Swahili Bible2

25

Khuuwaambibwa khwa Yerusalemu

(2 Bye Kimiboolo 36.13-21; Yeremiya 52.3b-11)

125.1: Yer 21.1-10; 34.1-5; Ezek 24.2Nga Zedekiya wolisile kimiiko syeenda mu buwuli, waaminyaalila Nebukaduneeza, umuyiinga wa Babulooni. Uri khu shifukhu shishikhola likhumi mu mweesi kwe likhumi, Nebukaduneza umuyiinga uwa Babulooni tsana yuno weetsa ni liiye lyeewe webotookhelela Yerusalemu. Ibulafu we lumako lwe shiriimba, boombakhayo i kaambi ni bye khuuniinilakho. 2Nashiryo baarama nga bebotokheleele shiriimba, khukhwoolisa nga Zedekiya wawulile khuumala kimiiko likhumi na mutweela. 3Khu shifukhu shikhola syeenda mu mweesi kukuukhola khane mu mwiiko kwe likhumi na mutweela kwe buwuli bwa Zedekiya, intsala iye kamaani yakwawo, nga buli aandu mbaawo biilyo ta. 425.4: Ezek 33.21Kila baselikhale be Babulooni bawumbulakho liitikiiyi, ne umuyiinga Zedekiya ni baselikhale boosi mu shilo isho baatitukha baarura mu shiriimba, nga babirira mu shilibwa shishiili akari e kamatikiiyi. Babirira khu luwaande lwe kumukuunda kw’omuyiinga ikhaba nga ba Babulooni baabawo. Banyololokha baatsya khu luwaande lwe Litila lya Yorudaani. 5Ne liiye lye ba Babulooni lyaloonda khu muyiinga Zedekiya, lyamuwaambila i Yeriko, ne baselikhale beewe boosi baasalanilaka busa. 6Baryo bawaamba umuyiinga Zedekiya, baamuyila isi Nebukaduneza, umuyiinga uwa Babulooni abe uli i Ribula. Ibweene iyo baamukhalila kumusaango. 725.7: Ezek 12.13Beera babaana ba Zedekiya nga umweene abona, baamutomolakamo tsimoni tseewe, baamubowa kiminyololo kya buroonzi, baamuyila i Babulooni.

Khukhwoonakisa Liisaayilo Liikhulu

(Yeremiya 52.12-23)

8Khu shifukhu she kumusaafu mu mweesi kukuukhola kharaano, mu mwiiko kwe likhumi na syeenda kwe buwuli bwa Nebukaduneza, Nebuzaradani, nga abe niye umuraangilisi uwe liye lya Babulooni, woola mu Yerusalemu. 925.9: 1 Bay 9.8Woosha Liisaayilo Liikhulu, ni lubili lw’omuyiinga ni tsintsu tsyoosi mu Yerusalemu. Woosha tsintsu tsindayi tsyoosi mu shiriimba. 10Liiye lye ba Babulooni lilyaba ni naye lyafuniaaka kutikiiyi abe kukwebotookhelela Yerusalemu. 11Nebuzaradani umuraangilisi uwe liiye, wawaamba babaandu babaarama mu shiriimba boosi, ni naabo babaatitukha beyuunga khu muyiinga uwa Babulooni, nga waareerekho ni babaandu babaandi baakali, boosi waabayila mu bubowe. 12Ne waalekhayo mu Yuda abo babaaba baminyisakho butaambi, baarama khu khwaaka kimizabibu ni khuulima kimikuunda.

1325.13 a 1 Bay 7.15-26; 2 Kim 3.15-17; b: 1 Bay 7.23-26; 2 Kim 4.2-5Kimisiindi kya buroonzi, ni kimikhoondi kya buroonzi abe bibiili mu Liisaayilo Liikhulu, ba Babulooni baabifuniaakamo bisiintsa, baabisuta baatsya ni nabyo. 1425.14: 1 Bay 7.45; 2 Kim 4.16Naluundi baasuta tsisoongwe, bitiiyo bibiyoola liiloba, byeesi baraambisa khuusimisa tsitaala, bipwakhuli bye bubaani, ni bibiindu bya buroonzi byoosi abe bibiraambisibwa mu Liisaayilo Liikhulu. 15Baasuta ikhaba tsisefuluya, tsisowaani, ni neebyo byoosi abe bibyakholebwa mu zaabu ni mu feetsa. 16Ne aabawo kimisiindi kibili kyeesi abe umuyiinga Solomoni aabuumba kya buroonzi nga kili mu Liisaayilo Liikhulu, kyaba nga kimisiro naabi. 17Abe buli kusiindi kwoolisa tsifuuti kabili na musaafu buuleeyi, nga barukhilakho buubeya bwa buroonzi bibiindi khuukibotokhelesa.

Babaandu ba Yuda bayilibwa mu bubowe

(Yeremiya 52.24-27)

18Umukhulu uwe liiye uyo waayila umusaayi umukhulu Seraya, n’umuloondakho bari Zefaniya, ni babaandu bataru abe babaliinda khu mulyaango. 19Weloosela waayila umuraangilisi uwe liiye abe liliili mu shiriimba, ni babaandu baraano abe babaali khu lukhobo lw’omuyiinga; n’umuroni uw’omuraangilisi uwe liiye lya Yuda, nga niye uwingisa babaandu mu maye; ni baselikhale babaandi kamakhumi kasesaba babaaramakho beesi banyoola mu shiriimba. 20Abo boosi Nebuzaradani wabayila i Ribula, isi umuyiinga uwa Babulooni abe ali. 21Nga boolile i Ribula, mu shisiintsa she Hamasi, umuyiinga uwa Babulooni Nebukaduneeza waabeera boosi. Nashiryo babaandu be mu Yuda baasiindikhibwa mu bubowe, mu liloba lilikhali lilyaabwe ta.

Gedaliya awula Yuda

(Yeremiya 40.7-9; 41.1-3)

2225.22: Yer 40.7-9Umuyiinga Nebukaduneza waarobora Gedaliya, umwaana wa Ahikamu, naluundi umwitsukhulu uwa Shafani, khuuba umuwuli we babaandu babaarama mu Yuda. 23Ari baaraangilisi be kamaye babaaramire ni baawulila bari umuyiinga uwa Babulooni waaroboore Gedaliya nga umuwuli, baatsya ni kamaye kaabwe i Mizipa, isi aaba. Mu baandu bano mwabamo Ishimayili umwaana uwa Nesaniya, Yohanani umwaana uwa Kareya, Serayiya umwaana uwa Tanihumesi uwaama i Netofa, ni Yazaniya abe uwaama i Maaka.

24Gedaliya waabetsubila nga abaloma ari, bakharya ba Babulooni ta. Waabalomela ari bamenye mu lukoosi nga bafukiilisa umuyiinga uwa Babulooni khuuba umuwuli waabwe, ari singene ibewo buwaangafu bwoosi ta. 2525.25: Yer 41.1-3Ne lwanyuma lwe kimyeesi musaafu, Ishimayili umwaana uwa Nesaniya, naluundi umwitsukhulu uwa Elishama, nga be mu shikuuka sh’omuyiinga, waatsya ni babaandu likhumi webwakala Gedaliya waamwiira. Weera ni Bayudaaya ni ba Babulooni abe babaali i Mizipa. 2625.26: Yer 43.5-7Shino shaakila babaandu boosi, khukhwaamila khu we aasi khukhwoolisa khu be angaaki, ni baaraangilisi be kamaye, boosi benyukha belukhila i Misiri; khulwe khuurya ba Babulooni.

Yehoyakini bamulekhuula khukhwaama mu bubowe

(Yeremiya 52.31-34)

27Nga Yehoyakini waamalile kimiiko kamakhumi kataru na musaafu mu bubowe, Evili-Merodaki wekyela umuyiinga mu Babulooni. Khu shifukhu she kamakhumi kabili na musaafu, mu mweesi kwe likhumi na kibili, kumwiiko kweesi aarakikhilamo khuuwula, wawaambila Yehoyakini shiisa waamulekhuula. 28Waabirisa Yehoyakini buulayi, naluundi waamuniinisa angaaki khuumiinyisakho bayiinga babaandi babaaramire abe babaali mu bubowe mu Babulooni. 29Nashiryo Yehoyakini weyabula bikwaaro bye buubowe. Waalyatsaka biilyo atweela n’umuyiinga. 30Umuyiinga uwa Babulooni waalakila ari bamuwatsake tsinusu tseesi ali ni khuuraambisa khukhwoolisa n’alifwa.