Swahili Bible2

6

Elisha akhola she kamakaanga

1Shifukhu shitweela baŋoosi babekhala ni Elisha bamulomela bari, “Bona shiifwo sheesi ifwe khwaakaananamo ni nawe shili shifwiiti. 2Lwashiina kila khukheekha khu luutsi Yorudaani, buli mutweela waaremayo kuusaala, khunyalise khukhwombekhayo shiifwo shibalaayi?”

Elisha waabeelamo ari, “Ni mukhole nga ni mulomile.”

3Kila mutweela khu baŋoosi amulomela ari, “Shaandibeele shilayi iwe khuutsya ni nafwe.”

Elisha weelamo ari, “Khayo khutsye.” 4Ni nashiryo Elisha waatsya ni nabo. Ni boola khu luutsi Yorudaani, baarakikha khuurema kimisaala. 5Ne mutweela khu baŋoosi n’aba nga arema kuusaala, iyaywa yeewe yaakhukhamwo, yaakwa mu meetsi. Khaangukho waalila ari, “Oyaaya! Musakhulu, iyaywa yabeene! Ingisabile busa, shiili iyase ta!”

6Elisha waamureeba ari, “Ikwiile ali?” Nga wookesile Elisha abweene isi yakwa, kila afuna khasaala, waakhamwaatawo, shino shaakila iyaywa yaakyelakyela khu meetsi. 7Elisha waamulomela ari, “Kibukule.” Kila umuŋoosi uyo atsaanusa kumukhono waakibukula.

Elisha akamisa khukhwibwakala khwe liiye lya Siriya

8Abe buli muluundi nga umuyiinga uwa Siriya akana khukhwibwakala linaambo lya Isiraeli, abe akaananamo ni naabo babaamuwa khu makhula, nga ababoolela ari, “Kumuluundi kuno ise naakhalilewo ndi kane khure ikaambi yeefwe mu shifwo nabulebe.”

9Ne abe buli kumuluundi, Elisha areewura umuyiinga uwa Isiraeli nga aloma ari, “Ukhabirira mu shifwo nabulebe ta. Khulwekhuuba liiye lye ba Siriya lyebuulile ibweene iyo.” 10Nashiryo abe umuyiinga wa Isiraeli asiindikha buurume isi liiye lya Isiraeli liliili mu shifwo umwo khuuba lilirekefu.

11Umuyiinga wa Siriya n’amanya shishiili khuukholekha kila akhalala naabi. Kila alaanga baaraangilisi be liiye lyeewe, waabareeba ari, “Khusi inywe, naanu niye uboolela umuyiinga uwa Isiraeli tsinengekharengekha tseefwe?” 12Mutweela waamukobolamo ari, “Umuyiinga, mbaawo namutweela khusi ifwe ta. Akhali umuŋoosi Elisha uuli mu Isiraeli, niye uwikhala aboolela umuyiinga uwa Isiraeli byoosi byeesi uba waakanikhiile mu shiseenge mwoowo.”

13Umuyiinga waaloma ari, “Ni mutsye mubone isi amenya, khulwekhuuba indi khuukana khuuruma basilikhale bamuwaambe, bamureere ano.” Kila buurume bukobolela umuyiinga nga buloma buri, Elisha amenya i Dosani. 14Nashiryo waasiindikhayo liiye liikali nga bali khu ŋwaaŋwa ni mu makari; baatsya mu shilo, bebotookhelela shiriimba.

15Ni bwasha kumutishinyi umuraambi wa Elisha waarura antsye, waabona liiye liikali nga lili ni tsiŋwaaŋwa, ni kamakaari, nga bebotookheleele shiriimba. Kila buuri bumuwaamba, waalomela Elisha ari, “Musakhulu, ifwe kane khukhole khuryeena?”

16Umuŋoosi waamwiilamo ari, “Iwe ukharya ta. Liiye liliili khu luwaande lulweefwe lili liikali khuuminyisakho lilyaabwe.” 17Kila Elisha aloomba nga aloma ari, “O Mukasya, naakhuloombile, iwe ni wikule tsimoni tseewe anyalise khuubona.” Aryo Umukasya wekula tsimoni tsy’omuraambi, waabona. Abe khu lukiingi khwoosi khwetsuule tsiŋwaaŋwa ni kamakaali bye kumulilo nga byebotookheleele Elisha.

18Nga liiye lye ba Siriya lyesyeendile aambi ni Elisha, kila aloomba ari, “Mukasya, naakhuloombile, khali baselikhale bano boosi bafwiile tsimoni baba baabofu.” Aryo Umukasya waabeera boosi tsimoni, bekyela baabofu, nga Elisha n’aloomba. 19Kila Elisha alomela baasiku bano ari, “Mwaakoraanile intsila, naluundi shiriimba sishili nisho shino ta. Nimunoondekho, ise kane imbalakane umuundu isi mulikho muweentsa.”

20Nga liiye lye baasiku bano lyaamalile khukhwiingila mu shiriimba she Samariya, kila Elisha aloomba ari, “O Mukasya, ni wikule tsimoni tsye babaandu bano, nio banyale khuubona luundi.” Aryo Umukasya wekula tsimoni tsaabwe baabona; benyoola nga beemikhile mukari mwe shiriimba she Samariya. 21Umuyiinga wa Isiraeli n’ababona waalomela Elisha ari, “Musakhulu, ari imbakhoonye? Imbakhoonye imbamalewo?”

22Elisha waamwiilamo ari, “Taawe, singene ubakhoonye ta. Ubakhoonya, ubawaambiile mu busoolo? Akhali ndi iwe n’ubawe busa biilyo balye, ni she khunywa banywe, ubalekhe bakoboleyo isi umuyiinga waabwe.”

23Nashiryo umuyiinga waabakholela kamayiiya ke kamaani kameene; ni baamala khuulya ni khuunywa, wabalekha beelayo isi umuyiinga waabwe. Khukhwaamila awo, ba Siriya balekhelawo khuutsya khunuula mu Isiraeli.

Umuyiinga wa Siriya ebwakala Samariya

24Nga abirirewo imbuka, umuyiinga Benihadadi uwa Siriya waabusaasa liiye lyeewe lyoosi, waatsya khukhwibwakala Samariya. 25Khulwe imbuka isi baamala nga baayibotokhelela Samariya, intsala yakwawo iye kamaani nga mbaawo she khuulya mu shiriimba ta. Khukhwoolisa kumurwe kwe sikilya baakukulisa ikilo ndweela iy’efeetsa. N’ipwakhuli iye kamasilyokokho ke liwuusi6.25 Kano kanyala khuuba nga abe karaambisibwa nga biilyo, namwe abe boosha kabawa buwaanga. baakakulisa shisiintsa she kilo iy’efeetsa.

26Shifukhu shitweela nga umuyiinga uwa Isiraeli alikho abira aambi ni liitikiiyi lye shiriimba, waawulila umukhasi nga alila, nga aloma ari, “Naakhwikoontseleele, uwe shiriifwa, n’unjeete!” 27Kila umuyiinga amukobolamo ari, “Khayo Umukasya akhuyeete. Iwe wambaasa uri ise inyala khuukhuwa biilyo namwe iviini?” 28Ne lwanyuma kila umuyiinga areeba umukhasi uyo ari, “Buwaangafu shiina bweesi abe uli ni nabwo?”

Umukhasi weelamo ari, “Iseese n’umukhasi washaase, intsala yakhuliile naabi, khuryo khwaafukiilisana khuulya babaana beefwe. Umukhasi yuno waanomela ise ari nga khwaanyooyile khuulya uwase shaleelo, shifukhu shishiilakho khulya uweewe. 296.29: Maka 28.57; Nami 4.10Nashiryo khwaateekha uwase khwaamulya. Ari shifukhu shisheelakho ise ni naamuloma ndi reera umwaana woowo khumuteekhe khumulye, niye waabisa uweewe.”

30Umuyiinga n’awulila bilomo bino, khulwe kumutaambo kumukali, wonuulaka bikwaaro byeewe. Isaambo isi aaba nga ali khu kutikiiyi khu ngaaki, babaandu baabona bari, khana mukari abe waakwaariremo isawu iya makoongwe. 31Kila aloma ari, “Khali Umukasya ambeele ise shitaambiso shishiiminyisila ilala, noola kumukaamba khukhwoola inyaanga nga yino iri, nga Elisha ashiili umulamu.”

32Kila umuyiinga arumana umuundu khuutsya wa Elisha.

Imbuka iyo Elisha aaba abe ali ingo weewe, nga ali ni baaraangilisi ba Isiraeli bekhaale ni naye. Ne nga umurume uyo nga ashiili khukhwoola ta, Elisha waabaloma ari, “Umwiiri uyo waarumaane umuundu khuuremakho kumurwe kwase. Nga mwaaboone umuundu eetsa, yikalawo lulwiitsi mukhomekhelewo ilala, alekhe khukhwiingila muno ta. Khulwekhuuba umuyiinga umweene, aneetsa nga waamuloondilekho.”

33Nga Elisha ashiili khukhala ni kumunwa ta, umurume woola, kila amulomela ari, “Biwaangafu bibikhwoolilekho bino byaamile isi Umukasya. Shiina kila ise iniinda, nga nambaasa ndi kane Umukasya akhuyeete ifwe khu mbuka yino?”