busilu.”

11Shifukhu shisheelakho, Dawudi aatsya khwinyukha kumutishinyi abe Umukasya waakanikhile khaale isi umuŋoosi Gadi, nga amulomela ari, 12“Tsya ulomele Dawudi uri, ‘Umukasya waareerewo bibiindu bitaru; loondakho shitweela sheesi anakhukhola khusiiwe.’ ” 13Nashiryo Gadi waatsya waaboolela Dawudi ari, “Khu biindu bitaru bino, iwe uli ni khuuroborakho isaambo indweela isi Umukasya ali ni khuukhuwamo iwe shitaambiso: ukana intsala ilye mu buyiinga bwoowo khuumala kimiiko kitaru? Namwe ukana baasiku boowo bakhubwakale, bakhufuuratsake iwe mu busoolo khuumala kimyeesi kitaru? Namwe ukana ibewo buulwaale buubi naabi bumaamile buyiinga bwoowo? Ari iwe khalawo shitweela, ise niileyo intsye imboolele Wele, uwusiindikhile ise isi uli.”

14Lwanyuma Dawudi waalomela Gadi ari, “Ise ndi mu mutaambo kumukali naabi. Ne khayo Umukasya abe niye ukhuwa ifwe shitaambiso, ilekhe khuuba babaandu basheefwe ta. Khulwekhuuba Umukasya ali ni shiisa shiikali naabi.”

15Nashiryo kumutikhinyi ukwo, Umukasya waasiindikha buulwaale buubi naabi bwamaamila babaandu boosi mu Isiraeli, khukhwaamila i Dani khuutsya khwoola i Basisheba. Buno bweera babaandu baboola kimikaanda musaafu (70,000). 16Nga abe malayika wenyusile kumukhono kweewe ali aambi khukhwoonakisa Yerusalemu, Umukasya waabona ari waakholile shishiindu shiibi naabi, wesonesa waalekhelaawo. Kila alomela malayika uyo ari, “Lekhela awo! Ukheloosela ta!” Malayika uyo uw’Omukasya, abe wemikhile aambi ni lulwaanyi lweesi Arawuna, umu Yebusi, abe awuulila biilyo byeewe.

17Nga Dawudi waaboone malayika uyo alikho eera babaandu, kila alomela Umukasya ari, “Ise niye ukholile she bubwoonaki. Ne babaandu bano bali busa nga kamasheese, mbaawo sheesi boonakile ta. N’umbe ise ni be muungo mwase shitaambiso, ulekhe abo babe.”

18Kila khu shifukhu isho, Gadi atsya isi Dawudi, amulomela ari, “N’uutsye khu liwuulilo lya Arawuna, umu Yebusi, wombakhileyo Umukasya shisheeso.” 19Nashiryo Dawudi waatsya nga Umukasya n’alakila umuŋoosi Gadi.

20Arawuna n’enyusa tsiimoni, waabona umuyiinga Dawudi ni basilikhale beewe nga balikho beetsa isi ali. Arawuna waatsya isi umuyiinga, waamwiisamo lukoosi nga amwinamila aasi. 21Kila areeba umuyiinga ari, “Umuyiinga, manya ikhabawo ilomo ikhureerire isi ise?” Dawudi weelamo ari, “Ise neetsile khuukula liwulilo lyoowo, nio akile nombakhilekho Umukasya shisheeso, shino shikile buulwaale buubi buno bwaakame.”

22Kila Arawuna alomela Dawudi ari, “Umuyiinga, iwe nuyile shoosi sheesi ukana. Bona naakhuweele ni tsiwuunwa tsye khuuraambisa nga isaayilo intsoshe. Bisaala bye khuuwuulila ni kamatsooki, kane uraambise nga tsiikhu. 23Umuyiinga, iwe n’uyile ibyo byeesi ise ikhuweele. Khali Umukasya Wele woowo abyakaniile.”

24Ne Dawudi waamwiilamo ari, “Seshinyalikha ta. Ise ndi ni khuukhusasula iwe kamapeesa kaabyo kameene. Ise sinyala nawaanayo bibiindu byeesi ifunile busa, nga tsisaayilo tsintsoshe isi Umukasya Wele wase ta.” Nashiryo Dawudi waasasulila liwuulilo ni bibyaayo ibyo, atweela kamapeesa kakoola ifeetsa kamakhumi kataru. 25Lwanyuma Dawudi wombakhila Umukasya shisheeso, wawaanilakho tsisaayilo tsintsoshe ni tsitsireera lukoosi. Nashiryo Umukasya waawulila khuuloomba khwe babaandu be mu Isiraeli, waakamisa buulwaale ubwo.