Swahili Bible2

22

Dawudi embela Umukasya kumweenya

(Tsizabuli 18.1-50)

1Lwanyuma lw’Omukasya khuuwonesa Dawudi khukhwaama khu baasiku beewe boosi, ne khufuurira ilala khukhwaama khu Saulo, weembela Umukasya kumweenya. 2Abe kumweenya kuloma kuri,

Umukasya iwe uli niye umutseeti wase, naluundi iwe niye lumako mweesi ise nibisa

iwe niye uwumbonesa ise khukhwaama khu baasiku baase.

3Iwe niye umutseeti wase, mweesi ise niibisa,

iwe niye ingabo yase,

naluundi she busoolo shase she kamaani shishimbonesa ise,

iwe niye luumako mweesi ise niibisa

iwe niye umuwonesi wase,

uwumbonesa khukhwaama khu be bisayuumba.

4Mukasya, ise ikhuruuya iwe,

khulwekhuuba ise nga ni naloomba isi uli,

iwe wambonesa ise khukhwaama khu baasiku baase.

5Khulwekhuuba abe ise noleele ilala khuufwa,

nga khwaantsibotokheleele nga inyaantsa ni yilyeebula,

abe khukana khuumile ise nga kameetsi kakaasalasaale.

6Kimireko ky’emakoombe abe kyamaambile ise,

abe kyaantsiboweleele kyaantsomeelekho.

7Ne nga indi mu ngunyi ingali,

ise naalilila Umukasya Wele wase.

Nga ali iyo mu Lisaayilo likhulu,

Umukasya waawulila likono lyase,

waantsilamo khuuloomba khwase.

8Shibala shaanikina naluundi shaatengaala;

sheesisiikha, khulwekhuuba abe iwe, Umukasya, waakhalaale.

9Lisuusi lyaabonekha nga liniina mu ngaaki.

Tsinimi tsye kumulilo kukulyeebukha,

tsyaaniina nga tsyaama mukhanwa mweewe.

10Iwe wabayuula likulu weekha aasi,

nga waasaambile bikele byoowo khu mifuumbi kikibuusile,

nga kamamali ti.

11Iwe weekha nga wekhaale khu bakeruubi;

imbewo yaaba niyo tsindaha tsyoowo.

12Shishiilima shakhwibotokhelela iwe nga lisari;

shishiilima she kamafuumbi kakaareera ifula.

13Luheni lwe ifula lulukhwinyoowa iwe ibweeni,

lwatsasa lwakhosa khu shibala shoosi.

14Mukasya, Wele uwe mu ngaaki naabi,

likono lyoowo lyakuulila khukhwaama mwikulu,

lyawulilikhana.

15Iwe wasalanisa baasiku boowo,

nga uraambisa buyiingo bwe luheni.

16Iwe wakhookhela mu nyaantsa,

kimyaanda kye kameetsi aasi mwiiloba kyaabonekha.

Iwe ni warafuwa naabi,

shibala shatengaala khukhwoolesa khu mili kyasho.

17Iwe weekha aasi khukhwaama mwikulu mu ngaaki,

wamaamba ise, wantsinyusa aasi mu nyaantsa.

18Iwe wambonesa ise khukhwaama khu baasiku,

abe babaakhaangana ise nakhari ta,

naluundi abe babaali ni kamaani khukhuuminyisa ise.

19Lweesi bihangafu byangwiilakho,

baasiku baase beetsa baantsibwakala,

ne iwe Mukasya, waba ingabo yase.

20Nga bangunyiile ise mu shifwo shitweela,

Mukasya, iwe wambonesa,

khulwekhuuba ungana ise.

21Mukasya, iwe uli umulayi isi ise,

khulwekhuuba ise ikhola bibiindu biilayi;

naluundi iwe umba ise shiwaanwa,

khulwekhuuba ise siindikho ni kumusaango ta.

22Khulwekhuuba ise inondelela byeesi iwe uloma,

naluundi sinakhwantsukhakho iwe, Wele wase,

natsya naakhola bye bubwoonaki ta.

23Khulwekhuuba ise nawaamba indeekela yoowo,

naluundi sinayantsukhakho bilakilo byoowo ta.

24Mu moni tsyoowo ise siindikho ni kumusaango ta,

naluundi ise sinaayiwaambila mu byoonako ta.

25Nashiryo Umukasya waayimba ise shiwaanwa,

khulwekhuuba ise ikhola bibiindu biilayi;

khulwekhuuba ise siindikho ni kumusaango mu moni tsyoowo ta.

26Iwe busheele uli umwiyikinwa,

isi abo babaakhukana iwe;

iwe uli uwe shiisa,

isi abo babaakhalikho ni bibyoonako ta.

27Abo babaali bakhosefu,

iwe ubokesanisa bukhosefu bwoowo;

ne abo babaali baboonaki,

iwe ubakhalila kamakesi ke angaaki.

28Abo babaali babewombeekha,

iwe ubawonesa khukhwaama mu bihangafu;

ne abo babeniinisa angaaki,

iwe uweentsa kimikhoosi kye khubaswaasa

29Mukasya, Wele weefwe,

iwe uli niye itaala,

iyimulikhila ise nga indi mu shiilima.

30Wele wase, iwe uwunjeeta ise naawula kamahe kamakali,

iwe niye ukila ise nawaamba biriimba.

31Wele, kimikhoosi kyoowo kili kya ŋali,

ni byeesi iwe uloma bili bituufu.

Iwe uli ingabo iye babaandu

babaatima isi iwe bari nio ubatseete.

32Khulwekhuuba mbaawo ukuundi uuli Wele ta,

akhali Umukasya yeenyene.

Iwe weenyene niye uuli lulwaanda!

33Wele yeenyene niye uuli luumako lwase lwe kamaani,

iwe niye ukila ise naamenya mu lukoosi.

3422.34: Habk 3.19Iwe niye ukila ise naaba ni bikele bibiitima nga bye ikhisi,

naluundi iwe niye ukila ise neema khu bikoongo khu ngaaki.

35Iwe niye uwundeekela ise isaambo iye khusoolana,

ni khuuraambisa buyiingo bwa buroonzi.

36Iwe niye uwaamba ise ingabo iye buwonesi,

ni buyeeti bwoowo bwaakila ise naaba uwe angaaki.

37Iwe niye uwaamba ise kumukhoosi kumubalaayi kwe khuukeendelakho,

nashiryo ise naalekha khukhwituya niikhupa aasi ta.

38Ise nanyalisa khutimisa baasiku baase

khukhwoolesa nabawaamba,

nakobola nga naamalile khubeera boosi.

39Ise nabeera boosi naabamalawo;

nabawunaka boosi ni luurima,

baakwa aasi mu bikele byase.

40Khulwekhuuba iwe waamba ise kamaani ke khuusoolana;

iwe waakila ise nafuura abo babaantsibwakala ise.

41Iwe niye uwaakila baasiku baase baatitukha baatsya;

naluundi ise nanyalisa khukhwiira baasiku baase.

42Imbo balila, bataamba ubayeeta;

imbo balilila Umukasya,

ne waalekha khubeelamo ta.

43Nabafuura, nafwaana busa usha lifukhuulu,

nabakhaandakilila nga ukhaandakilila liitosi khu ntsila.

44Iwe wambonesa ise khukhwaama

mu khusoolana ni kamanaambo;

iwe wantsikesa ise khuuba umuraangirisi uwe kamanaambo;

keekela baakulwa baase.

45Kamanaambo kakaandi keetsa isi ise nga kaafulila aasi busa;

khaangu akho baaloondelela byeesi ise inoma.

46Banaambo abo kamaani kaabawamo,

beetsa nga banikina busa

khukhwaama mu biriimba byaabwe bibiilikho kamatikiiyi.

47Mukasya wase, iwe uli uliwo umulamu!

Kane ikhuruuye iwe!

Wele wase kane ise ikhwisemo iwe shiriifwa,

khulwekhuuba iwe niye buwonesi bwase.

48Iwe niye uwaakila ise nelihaasa khu baasiku baase,

iwe wara kamanaambo aasi e buwuli bwase.

49Iwe wambonesa ise khukhwaama mu baasiku baase,

waaniinisa ise angaaki e baasiku baase,

iwe wambonesa ise khukhwaama khu baasiku baase.

5022.50: Roma 15.9Mukasya, ni khulwe ilomo iyo,

kane ise ikhuruuye naabi,

naluundi ikhwimbile iwe naabi,

nga ndi mu manaambo koosi.

51Iwe niye ukila ise umuyiinga,

umurobore woowo,

naafuura mu busoolo bwe kamaani.

Iwe wokesanisa khuukana khukhuukhakama ta,

isi Dawudi ni lisaaye lyeewe, biilo ni biilo.