Swahili Bible2

1

Khuufwa khwa Saulo

1Lwanyuma lwe khuufwa khwa Saulo, Dawudi waakobola khukhwaama mu busoolo, nga waamalile khuufuuntsakilila ba Amaleki, waarama i Zikulaga khuumala biifukhu bibili. 2Khu shifukhu shisheelakho, umusilikhale mutweela khukhwaama mu liiye lya Saulo waatsya nga atima, woola isi Dawudi, waafukhamila aasi, khuumwiisamo lukoosi. Abe bikwaaro by’omusilikhale uyo byaatabukhakile, ni mu murwe nga mulimo liloba. 3Dawudi waamureeba ari, “Iwe waama waheena?” Umusaani uyo welamo ari, “Ise natitukhile khukhwaama mu liiye lye ba Isiraeli.”

4Dawudi waamureeba ari, “Imboolele khubone, busoolo bwaatsiile buryeena?” Kila umusaani uyo amwiilamo ari, “Basilikhale beefwe boosi baatitukhile khukhwaama mu busoolo, baatsya. Babaafuurisa buukali baafwiile. Ikhaba umuyiinga Saulo n’umwaana weewe Yonasani, nabo baafwiile.”

5Kila Dawudi areeba umusoleeli uwamuboolela bibiindu bino ari, “Iwe umanyile uryeena uri Saulo n’umwaana weewe, baafwiile?” 61.6: 1 Sam 31.1-6; 1 Kim 10.1-6Umusoleeli uyo waamukobolamo ari, “Ise imbeele nga neemikhile khu lukiingi Gilubowa. Indi indola, naabona umuyiinga Saulo nga weenamiliile weetiilile lifumo lyeewe. Biba biryo, abe tsiŋwaaŋwa ni kamakaali ke baasiku balikho baamwimbiyisa. 7Bari enyusa tsimoni eshebukha ari, waambona ise, wanaanga. Naatsya isi ali, naareeba abe sheesi alikho akana. 8Umuyiinga waandeeba ise ari, ‘Iwe naanu?’ Nase naamwiilamo indi, ‘Ise ndi umu Ameleki.’ 9Kila anomela ari, ‘Ikhuloomba ndi yisyeenda aambi untsire. Khulwekhuuba ikhaba nga ishiili umulamu, ne indi mu butsiina buukali naabi.’ 10Nashiryo nase nesyeenda aambi, naamwiira. Khulwekhuuba abe ise naamanyile ndi saanyala waawona ta, khulwe khuutsiinisibwa khuukali abe khweesi afunile. Ise naabukula ikuutwa yeewe ni birere abe bibiili khu makhono keewe, naabikhureere iwe, umukoosi. Aamba ibishiina.”

11Ni abweene awo, Dawudi wonuulamo bikwaaro byeewe khu lwe kumutaambo kumukali. Ikhaba ni basilikhale babaaba ni naye boosi, nabo baakhola baryo. 12Boosi baalila, baasola, naluundi baabuya intsala khukhwoolisa angoloobe. Baakhola shino khulwa Saulo n’umwaana weewe Yonasani, ni babaandu ba Wele boosi, abe babaafwiliile mu busoolo.

13Kila Dawudi areeba umusoleeli uwamuboolela kamakhuuwa ako ari, “Iwe waama waheena?” Umusoleeli waamwiilamo ari, “Ise ndi umu Ameleki, indi umwaana uw’omwiitswa.” 14Dawudi waamureeba ari, “Ne waamisile waheena bunyindaalifu bwe khukhwiira umuyiinga isi Umukasya aamala khaale khuutsukhakho kamafura?” 15Kila Dawudi alaanga mutweela khu basoleeli be mu liiye lyeewe, amulomela ari, “Mukwekho, umukhoonye.” Ni abweene awo, uyo waamukwakho, waamukhoonya. 16Kila Dawudi aloma ari, “Wakhafwa, wamweene kumusaango kukhufuura, khulwekhuuba ulomile uri, ‘Ise niye uwirire uyo isi Umukasya aamala khaale khuurobora.’ ”

Kumweenya kwa Dawudi kwe khuulila Saulo ni Yonasani

17Kila mu khushebulila Saulo n’umwaana weewe Yonasani, Dawudi weemba kumweenya. 181.18: Yos 10.13Waalakila ari baselikhale beewe bali ni khuuleekela babaandu boosi be mu Isiraeli, kumweenya ukwo. Kumweenya kuno kwaaronebwa mu Shiitabo sha Yashari. Kutsya kuri:

19“Ba Isiraeli, uwe shiriifwa weenywe

baamwirire waakwiile mu bikoongo!

Ikhaba basoolani beenywe baanyindaalifu

nabo beeribwire!

20Mukhatsya mwaashikanikhilakho i Gasi ta,

namwe mwaasalanisa kamakhuuwa

kaatsya koola mu shiriimba she Ashikeloni ta.

Khulwekhuuba bakhasi ba Filisitiya kane beekhoye,

abo babaakhesaaya Wele ta, kane beekhoye.

21Ikhabawo liime namwe ifula ikwa

khu bikiingi bye Gilubowa ta!

Namwe kimikuunda kyaabwe kikhaamakho

biwaanwa baabiyilila Wele ta.

Khulwekhuuba ibweene iyo

niyo isi bye busoolo bye banyindaalifu byakwa.

Ingabo ya Saulo abe yaayiyakha kamafuki

ke baasiku beewe, akhuba kamafura ta.

22Abe buyiingo bwa Yonasani nga bwaarurire paka bukhoonya,

ni Saulo abe eera babaandu baakali mu busoolo.

Abe beera banyindaalifu baakali,

ni naabo abe babaali bakhomefu.

23Saulo abe ali umuundu umukanwa naabi,

ikhaba Yonasani abe ali umukanwa naabi.

Nga bali baalamu yaba baasiimana,

ikhaba mu khufwa, baafwiila atweela.

Abe batima khuuminyisa ikhisi,

naluundi abe bali ni kamaani khuuminyisa tsitalanyi.

24Bakhasi ba Isiraeli, ni mulile khulwa Saulo,

abe abakwaarisa inywe mu bikwaaro biilayi naabi.

Naluundi abe abawa inywe bye khukhwisaaha biilayi.

25Baanyindaalifu beefwe baakwiile,

khulwe buusoolo buurafu.

Yonasani waafwiile,

waakwiile mu ngiingi tsye Gilubowa.

26Yonasani, ise kumutaambo kwaamaambile!

Abe khwaasiimana!

Abe khuli busa nga babaaloondana!

Abe ise naakhusiima iwe khufuurisa umusaani

n’akana umukhasi weewe.

27Banyindaalifu beefwe baafwiile,

bye busoolo byaabwe byoonakisibwile.”