Swahili Bible2

20

Sheba ashuukha khu Dawudi

120.1: 1 Bay 12.16; 2 Kim 10.16Ari, yabawo umusaani mutweela bari Sheba, umwaana wa Bikiri, uwe mu shikuuka sha Benyamini, uwasaala kamakhuuwa. Umusaani yuno waafuura ifulumbeti, waabusaasa babaandu boosi, kila abalomela ari, “Ba Isiraeli, ifwe sikhulimo ni buulebe ni Dawudi, umwaana uwa Yese, namwe khwaabakho ni naye shishiindu she buusikha ta! Buli mutweela n’atsye ingo weewe!” 2Nashiryo babaandu abe babaama mu Isiraeli baalekhela awo khuuloonda khu Dawudi, baashuukha baaloonda khu Sheba, umwaana uwa Bikiri. Ne babaandu khukhwaama mu Yuda, baarama atweela ni Dawudi, baatsya ni naye khukhwaama khu luutsi Yorudaani khukhwoolesa mu Yerusalemu.

Bakhasi be antsye ba Dawudi, liikhumi

320.3: 2 Sam 16.22Dawudi abe waalekha bakhasi beewe be antsye likhumi muntsu yeewe i Yerusalemu. Nga akobola waabayila muntsu ikiindi busa, waabarakho basilikhale khuubaliinda. Ikhaba nga abe abawa buli sheesi bakana, ne abe satsyayo wetubaasa ni nabo ta. Baamenya busa iyo baryo buulamu bwaabwe bwoosi, nga banamulekhwa.

Liiye liloonda khu Sheba

4Lwanyuma Dawudi waalomela Amasa ari, “Mu biifukhu bitaru, ingana iwe ulaange liiye lya Yuda lyoosi libe ano, nga nawe ulikho.” 5Nashiryo Amasa waatsya khulaanga liiye lye mu Yuda lyoosi. Ne waayila imbuka indeeyi khuuminyisa mu bifukhu bitaru. 6Kila Dawudi alomela Abishayi ari, “Shibonekhana Sheba, umwaana uwa Bikiri, anakhuwa ifwe bihangafu khufuurisakho ni byeesi Abisalomu akhuwa. Yangalamo basilikhale babaaminyisa buulayi, mumuloondekho. Khukhamulekha wawaamba biriimba bibilikho kamatikiiyi ta, khulwekhuuba anakhureerera bihangafu.”

7Nashiryo Abishayi nga ali ni Yowabu, ni basilikhale babaliinda Dawudi, ni basilikhale babaandi, baama i Yerusalemu nga bakana bawaambe Sheba. 8Nga batsiile boolile khu libaale liboofu liliili i Gibiyoni, Amasa waatsya khubakaanana. Ari Yowabu abe wakwaarire bikwaaro bye basilikhale, nga ali ni luurima, walwiisabikhile khu musipi mu shikuute. Yowabu waasikula luurima, lwaarurayo lwaakwa ibulafu.

9Yowabu waalomela Amasa ari, “Waandaayase, uli uryeena?” Kila Yowabu ayila kumukhono kumulayi awaamba bunwaanwa bwa Amasa, bari nio amukheese nga amukwa mu shifuba. 10Ne Amasa waalekha khubona luurima abe luluuli mu mukhono kwa Yowabu ta. Nashiryo, Yowabu waamwikuba muunda lutweela lwonyene, bye muunda byaarura, waakwa aasi waafwa na khuufwa.

Lwanyuma Yowabu ni yaaya weewe Abishayi, baatsya khuloonda khu Sheba, umwaana uwa Bikiri. 11Kila mutweela khu basilikhale babaaba ni Yowabu eema awo isi Amasa, akuukuula nga aloma ari, “Uyo yeesi ukana Yowabu, naluundi uwinaanayo isi Dawudi, n’aloonde khu Yowabu.”

12Amasa waaramawo khu lukuuto, nga apilingikhila mu mafuki. Abe buli musilikhale ubirawo, eema waamuloleelela. Nashiryo shino shaakila umusilikhale uyo waakhweesa Amasa waamurusa khu lukuuto, waamuyila andulo, waamumwaatakho ingubo. 13Lwanyuma lwe’sho, mbaawo umusilikhale ukuundi uwemikhawo ta. Abe boosi baabira bubiri, nga batsya khuyeeta Yowabu, bawaambe Sheba.

Sheba ebisa mu shiriimba Abeli

14Ari abe Sheba waatsiile nga abirira mu bikuuka bya Isiraeli byoosi, nga woolile i Besimakaya. Liiye lilifuurisa buulayi lyoosi lyaamwakaanila ibweene iyo, lyaamuloondakho khuutsya mu shiriimba.

15Lwanyuma basilikhale boosi abe babaali ni Yowabu, baatsya baamwibotokhelela nga ali i Abeli. Baabuusa kuuloba ibulafu we litikiiyi kwaaniina mu ngaaki, kweema aambi kulekhaane ni litikiiyi. Kila barakikha khukhwikubaka litikiiyi, bari baliwumbulake.

Umukhasi uwe kamakhula awonesa shiriimba

16Lwanyuma aabawo umukhasi uwe kamakhula uwalaangilila mukari mwe shiriimba nga aloma ari, “Yowabu, Yowabu! Reekeresa! Yiitsa ano ise ikhuboolele.” 17Kila Yowabu esyeenda aambi; umukhasi waamureeba ari, “Iwe niye Yowabu?” Yowabu weelamo ari, “Niye ise.” Kila umukhasi tsana amulomela ari, “Rekeeresa bibiindu byeesi umwakaanisi woowo atsya khukhuboolela iwe.” Yowabu weelamo ari, “Ise narekeeresire.” 18Umukhasi tsana waaloma ari, “Yaba amataayiko, babaandu baaloma bari, ‘Nga ukana kamakhula, utsya mu shiriimba Abeli.’ Abe kamakhula keesi baafuna mu shiriimba shino kaabayeeta khuumalwo bihangafu abe byeesi bali ni nabyo. 19Ise ndi mutweela khu baandu babaakana lukoosi, naluundi ndi umwiyikinwa mu Isiraeli. Shiina kila uli khuukana khukhwoonakisa shiriimba sha Isiraeli, shishiili busa nga maayi we babaandu? Shiina kila uli khuukana khuuhesa lisaaye ly’Omukasya?”

20Yowabu waamwiilamo ari, “Seshilikho shiryo nakhakyeekhe khari ta! Ise siindi khuukana khuubahesa inywe, namwe khukhwoonakisa shiriimba ta! 21Seshili shiryo ta! Iliwo umusaani isi balaanga bari Sheba, uwaama mu shibala she bikoongo she Efurayimu. Umusaani uyo washuukhile khu muyiinga Dawudi! Ni muba bari mwaamumbeele, ise inawaamba liiye lyase, khurure ano, khulekhe shiriimba khutsye.” Kila umukhasi tsana alomela Yowabu ari, “Iwe liindakho. Khunakhukholowela iwe kumurwe kweewe, nga kubirira khu litikiiyi khu ngaaki.”

22Umukhasi waatsya isi babaandu be mu shiriimba boosi mu makhula busa. Baawaamba Sheba, baamukhalakho kumurwe, baakumwaatila Yowabu. Nashiryo Yowabu waafuura ifulumbeti, waakila basilikhale boosi baalekha shiriimba, beelayo tsiingo tsyaabwe. Ni Yowabu naye weelayo mu Yerusalemu isi umuyiinga.

Luruungo lwe baraangirisi

23Yowabu abe niye umuraangirisi uwe liiye lya Isiraeli lyoosi; ne Benaya umwaana uwa Yehoyiyada, abe ali umuraangirisi uwe liiye liliinda Dawudi. 24Adoramu abe niye uraangirira abo babaraamba kimilimo kyeesi babaaminikhilisile busa nga baakulwa; Yehoshafati umwaana uwa Ahiludi, abe ali umubiikhi we bibiikholikha mu buwuli. 25Sheva abe niye umuroni; Zadoki ni Abiyasaari abe nibo basaayi; 26Ira khukhwaama i Yayiri, abe ali mutweela khu basaayi ba Dawudi.