Swahili Bible2

18

Dawudi erekekhela busoolo

1Dawudi wawaamba liiye lyeewe waalikabananisamo kamatuuli, ke biikana, ni babaandi mu bitoondo. Waarobora ni baraangirisi ba buli lituuli. 2Wawaamba liiye waalikabananisamo bisiintsa bitaru. Shisiintsa shitweela she khaataru waashiwa Yowabu; shishiindi waashiwa Abishayi umwaana uwa Zeruya, naluundi wandaaye uwa Yowabu; ni shishiindi waashiwa Itayi, uwaama i Gite. Kila umuyiinga alomela basilikhale abo ari, “Ise samweene ndi ni khuutsya ni nanywe mu busoolo.”

3Ne basilikhale baamwilamo bari, “Iwe ukhatsya mu busoolo ni nafwe ta. Khulwekhuuba, abe ifwe fweesi khwaakhatitukha khwaatsya, namwe abe bakheerakho shisiintsa shitweela she liiye, iyo siiba ilomo ikhulu ta. Ne iwe n’uufwa, bali busa nga babeerire ikhaba basilikhale babaaminyisa kumukaanda mutweela (10,000). Nashiryo iwe n’urame mu shiriimba, nga ifwe khwaakanile buyeeti, kane iwe ukhusiindikhile.”

4Kila Dawudi abalomela ari, “Kane ise ikhole isho shoosi sheesi inywe mubona muri shili shilayi.” Nashiryo nga kamahe kakhuumba karura mu shiriimba kaatsya, umuyiinga weemikha andulo we shiilibwa. 5Kila umuyiinga enyusa angaaki likono waawa Yowabu shiilakilo, ni Abishayi, ni Itayi ari, “Khu lwase samweene, muli ni khuubona muri, umusoleeli Abisalomu uyo, s’afuna shiwaangafu shoosi ta.” Baryo babaandu boosi babaabawo, baawulila shiilakilo sheesi umuyiinga aawa baakhulu be baselikhale khu biwaamba khu Abisalomu.

6Nashiryo liiye lyaatsya lyebwakala ba Isiraeli, buusoolo bwaaba mu shisaali she i Efurayimu. 7Liiye lya Dawudi lyaafuura liiye lye ba Isiraeli mu busoolo, beera basilikhale be ba Isiraeli baboola kimikaanda kibili (20,000). 8Buusoolo bwaasalanila mu shibala isho shoosi; ne bihangafu bye mu shisaali byaakila basilikhale baakali baafwa, khuuminyisa ni naabo beesi beera busa.

9Khaangukho, she khabi imbi, Abisalomu waakanana basilikhale ba Dawudi. Abisalomu abe alikho atimila khu sikilya, iyatsya yaabirira mu shitsakha shiilimo kuusaala kumuruumba, waakila tsimbaanu tsyaamukaama kumurwe tsyamwomiisa, waarama nga asungwaatsila mu mbewo busa. Isikilya yaatima yaatsya. 10Kila mutweela khu basilikhale uwabona shino nga shikholikha, waatsya waaboolela Yowabu ari, “Ise naama khubona Abisalomu, nga alikho atsungatsungila mu kuusaala kumuruumba!” 11Yowabu waamureeba ari, “Uri uboone Abisalomu? Shiina kila ukhamuwunile lurima umwiira, akwa aasi? Khali naakhuwa iwe tsifeetsa likhumi, ni kumusipi kwa buraawa.”

12Ne umusilikhale uyo waalomela Yowabu ari, “Abe wakhaamba ise anariha busiro bw’efeetsa iyoola shikana shitweela (1,000), ise sinyala neera umwaana uw’omuyiinga ta. Khulwekhuuba ifwe fweesi khuwuliile nga umuyiinga akhulakila iwe, ni Abishayi, ni Itayi, ari, ‘Khu lwase samweene, muli ni khuubona muri, umusoleeli Abisalomu uyo, s’afuna shiwaangafu shoosi ta.’ 13Ni shishiindi, ise imba umwiirire, abe ise ndikho nireerera bihangafu samweene, khulwekhuuba khali iwe wirusilekho kumusaango.”

14Kila Yowabu aloma ari, “Ise simbona kila imala imbuka yase khuukanikha ni nawe ta.” Nga Yowabu woolile isi Abisalomu uwaba nga ashiwaambikhila mu kuusaala mu ngaaki, waabukula kamafumo kataru, wekuba Abisalomu mu shifuba. 15Lwanyuma abawo basilikhale liikhumi khukhwaama mu liiye lya Yowabu, babaatsya baamaliila Abisalomu. 16Lwanyuma lweesho, Yowabu waafuura ikhoombi. Nga basilikhale beewe baakiwuliile, baalekhela awo khuutimisa basilikhale ba Isiraeli. 17Kila bayila kumulaambo kwa Abisalomu bakukholowa mu lilowo lileeyi mu shisaali. Kila babiimbakho kimibaale kimiboofu. Kila buli mu Isiraeli atitukha atsya ingo weewe.

18Abe Abisalomu nga ashiili umulamu, waayiyombakhilayo umweene kusiindi mu Litila ly’Omuyiinga, waakutwiikha lisina lyeewe, khulwekhuuba s’aaba ni babaana abe babaakhamutwiikhe niye, nio babaandu bamukhebulilekho ta. Nashiryo ni khukhwoolesa ari bakulaanga bari kusiindi kwa Abisalomu.

Baboolela Dawudi bari Abisalomu wafwiile

19Lwanyuma Ahimazi umwaana uwa Zadoki waalomela Yowabu ari, “Khayo indimake intsye imboolele umuyiinga Dawudi ndi, Umukasya waamurusilekho baasiku beewe.”

20Yowabu waamwiilamo ari, “Singane utsye uboolele umuyiinga lwe shaleelo ta, akhali ukhaamuboolele shifukhu shishiindi, khulwekhuuba umwaana weewe waafwiile.” 21Kila Yowabu alomela umusaani uwaba umwakaanisi mu ntsu ya Dawudi ne nga ali umu Esiyopiya ari, “Tsya uboolele umuyiinga uri Abisalomu waafwiile.” Umusaani uyo waafukhamila aasi khukhwiisamo Yowabu shiriifwa, lwanyuma wenyukha waatima waatsya.

22Kila Ahimazi umwaana uwa Zadoki akanikha isi Yowabu luundi ari, “Oba shiba shiina, ikhaba nga umu Esiyopiya waatsiile, ne abe shitweela busa nase ndi khuukana khuutima intsye imboolele umuyiinga.” Yowabu waamureeba ari, “N’oluwa shiina ni khuutima khuutsya khuboola? Singane ufune shiwaanwa khulwe kamakhuuwa keesi ulikho uyila ta.”

23Ahimazi waaloma ari, “Shitweela busa khayo indime ntsye.” Yowabu waamulomela ari, “N’utime utsye.” Ahimazi waatima waatsya nga abirira khu mukhoosi kwe mwitila lya Yorudaani, aryo waabira umu Esiyopiya.

24Ari, Dawudi abe wekhaale akari e shiilibwa she mukari ni she bulafu. Umuliindi ni aaniina khu ngaaki khwe shiilibwa, wenyusa tsiimoni waabona umuundu nga alikho eetsa mu shiriimba butima, nga ali yenyene busa. 25Kila umuliindi aboolela Dawudi sheesi aboone. Dawudi waaloma ari, “Nga ali yenyene, ali ni khuuba nga ali ni kamakhuuwa.” Uwaba alikho atima, weetsila ilala aambi. 26Umuliindi waabona umuundu ukuundi naye nga alikho atima, kila aboolela umuyiinga ari, “Naaboone umuundu ukuundi, alikho atima, ne naye ali yenyene busa!” Kila umuyiinga aloma ari, “Ikhaba uyo naye ali ni khuuba nga alikho areera kamakhuuwa.”

27Umuliindi waalomela umuyiinga ari, “Umuraangisi atima nga Ahimazi, umwaana uwa Zadoki.” Kila umuyiinga aloma ari, “Uyo ali umuundu umulayi, ali khuuba nga waasutile kamakhuuwa kamalayi.”

28Kila Ahimazi aboolela umuyiinga nga akuukuula ari, “Khwaafuurire, khwaafuurire!” Kila enamisa kumurwe kweewe khukhwiisamo umuyiinga shiriifwa. Nga waamalile waaloma ari, “Umuyiinga, Umukasya Wele woowo, aruuyibwe naabi! Khulwekhuuba waakhunyalisile iwe khuufuura baasiku boowo mu busoolo.”

29Kila umuyiinga amureeba ari, “Umusoleeli wase Abisalomu ali aryeena?”

Ahimazi waaloma ari, “Nga Yowabu ni aasiindikhile umwakaanisi woowo ni nase khuutsya, ise imboone lituuli liikali nga lilikho likhupa liyoombo. Ne ise naalekha khumanya shiina abe shishiili khuutsya mu moni ta.”

30Kila Dawudi amulomela ari, “Yimikha andulo awo, uliindekho.” Ahimazi wesyeenda andulo, weemikha awo.

31Umu Esiyopiya ni oola waaloma ari, “Umuyiinga, naakhureerere kamakhuuwa kamalayi! Khulwekhuuba Umukasya waakhunyalisile iwe khuufuura baasiku boowo mu busoolo!”

32Kila umuyiinga amureeba ari, “Umusoleeli wase Abisalomu, ali aryeena?”

Kila umu Esiyopiya elamo ari, “Umuyiinga, khali baasiku boowo boosi babaakhakhukanisa iwe biilayi ta, khali nabo bafwiile nga umusooleli uyo!”

Dawudi alila Abisalomu

33Kila umuyiinga kumutaambo kumuwaamba naabi, wenyukha waaniina mu ntsu ili angaaki we shiilibwa, kila arakikha khuulila, nga aloma ari, “Umwaana wase, Abisalomu! Umwaana wase, Abisalomu! Khali ise ifwiile, shifuurisa iwe n’uufwa! Umwaana wase, Abisalomu!”