Swahili Bible2

SHIITABO SHE KHABILI SHE

BAYIINGA

KHUKHWAANTSULA

Shiitabo shino she khabili she Bayiinga shitsya shilooselakho busa khu byakholikha khaale bye kamanaambo kaabili ka Isiraeli, nga tsilomo ni tsirakikhila mu shitabo she Bayiinga shishinyoowa. Shiitabo shino shinyala shakabananisibwamo bisiintsa bibili: 1. Luukano luluwaamba khu buyiinga bubili khukhwaamila ilala shinakari sha senkyure iye shisyeenda nga Kristo ashiili khwiitsa ta, khukhwoolesa khukhwoonakisibwa khwa Samariya, ni khumalibwawo khwe buyiinga bwe ngaaki mu mwiiko kwe bitoondo musaafu ni kamakhumi kabili na kibili (722 B.C), nga Yesu ashiili khusaalikha ta. 2. Luukano luluwaamba khu buyiinga bwa Yuda, khukhwaama khu mbuka isi buyiinga bwa Isiraeli bwoonakisibwila, khukhwoolela ilala khu khuwaambibwa ni khukhwoonakisibwa khwa Yerusalemu n’umuyiinga Nebukaduneeza uwa Babulooni mu mwiiko kwe bitoondo biraano ni kamakhumi shinaane na kisesaba (586 B.C), nga Yesu ashiili khusaalikha ta. Shiitabo shino shaakamayo ni bibiwaamba khu Gedaliya uwaba gafana wa Yuda, nga bali mu buwuli bwe ba Babulooni, ni khuutubakho bubakha bubuwaamba khu khuukaangululibwa khwa Yehoyakini, umuyiinga wa Yuda khukhwaama mu mapuusu mu Babulooni.

Biwaangafu bye linaambo lyoosi byaboolakho lwekhuuba bayiinga ni babaandu ba Isiraeli ni ba Yuda, sibaaba babeyikinwa ta. Khukhwoonakisibwa khwa Yerusalemu, ni khuuyilibwa mu bubowe khwe babaandu ba Yuda baakali, khwareerawo tsinjuukhayuukha tsingali mu byamayo bya Isiraeli.

Umuŋoosi umanyikhaane naabi mu shitabo shino she Bayiinga she Khabili niye Elisa, uweela mu bikyele bya Eliya.

Inoondekhana iye bibiilimwo

Buyiinga nga bwayawukhanamwo (1.1—17.41)

a. Umuŋoosi Elisa (1.1—8.15)

b. Bayiinga ba Yuda ni ba Isiraeli (8.16—17.4)

c. Khuukwa khwa Samariya (17.5-41)

Buyiinga bwa Yuda (18.1—25.30)

a. Khukhwaama khu Hezekiya khukhwoola khu Yosiya (18.1—21.26)

b. Buwuli bwa Yosiya (22.1—23.30)

c. Bayiinga babaakamayo ba Yuda (23.31—24.20)

d. Khuukwa khwa Yerusalemu (25.1-30)