Swahili Bible2

4

Elisha ayeeta namulekhwa umutaambi

1Khu shifukhu shitweela, namulekhwa wa mutweela khu baŋoosi b’Omukasya waalomela Elisha ari, “Iwe waashimanya uri nga umuseetsa wase ashiili khufwa ta, abe ali umuloondeleli woowo, naluundi abe niye esaaya Umukasya. Ne abe iliwo umuundu umubaantsa kamapeesa. Ari umuundu abe umubaantsa uyo, ali khuukana khuuyila basooleli baase babili babe nga baakulwa beewe.”

2Elisha waareeba namulekhwa ari, “Abe ukana ise ikhukholele shiina? Iwe mboolele, ingo mu ntsu yoowo uliyo nashiina?”

Namulekhwa welamo ari, “Mbaawo sheesi ise ndikho nasho ta, khurusakho isaatsi iya buuto.” 3Elisha waamulomela ari, “N’utsye mu bahesanwa boowo ubaloombe khuukhuwa iwe tsisaatsi tsaabwe, nga imbaamo shiindu ta. 4Tsya ingo woowo mwiyikaliilile muntsu ni basooleli boowo, urakikhe khuutsukha buuto uyo mu saatsi itsyo. Buli iyitsula, ukira andulo, utsukhe mu kiindi nayo ukiitsuse.” 5Umukhasi waatsya waakhola nga Elisha n’amulomela, weeyikaliilila mu ntsu ni basooleli beewe; basooleli nga bareera tsisaatsi ni etsusamo buuto.

6Nga tsyetsuule kila alomela umusooleli ari, “Reera ikiindi.” Ne umusooleli waamwiilamo ari, “Ari tsyaweeleyo.” Ni abweenewo, buuto waakama khukhwirurukukha khukhwaama mu saatsi iyo.

7Kila atsya aboolela Elisha ibyo bibikholikhile. Elisha waamulomela ari, “Tsya ukulise buuto uyo, uwaande kamakobi koowo koosi. Iwe ni basooleli boowo munyala mwaraambisa uyo uramirekho.”

Elisha alamusa umusooleli uwaba waafwiile

8Shifukhu shitweela Elisha waatsya i Shunemu. Aabawo umukhasi umuyiinda abe umenya ibweene iyo, uwalaanga Elisha khuutsya ingo weewe khuulya biilyo. Khukhwaamila abweene awo, abe buli lweesi abeela i Shunemu, abe atsya waalya ni nabo.

9Nga imbuka yaabirirewo, umukhasi waalomela umuseetsa weewe ari, “Ise naashimanyile nga umusaani uwiitsaatsaka ano oyu ali umuŋoosi uwa Wele. 10Shiina kila khukhamwombakhila khaseenge khafwiiti khari khu ntsu khu ngaaki.”4.10 Abe tsintsu tsaabwe bombakha nga khu ngaaki khwaakwalala busa.

11Shifukhu shitweela Elisha n’atsya i Shunemu, waatsya muungo umwo, baamuwa shiseenge sheewe isho waakonamwo. 12Kila Elisha alomela umwakaanisi weewe Gehazi ari, “Laanga namulekhwa uyo.” Nga waamulaangile weetsile, weemikha isi bali. 13Elisha waalomela Gehazi khuumulomela ari, “Bona iwe waakhwinaanilekho ifwe naabi; manya iliwo sheesi iwe ukana ifwe khukhukholele? Iliwo ilomo yoosi isi ukana ifwe khuboolele umuyiinga, namwe umuraangilisi uwe kamaye khulwoowo?” Namulekhwa weelamo ari, “Ise imenya mu balebe baase, nashiryo indi nabuli sheesi ingana.”

14Elisha waareeba Gehazi ari, “Ne ari khumukholeleyo shiina?” Gehazi weelamo ari, “S’ali n’umwaana ta, naluundi umuseetsa weewe wahangala mu miiko.”

15Elisha waalomela umwakaanisi weewe ari, “Mulaange eetse ano.” Nga waamulaangile, weetsa weemikha mulyaango mwe shiseenge sha Elisha.

164.16: Rak 18.14Kila Elisha amulomela ari, “Kumwiiko kukwiitsa, itsya khwoola imbuka nga yino iri, ukhaabe wasaala khaale umwaana umusiinde.”

Umukhasi waamwiilamo ari, “Iwe uli umuundu uwa Wele, nashiryo ukhamboolela ise bye bubeeyi ta.”

17Ne n’abirawo imbuka, waaba shisoombo. Lwanyuma wasaala umwaana umusiinde, nga Elisha n’amuboolela.

18Umwaana n’atswowa, shifukhu shitweela waatsya ni paapawe mu mikuunda abe isi baraambi balikho bakyesela biilimwa. 19Lubaluba, umwaana waantsuwa nga alomela paapawe ari, “Kumurwe, kumurwe kwaantsira!”

Kila paapawe alomela umuraambi mutweela ari, “Mukoboseyo ingo isi maayi weewe.” 20Nga umuraambi waamusutile waamukobosileyo ingo isi maayi weewe, waamuwaamba khu bikele. Umwaana waaba khu bikele bya maayi weewe kumutikhinyi kwoosi, kwaatsya khwoola mwihangilwe nga umwaana tsana wafwiile. 21Maawe waamusuta waamuniinisa khu ngaaki mu shiseenge sha Elisha, wamwaalisa khu bulili. Kila arura antsye ekalawo lulwiitsi.

22Lwanyuma walaanga umuseetsa weewe waamulomela ari, “Indi khukana khubona umuŋoosi tsana. Nashiryo isiindikhile umuraambi mutweela ni isikilya ndweela. Indi ni khuutsya khaangu naabi nio inyalise khukobola khaangu.”

23Umuseetsa weewe waamureeba ari, “Shiina kila ukana khumubona shaleelo? Shiili bari luli lwa Sabato namwe lwe kamayiiya ke Kumweesi kumushaakha ta.”

Umukhasi weelamo ari, “Mbaawo buubi ta.” 24Wekhala khu sikilya, kila alomela umuraambi ari, “Khola isikilya ikeendake khaangu. Uli ni khukeendaka luukali, akhali nga naakhulomeele khuukeenda mbola.” 25Ni nashiryo baatsya khaangu isi Elisha, khu lukiingi Karumeli.4.25 Karumeli Lukiingi Karumeli luli nga tsimayilo kamakhumi kabili na tsiraano khukhwaama i Shunemu.

Elisha n’abona umukhasi tsana amutsyayo, kila alomela Gehazi, ari “Bona umukhasi uwaama i Shunemu alikho etsa! 26Timaka utsye umwakaanile, umureebe oba niye ni be muungo mweeewe boosi bali balayi.”

Umukhasi waamwiilamo ari, “Fweesi khuli balayi.” 27Ne ni oola khu lukiingi khu ngaaki isi Elisha, waatsya is’ali, waamukumila bikele. Kila Gehazi etsya khuumukhweesa amuruseyo. Ne Elisha waamuloma ari, “Mulekhe abe, khulwekhuuba ali mu mutaambo kumukali naabi, ne Umukasya siwambooleele ise shishiindu shisheene ta.”

28Kila umukhasi amulomela ari, “Musakhulu, ise nakhuloombakho iwe indi ingana umwaana umusiinde? Ise sinakhulomela indi ukhamoombesa ta?”

29Elisha waalomela Gehazi ari, “Yirekekha, ubukule imiimbo yase isi nitiila utsye ni nayo ingo weewe. Nga woolileyo, kire mu moni mw’omwaana. Nga waakaananile umuundu yeesi khu ntsila nga mutsya, ukhamusheesa ta; ikhaba nga umuundu wakhusheesile, ukheelamo ta.”

30Ne maayi w’omwaana waalomela Elisha ari, “Ise nitsuba mu moni tsy’Omukasya ni tsitsoowo wamweene, indi singane ikhulekhe ano nileyo ta.” Nashiryo Elisha wenyukha waatsya ni nabo.

31Gehazi waabenyoowa nibo ibweeni, kila awaamba imiimbo iya Elisha, waakira mu moni mw’omwaana, ne nga umwaana seesisiikha namwe waahela ta. Nashiryo waatima weelayo, waaboolela Elisha ari, “Umwaana siwaalamukhile ta.”

32Elisha ni oola mu ntsu, waabona nga umwaana waafwiile, baamwaalisile khu bulili bweewe. 33Kila engila mu shiseenge, waabekaliilila boombi ibulafu, waaloomba isi Umukasya. 344.34: 1 Bay 17.21Lwanyuma wenyukha khu ngaaki waatsya khu bulili, wetsalaasa khu mufu. Waara kumunwa kweewe khu munwa kw’omufu, tsimoni tseewe, ni kamakhono keewe khu by’omufu. Ne n’aba nga alikho etsalaasila khu mufu, umufu tsana waarakikha khukhwiitsamo bukhafu. 35Elisha wenyukha wakeenda mu ntsu nga aama eyi n’atsya iyi. Kila elayo luundi isi umufu, waamwitsaalasilakho luundi. Umwaana tsana waasimula kimiluundi musaafu, wekula tsimoni waamoka.

36Kila Elisha alaanga Gehazi amulomela ari, “Laanga maayi w’omwaana.” Gehazi waamulaanga. Ni oola mulyaango, Elisha waamulomela ari, “N’uyile umwaana woowo.”

37Waatsya wenama aasi mu bikele bya Elisha, nga amwiisamo lukoosi. Kila asuta umwaana weewe waarura waatsya.

Elisha aŋaayisa tsinyanyi

38Lwanyuma lwa bino, Elisha weelayo i Gilugaali, nga intsala yaakwawo.

Shifukhu shitweela nga Elisha alikho akanaanamo ni baŋoosi abe babaamenya ibweene iyo, waalomela umwakaanisi weewe ari, “Teekhela baŋoosi bano isaatsi mboofu iye tsinyanyi balye.”

39Mutweelakho khu baŋoosi waatsya waangalisa kamasaafu. Waanyoola kuusaala kwe mwiiswa, busa kila abusaasa kamasaafu kamakali kameene. Ne s’amanya ari kwaaluluwa ta. N’akobola waakakhalaka, waakara mu saatsi waateekha.

40Nga baabakabiile baarakikhile khuulya, kila bayokesa bari, “Elisha byeesi ukhuweele khuulya byaaluluwa naabi! Sikhunyala khwaalya ta.”

41Kila Elisha abalomela ari, “Nimundeerere buufu.” Ni baabumureerera, waabusaalasaka mu nyanyi tsana mu saatsi, kila aloma ari, “Ari ni mukabile babaandu balye.” Ari ni baakaba byaaba nga sibilikho buubi bwoosi ta.

Elisha aliisa babaandu shitoondo shitweela

42Lutweela abawo umusaani abe uwaama mu shiriimba she Baali-Shalisha, nga areerera Elisha biwaanwa biikiboole khukhwaama mu likesa, ni kimikaati kamakhumi kabili, ni likesa liliindi nga bili mu sawu. Kila Elisha aloma ari, “Nimuwe babaandu babilye.”

43Ne umwakaanisi weewe waamwiilamo ari, “Bino binyala byamala babaandu shitoondo shitweela?” Elisha waaloma luundi ari, “Nimuwe babaandu balye, khulwekhuuba Umukasya waalomile ari, ‘Kane balye ni bilala biramekho.’ ”

44Nashiryo umwakaanisi waabikabila babaandu khuubilya. Babaandu baalya, byaaramakho nga Umukasya n’aloma.