Swahili Bible2

3

Umuyiinga Yolamu uwa Isiraeli

1Mu mwiiko kweesi Yehoshafati aamalila kimiiko likhumi na shinaane nga ali umuyiinga wa Yuda, Yolamu umusooleli wa Ahabu, weekyela umuyiinga wa Isiraeli. Aawula khuumala kimiiko likhumi na kibili, nga amenya i Samariya. 2Yolamu waaminyaalila Umukasya, waakhola bibiindu bibikhali biilayi ta. Niye uwaminiangulaka shibuumbe sheesi paapawe aabuumba she khukhwisaaya ba wele babaandi, nashiryo niye s’aba umwoonaki naabi nga basaali beewe ta. 3Ne shitweela busa eloosela khuukhola bye bubwoonaki byeesi Yerobowamu, umwaana uwa Nebati aaleekela ba Isiraeli khuukhola.3.3 Nga Yerobowamu ali umuyiinga uwa Isiraeli, aabuumba tsimoosi tsibili khukhwaama mu zaabu. Indweela yaaba i Beseli, ikiindi i Dani, ari ba Isiraeli batsisaaye.

Ba Mowabu baminyaalila ba Isiraeli

4Abe yaamala khuubirawo imbuka ingali nga shibala sha Mowabu shiwulibwa ni Isiraeli, nga shili ni khuuwayo kumusolo isi bayiinga ba Isiraeli. Umuyiinga Mesha uwa Mowabu abe ali umubayi we kamasheese, ni nashiryo abe asasula kumusolo kuno nga awaanayo kamasheese kamaana kumweeka mutweela (100,000), ni bubwooya bweesi babekile khu mamiiku kumweeka mutweela (100,000). 5Ne lwanyuma lwe khuufwa khwa Ahabu, Mesha waaminyaalila ba Isiraeli. 6Nashiryo, shifukhu shitweela umuyiinga Yolamu waarura i Samariya, waatsya nga abusaasa liiye lya Isiraeli lyoosi. 7Kila arumanisa buurume isi Yehoshafati umuyiinga uwa Yuda nga buloma buri, “Umuyiinga uwa Mowabu waaminyaalile ise; iwe unyala waanjeeta mu khumusoolanisa?”

Yehoshafati welamo ari, “Kane ikhuyeete. Iwe ni nase khuli shiindu shitweela. Ise ndi atweela ni nawe, ikhaba basilikhale baase ni tsiŋwaaŋwa tsase byoosi bili bibyoowo.” 8Ne wereeba ari, “Ne kane khwaamile khu luwaande shiina?”

Yolamu welamo ari, “Kane khwaamile luwaande lwe kumubiimbi kwa Edomu.”

9Nashiryo Yolamu, ni Yehoshafati, atweela n’umuyiinga uwa Edomu, baraangilila kamaye kaabwe baatsya khukhwibwakala. Ne lwanyuma lwe biifukhu musaafu, alekha khubawo kameetsi ke babaandu namwe bisolo khuunywa ta. 10Shino shaakila umuyiinga Yolamu uwa Isiraeli waaloma ari, “Nga shiibi! Umukasya waakhureerire ifwe ano, ari nio khuwaanibweyo mu makhono ke liiye lye ba Mowabu?”

11Kila Yehoshafati areeba ari, “Ano sikhulikho n’umuŋoosi w’Omukasya, isi ifwe khunyala khwereebakho sheesi Umukasya akana ifwe khukhole ta?”

Kila mutweela khu baaraangilisi mu liiye lya Yolamu aloma ari, “Elisha umwaana uwa Shafati, ali ano ni nafwe. Ali mutweela khuubo babaaraambila atweela ni Eliya.”

12Yehoshafati welamo ari, “Uyo anyala waakhuwa ifwe buurume khukhwaama isi Umukasya.” Baryo bayiinga bataru bano baatsya isi Elisha.

13Elisha waareeba Yolamu ari, “Shiina kila mwiitsile isi ise? Ni mutsye isi baŋoosi be bawele be kamanaambo kakaandi, beesi basaali beenywe besaayatsaka.”3.13 Bano baaba baŋoosi ba Bayaali, wele we ba Kanani, ni Ashera, wele umukhasi.

Kila Yolamu naye elamo ari, “Sishinyalikha ta, khulwekhuuba Umukasya niye ukhureerire ifwe ano, ari liiye lye ba Mowabu likhuwaambe ifwe fweesi.”

14Elisha waamwiilamo ari, “Ise ndi umuŋoosi uwa Wele, umunyali uwa byoosi. Ne imbetsubila indi ilekha khuba khulwa Yehoshafati, umuyiinga uwa Yuda isi ise nisamo lukoosi, khali ise simbalolileyo namwe khali simbayeetile ta. 15Ni mundeerere umuundu unyala khuukhupa lituungu.”

Uyo n’arakikha khuukhupa lituungu, kamaani k’Omukasya keekha khu Elisha waafuna buurume. 16Waaloma ari, “Umukasya alikho aloma ari, kane awaambe tsintsitsi tsitsooma, atsikelisemo kamatibo ke kameetsi. 17Umukasya aloma ari inywe singene mubonekho ifula namwe imbewo ta, ne tsintsitsi tsitsamala khukhwooma tsinetsusibwa ni kameetsi, nio inywe ni bisolo byeenywe munyalise khuunywa. 18Isho shili shishiindu shishaangu naabi isi Umukasya, naluundi kane abawe inywe kamaani ke khuuwula ba Mowabu. 19Kane inywe muwaambe biriimba byaabwe byoosi, byeesi baabotokhelesa ni kamatikiiyi, ni nebyo bibiili bikhulu. Inywe mukhaareme kimisaala kyoosi kikiili kimilayi, mwoonakise tsisebele tsaabwe tsoosi, naluundi mwoonakise liiloba lyaabwe lilyaama biilyo naabi ilyo, nga mulibiimbilila ni kamabaale.”

20Ni bwasha kumutishinyi khu shifukhu shisheelakho, nga imbuka iye khuuwaanayo isaayilo yoolile, khaangukho kameetsi kaarakikha khukhwiikha nga kaamila khu luwaande lwe Edomu, kaasalasala shibala shoosi.

21Nga bino bishiili biryo, abe ba Mowabu baawuliile bari bayiinga bataru balikho beetsa khu bebwakala. Abe baabuusanisile basoolani baabwe, khukhwaamila khu bahele khukhwoolela ilala khu baasakhalu. Abe basoolani bano beemikhile khu lwaakha, nga bali berekefu khusoolana. 22Kumutishinyi ukwo liiye lye ba Mowabu ni lyaasisimukha, lyaabona nga inyaanga yakhoseleele khu meetsi, nga kalikho kabonekha kamabesemu nga kamafuki. 23Kila baloma bari, “Bona kamafuki ako! Kamaye ke bayiinga abo kali ni khuuba nga kasoolane keranire kameene. Ni mubire khutsye khunuule byeesi balekhile.”

24Ne ni boola mu kaambi iye ba Isiraeli, liiye lye ba Isiraeli lyenyukha lyabebwakala, khukhwoolisa ni batitukha baatsya. Ba Isiraeli beloosela khubatimisa nga beera ba Mowabu. 25Ba Isiraeli bawaamba naluundi boonakisa biriimba bye ba Mowabu. Baaremaka kimisaala kimilayi kyoosi, naluundi boonakisa tsisebele tsaabwe tsyoosi. Bamwaata kamabaale khu buli liiloba liilayi lyoosi, khukhwoolisa liloba lyaabwe liilayi lyoosi ni lyeetsula kamabaale konyene.

Ikhumaliilisa, shiriimba she Kiri-Haresesi shonyene shisharama nga sibashoonakisile ta. Ne shitweela busa basilikhale nga bawaambile kamabaale baashibotookhelela, baashibwakala, khukhwoolisa ni baashiwaamba. 26Umuyiinga Mesha uwa Mowabu n’abona ari bakana khumufuura mu busoolo, wawaamba basilikhale beewe bitoondo musaafu (700), nga buli mutweela ali ni lurima, baatsya nga bakana babirire isi baselikhale ba Edomu baabuusanila. Ne baalekha khunyalisa ta. 27Lwanyuma waabukula umwaana weewe umusiinde abe ukhaamusikhile mu bikele byeewe nga umuyiinga, waamura khu litikiiyi lye shiriimba, waamuwaanayo nga isaayilo intsoshe. Shino shareera naabi lirima mu maye ke ba Isiraeli, waakila baantsukha shiriimba beelayo ingo waabwe.