Swahili Bible2

5

Elisha awonesa Naamani

15.1: Luka 4.27Aabawo umusaani bari Naamani, nga abe niye ali umuraangilisi uwe liiye lya Siriya. Umukasya abe wayeeta Naamani yuno khubona ndi kamaye keewe abe kawula naabi baasiku baabwe. Ni nashiryo abe umuyiinga uwa Siriya waayisamo naabi Naamani shiriifwa. Abe ali umusilikhale umunyindaalifu naabi, ne ndi abe ali ni bikeenge.

2Shifukhu shitweela nga ba Siriya balikho banuula babaandu khukhwaama mu Isiraeli, bawaamba umukhaana mutweela isi bekesa khuuba umuraambi uw’omukhasi uwa Naamani. 3Lutweela umukhaana tsana yuno waalomela mukha Naamani ari, “Siinga umusakhulu woowo atsya isi umuŋoosi mu Samariya, kane awonesebwe bikeenge bino.”

4Aryo Naamani waatsya waaboolela umuyiinga ibyo byeesi umukhaana umuraambi amulomela. 5Umuyiinga uwa Siriya waalomela Naamani ari, “Uli ni khuutsiilawo khaangu. Kane ise ikhuwe burone uyile isi umuyiinga wa Isiraeli.”

Aryo Naamani wenyukhilamo waatsya, nga waasutile tsikilo tsye feetsa bitoondo bitaru ni kamakhumi kane (750), ni tsikilo kamakhumi kasesaba tsa zaabu, ni bikwaaro likhumi bye kimikholo. 6Naluundi wasuta ni baluwa khuyilila umuyiinga uwa Isiraeli nga iloma iri, “Ise naasiindikhile umwakaanisi wase Naamani isi iwe, indi umuwonese buulwaale bwe bikeenge.”

7Umuyiinga uwa Isiraeli n’asoma buurume buno, khulwe khuurya khuukali, wonuulaka bikwaaro byeewe, nga aloma ari, “Ise ndi Wele uli ni kamaani khuukaba buulamu namwe khukhwiira umuundu, kila arumana umuundu ari ise imuwonese bikeenge? Alikho aweentsa busa ari khwaamisanilekho khulomane.”

8Ne umuŋoosi Elisha n’awulila ari umuyiinga uwa Isiraeli wonuulakile bikwaaro byeewe, waamurumanila buurume bubuloma buri, “Lwashiina winuulakile bikwaaro byoowo? Musiindikhe eetse isi ise ari, nio naye amanye ari mu Isiraeli mulimo umuŋoosi.”

9Aryo Naamani waatsya ni tsiŋwaaŋwa tseewe ni kamakaali kaatso, baatsya beemikha ibweeni we ntsu iya Elisha. 10Kila Elisha arumana umuundu ibulafu khuuboolela Naamani ari, “Tsya mu luutsi Yorudaani, wisiikhemo kimiluundi musaafu, kane shikhoba shoowo shiileyo shimiliye. Awo kane ube wawonesebwele.”

11Ne Naamani lirima lyaamuniina, waakyeenda waatsya nga eŋuluŋuunya ari, “Bonakho, ise nambaasile ndi kane aame muntsu arure antsye, eeme khu ngaaki, awutsakilile kumukhono kweewe khu bikeenge, nga akuukuula Umukasya Wele weewe, ambonese bikeenge. 12Tsintsitsi Abana ni Farupa tsitsiili mu Damasikasi, sitsilimo kameetsi kamamiliyu khufuurisa tsye mu Isiraeli tsyoosi ta? Abe ise sinyala nesiinga mu ntsitsi itsyo naamiliya ta?” Aryo khulwe lirima liikali, waashuukha, waakyeenda welayo.

13Ne babaakaanisi beewe baamutsyayo baamuloma bari, “Musakhulu, umuŋoosi aba nga ukhulomile iwe khuukhola shishiindu shihangafu naabi, khali ushikholile. Shiina kila iwe ukhakhola sheesi niye akhulomeele? Tsya wisiikhemo uwonesebwe.”

14Nashiryo Naamani weekha mu Yorudaani, wesiikha mu luutsi kimiluundi musaafu, nga umuŋoosi Elisha n’aloma. Waawonesebwa bikeenge khaangukho, shikhoba sheewe shaaba busa nga sh’omwaana umuŋaalye.

15Kila niye ni babaandu beewe boosi beesi aaba nabo, beelayo isi umuŋoosi. Naamani waatsya weemikha mu moni tsy’omuŋoosi nga aloma ari, “Ari ise naamanyile nga Wele wa Isiraeli niye yenyene uli Wele khu shibala khwoosi. Ari ikhuloomba ufukiilise ise ikhuwe shiwaanwa.”

16Ne Elisha waamukobolamo ari, “Mu moni tsya Wele isi ise nakaanisa nga umuŋoosi, singene imaambekho shishiindu shoosi khukhwaama isi iwe ta.” Naamani waakhakakho khuumwikoontselela ari akaanile, ne Elisha waalobela ilala.

17Ikhumaliilisa kila Naamani waaloma ari, “Noola iwe singene waakaanile shiwaanwa ta, ise inoomba ndi ufukiilise isute liloba lilyoola bukali bweesi tsisikilya tsibili tsinyala tsyaasuta, niileyo ni nalyo. Khulwekhuuba khukhwaamila shaleelo shino, ise singene imbaaneyo isaayilo intsoshe yoosi namwe shiwaanwa shoosi isi wele ukuundi yeesi ta, akhali isi Umukasya. 18Ni khu lomo yino, ise inoomba ndi khali Umukasya antsiyakhiile nga natsiile n’umuyiinga mwisaayilo lye khukhwisaayilamo wele Rimoni, nga ise ni ninama khukhwiisamo Rimoni shiriifwa.”

19Elisha waamulomela ari, “Ni wileyo ingo mu lukoosi.” Aryo Naamani waatsya.

Ne lwanyuma lwa Naamani khuutsya lukyeendo lwiimbi luri, 20Gehazi umwakaanisi wa Elisha welomela mu mwoyo kweewe ari, “Elisha waalekha umusaani umu Siriya uyo, waatsya busa ni biwaanwa byeewe, waalekha khu byaakaanila ta. Mu moni tsy’Omukasya umulamu, kane ise imutimekho, imufunekho khakhaandu ne ingobole.” 21Nashiryo Gehazi waaloonda khu Naamani. Ne nga Naamani waaboone Gehazi atimaka eetsa is’ali, weekha aasi khukhwaama mu likaari lyeewe, waamutsyayo, waamureeba ari, “Manya ikhabawo buwaangafu?”

22Gehazi weelamo ari, “Mbaawo buwaangafu ta. Akhali ndi umukoosi wase Elisha waandumile khuukhuboolela bari iliwo basooleli babili be baŋoosi, babaamile mu bikiingi bya Efurayimu, babeetsile nga baloomba buyeeti. Nashiryo aloomba ari ubawekho tsikilo kamakhumi kataru na tsine tse feetsa, ni tsingubo tsibili tsye kimikholo.”

23Naamani weelamo ari, “Shiina kila ukhayila bibyoola mwiibyo kimiluundi kibili?” Naamani waamuwooyawooya, khukhwoolisa Gehazi n’afukiilila, baamubowela bibiindu ibyo, ni baraambi ba Naamani babili baabimusutila, baabimuyilila iweewe.

24Nga boolile khu khakiingi abe isi Gehazi amenya, waabarusakho bibiindu bino, waabiyila mu ntsu yeewe, waasibula babaakaanisi abo baatsya. 25Nga baamalile khuutsya, Gehazi waatsya mu ntsu iya Elisha, kila Elisha amureeba ari, “Gehazi, waama wahena?” Weelamo ari, “Mbaawo oosi isi ise intsiilekho ta.”

26Ne Elisha waamureeba ari, “Iwe s’umanya uri ise imbeeleyo mu mwoyo, isi Naamani aruriire mu likaari lyeewe, khuukanikha ni nawe ta? Gehazi, uli nabunyala shiina bwe khukhwakaanila kamapeesa, namwe bikwaaro, namwe kimikuunda, namwe kamasheese oba tsikhaafu, namwe babaakaanisi? 27Nashiryo khulwe shishiindu sheesi ukholile, kane bikeenge bya Naamani bikhukobole khusi iwe ni lisaaye lyoowo biilo ni biilo.”

Khaangukho bikeenge byawaamba Gehazi, waakhosa ari tswee, waafwaana busa nga kamararara, waakyeenda waarurawo waatsya.