Swahili Bible2

10

Ba Isiraeli basoolanisa ba Amoni

(1 Bye Kimiboolo 19.1-19)

1Lwanyuma lwa bino, Nahashi umuyiinga uwe ba Amoni waafwa, kila umusoleeli weewe Hanuni eela mu bikele byeewe. 2Dawudi waaloma ari, “Nahashi abe ali umwiyikinwa isi ise, ni nashiryo kane nase ikholakane buulayi n’umwaana weewe.” Nashiryo Dawudi waarumana baraangirisi batweela khukhwaama mu Isiraeli khuutsya mu shibala she ba Amoni, khukhwoola khu Amoni nga n’afwiilwa paapa weewe, ni khuubasaasila kamasika.

3Ne baraangirisi mu Amoni baalomela Hanuni bari, “Iwe wambaasa uri Dawudi arumanire ano babaandu khukhwoola khu masika ka paapa woowo? Niye waarumanire babaandu bano khuuweentselesa, ni khuukelawo bawaambe shiriimba sheefwe.” 4Nashiryo Hanuni waalakila baawaamba baraangirisi abo, buli mutweela baamubekakho buunwaanwa khu luwaande lutweela lwe mu moni. Naluundi baawaamba bikwaaro byaabwe baabikhalilakho mu shikuute, baabatimisa baatsya. 5Basaani bano baswaala naabi. Kila Dawudi abasiindikhila buurume nga buloma buri, “Ni murame mu Yeriko khukhwoolesa bunwaanwa byeenywe ni bulitsowa, nio mwiitse ingo.”

6Lwanyuma ba Amoni ni baabona bari sheesi bakholile shaakhalasile naabi Dawudi, baapangisayo basilikhale babaandi. Baafunayo baselikhale baboola kimikaanda kibili (20,000) be khu bikele busa nga baama mu Siriya, mu biriimba Besi Rehobu ni Zoba; babaandi shikana shitweela (1,000) khukhwaama isi umuyiinga uwe Maka; ni babaandi kumukaanda mutweela ni bikana bibili (12,000) khukhwaama mu shisiintsa shilaangibwa Tobu. 7Dawudi n’awulila abe sheesi bakholile, kila arumana Yowabu ni liiye lye basilikhale babaafuura buulayi, khuutsya khubasoolanisa.

8Liiye lye ba Amoni lyaabuusaanila ibweeni we shilibwa she shiriimba shaabwe. Kamahe ke ba Siriya khukhwaama i Zoba ni Rehobu, ni lye ba Tobu ni Maka, bebaaya baasalanila mu lirome abe liliwo.

9Yowabu n’abona ari ali ni khuusoolana ibweeni n’inyuma, waaroborayo basilikhale babaafuura buulayi mu Isiraeli khuusoolanisa ba Siriya. 10Wawaamba wandaaye weewe Abishayi, waamuwa niye khuuraangirira basilikhale babaaramire, khuutsya khusoolanisa ba Amoni. 11Yowabu waaboolela Abishayi ari, “Noola ubona uri ba Siriya balikho baaminya ise kamaani, kane wiitse ukhuyeete ifwe. Ne noola ise imbona ndi ba Amoni balikho bakhuminya iwe kamaani, kane ise niitse ikhuyeete iwe. 12Ba munyindaalifu, khusoolane khutseete babaandu beefwe ni biriimba bya Wele. Inoomba ndi khali Umukasya akholile sheesi abona nga shishimwakhila.”

13Nashiryo Yowabu ni liiye lyeewe bebwakala ba Siriya. Bano baatitukha khukhwaama isi Yowabu. 14Liiye lye ba Amoni ni lyabona liri ba Siriya baatitukhile baatsiile, nabo ni baabona Abishayi ni liiye, baatitukha beelayo bengila mu shiriimba. Nashiryo Yowabu waalekhela awo khusoolanisa ba Amoni, weelayo mu Yerusalemu.

15Ne ba Siriya ni baabona bari ba Isiraeli baabafuurire mu busoolo, baabuusa atweela liiye lyaabwe luundi. 16Hadadezeri waarumanisa babaandu khuulaanga liiye lye ba Siriya abe liliili shangelekha we luluutsi Efurati. Kila Shobaki, umuraangirisi we liiye lya Hadadezeri abaraangilila khuutsya mu shiriimba shilaangibwa Helamu.

17Dawudi n’awulila sheesi abe ba Siriya balikho bakhola, waabuusa atweela liiye lye ba Isiraeli lyoosi. Baakhalisa luluutsi Yorudaani, boola i Helamu. Ba Siriya beebwakala Dawudi baamusoolanisa. 18Ikhaba nga ba Siriya bebwakala Dawudi ni liiye lyeewe, ne baakelawo baatitukha baatsya. Liiye lya Dawudi lyeera basilikhale bitoondo musaafu (700) babatimisa kamakaali, ni babaandi kimikaanda kine (40,000) babaakeendela khu ŋwaaŋwa. Shobaki umuraangirisi uwe kamahe waatsiinisibwa naabi, waafwiila mu busoolo.

19Nga bayiinga boosi abe babaali aasi e buyiinga bwa Hadadezeri ni baabona bari liiye lye ba Isiraeli lyaabafuurire mu busoolo, baafukiilila khuukhola buusaale ni Isiraeli. Naluundi baafukiilila khuuba aasi e buyiinga bwa Dawudi. Nashiryo ba Siriya baarya baalekha khuyeetatsakakho ba Amoni mu busoolo luundi ta.