Swahili Bible2

23

Byeesi Yosiya aashuusaŋanamo

(2 Bye Kimiboolo 34.3-7,29-33)

1Lwanyuma umuyiinga waarumanisa baamulaangila baaraangilisi be mu Yuda ni mu Yerusalemu boosi beetsa isi ali. 2Kila umuyiinga, nga ali atweela ni babaandu boosi be mu Yuda ni babaamenya mu Yerusalemu, ni basaayi, ni baŋoosi, atweela ni babaandu boosi khukhwaamila khu we aasi khukhwoolisa khu we angaaki, baatsya mu Liisaayilo Liikhulu. Umuyiinga waasoma bilomo byoosi bye mu Shiitabo she Indakaano shishanyoolikhana mu Liisaayilo Liikhulu, nga babaandu boosi baareekeresile.

3Umuyiinga waatsya weemikha a shisiindi kila akhola indakaano mu moni tsy’Omukasya. Wetsuba ari niye kane aloondelelatsake byeesi Umukasya aloma, naluundi aloondelele kamakaambila, khuleekela ni biilakilo by’Omukasya, ni kumwoyo kweewe kwoosi, ni buulamu bweewe bwoosi. Ari kane akholatsake khuuloondekhana ni bilomo bibyaronebwa mu shitabo shino; ni babaandu boosi nabo betsuba khukhola baryo.

423.4: 2 Bay 21.3; 2 Kim 33.3Kila umuyiinga alakila umusaayi Hilikiya, ni basaayi babaandi, ni naabo abe babaliinda khu shilibwa she Liisaayilo Liikhulu, khuurusa ibulafu bibiindu byoosi abe bibiraambisibwa khukhwisaaya wele Bayaali, ni wele Ashera, ni ba wele babaakhali batweela ta. Aryo waabiyila ibulafu wa Yerusalemu, waabyookhela mu litila lye Kiduroni, waasuta likoshe waaliyila i Beseli.

5Basaayi abe babaakhola kumulimo kwe bubwoonaki kuno nga abe nibo beesi bayiinga ba Yuda baamala khaale khuurobora, khuraangilila khukhwisaaya khuno mu Yerusalemu, ni biriimba bya Yuda, waabarusa khu milimo boosi. Ni naabo boosi abe babesaaya nga boosha bubaani isi wele Bayaali, ni isi inyaanga, ni isi kumweesi, ni isi tsinieniesi, ni isi ba wele babaakhali batweela ta, boosi waabakamisa. 6Kila arusa kusiindi kwa wele Ashera ibulafu we Liisaayilo Liikhulu, waakuyila ibulafu wa Yerusalemu, waakwookhela mu litila lye Kiduroni. Lwanyuma waasya likoshe lyakwo, waaliyila waalisalanisa khu biliindwa mweesi baasikha babaandu ba busheele. 7Waafuniaaka binamwiima byeesi abe bakholelamo buyeyani mukari mwe Lisaayilo, abe mweesi bakhasi bakholela byeesi tsingubo tseesi baabiimba khu wele Ashera.

8Yosiya waakobosa basaayi b’Omukasya boosi abe babaamenya mu Yuda, khuuba mu Yerusalemu. Woonakisa bibyeeso abe khweesi booshela bubaani, khukhwaamila ilala i Geba khukhwoolisa i Berisheba. Naluundi waafuniaaka bibyeeso abe bibiili khu shilibwa sha Yoswa, umuwuli uwa Yerusalemu. Shilibwa shino abe shili khu mukhono kumunyeletsi kwe shilibwa shikhulu. 9Ne basaayi abe babesaayila khu byeeso bye ba wele babaandi balekha khufukiilisibwa khuutsya khwakaanisa mu Liisaayilo Liikhulu ta. Akhali bafukiilisibwa khuulya kimikaati kikikhalimo kamamela ta, ni basaayi babaandi.

1023.10 a Yer 7.31; 19.1-6; 32.35; b: Lev 18.21Umuyiinga wafuniaaka shiifwo Tofesi shishiili mu litila lye basoleeli ba Hinomu, ari nio alekhe khubawo umuundu wuutsya khwookhelakho umwaana weewe nga isaayilo, nga isaayilo isi Moleki ta. 11Waarusawo mu mulyaango kwe Liisaayilo Liikhulu, bifwaani bye tsiŋwaaŋwa, byeesi abe bayiinga ba Yuda bawaanayo isi inyaanga nga bakisaaya. Abe bili aambi ni isi Nasani Meleki umwomole, akona. Woosha ni kamakaali abe keesi batsikholela.

1223.12: 2 Bay 21.5; 2 Kim 33.5Wafuniaaka ni bibyeeso byeesi abe bayiinga ba Yuda bombakha khuntsu ya Ahazi khu ngaaki; ikhaba bibyeeso bibili byeesi abe Manase ombakha mu lwaanyi lwe Liisaayilo Liikhulu. Wabiminiaangulamo kila abisalanisa mu litila lye Kiduroni. 1323.13: 1 Bay 11.7Umuyiinga waafuniaaka bibyeeso bye ba wele babaandi abe bibiili ibwaamanyanga wa Yerusalemu, imwaalo we lukiingi, abe byeesi umuyiinga Solomoni ombakhila Ashitolesi, wele we ba Sidoni; ni Kemosi, wele we ba Mowabu; ni Moleki, wele we ba Amoni. 14Wafuniaaka bisiindi, naluundi waaremakamo kimisiindi kya wele Ashera. Waatsuba biifwo bino nga asalanisamo kamakuumba ke baafu.

1523.15: 1 Bay 12.33Umuyiinga waafuniaaka shisheeso abe sheesi Yerobowamu umwaana uwa Nebati, ombakha i Beseli, nga n’akila ba Isiraeli boonaka isi Wele. Waaminiaangula shisheeso isho shoosi; woosha ni kusiindi kwa Ashera. 1623.16: 1 Bay 13.2Yosiya ni eshebukha waabona tsiŋani khu lukiingi. Waalakila baatsya baasyukhuluula kamakuumba, baakayila baakooshela khu byeeso ibyo, nio tsilekhe khuraambisibwa luundi ta. Shino shakholikha khuuloondekhana ni bilomo byeesi Umukasya aaloma khuubirira mu muŋoosi, ari bikhaabe biryo.

1723.17: 1 Bay 13.30-32Kila areeba ari, “Shibuumbe sheesi indikho imbona isho shili sha shiina?”

Kila bamwiilamo bari, “Ili iŋani iy’omuŋoosi uwaama mu Yuda, uweetsa ino waaloma ari bibiindu byeesi iwe ukholile khu sheeso she Beseli, bilikholikha.”

18Kila umuyiinga abeelamo ari, “Ni mukilekhe ibe; mukhashukhuluula kamakuumba keewe ta.” Nashiryo balekha khushukhuluula kamakuumba keewe ta, atweela ni naako k’omuŋoosi uwaama i Samariya.

19Umuyiinga woonakisa ni bibyeeso byoosi abe bibiili mu biriimba bya Samariya, byeesi abe bayiinga ba Isiraeli bombakha. Bino nibyo bibyakila Umukasya lirima lyaamuwaamba. Bibyeeso bino waabikhola shitweela busa nga n’akhola ibyo bye mu Beseli. 20Waakhoonyela basaayi be bibyeeso bye ba wele babaandi khu byeeso byeene, naluundi khu byeeso ibyo, wookhelakho kamakuumba ke babaandu. Lwanyuma waakobolayo mu Yerusalemu.

Yosiya atweela ni babaandu bekhoyela kamayiiya ke Khuubirakho

(2 Bye Kimiboolo 35.1-19)

21Umuyiinga waalakila babaandu boosi nga abalomela ari, “Muli ni khuukhola kamayiiya ke shifukhu sh’Omukasya Wele weenywe she Kamayiiya ke Khuubirakho, musaambo isi sharonebwamo mu Shiitabo she Indakaano.” 22Khukhwaama khu biifukhu byeesi Baakayi baabeelamo baawuli, namwe imbuka yoosi iye bayiinga ba Isiraeli namwe ba Yuda, abe s’abatsakawo kamayiiya nga kano ta. 23Kamayiiya ke Khuubirakho kano baakaliila mu Yerusalemu, nga Yosiya waamalile kimiiko likhumi na shinaane nga ali umuyiinga.

Tsishuukhashuukha tsitsiindi tseesi Yosiya aakhola

24Yosiya weloosela warusawo balakusi, balosi, ni ba wele ba buli muungo, ni tsisaambo tsitsiindi tsye khukhwisaaya bifwaani, mu Yerusalemu ni mu Yuda mwoosi. Akhola shino ari nio anyalise khurawo bilomo bibyaronebwa mu shitabo sheesi umusaayi Hilikiya anyoola mu Liisaayilo Liikhulu. 25Khu bayiinga babaamunyoowa niye khuuwula, mbaawo na mutweela uwaloondelela Umukasya ni kumwoyo kweewe kwoosi, ni buulamu bweewe bwoosi, ni kamaani keewe koosi, nga baloondelela kamakaambila ka Musa, nga niye ta. Ikhaba abo babeelawo lwanyuma lweewe, mbaawo umuyiinga uwaba nga niye ta.

26Ne shitweela busa lirima ni buurafu by’Omukasya isi babaandu ba Yuda sibyakama ta, khulwe bibyoonako byeesi umuyiinga Manase aakhola. 27Khulwekhuuba abe Umukasya waaloma ari, “Ikhoonakise Yuda ingimalewo nga ni noonakisa Isiraeli. Ikhekaane ni babaandu abo, ikhaba ni shiriimba Yerusalemu, ikhaba ni Liisaayilo Liikhulu mweesi abe naloma ndi bali ni khukhuuntsisaayilamo.”

Khuufwa khwa Yosiya

(2 Bye Kimiboolo 35.20—36.1)

28Bibiindu byoosi bibiramire byeesi Yosiya aakhola byaronebwa mu Shiitabo she Bikholwa biikhale bye Bayiinga ba Yuda.

29Nga Yosiya ashiili umuyiinga, Faraawo Neko, nga niye umuyiinga uwa Misiri, waatsya woola khu luutsi Efurati, khuuyeeta umuyiinga uwa Asiriya. Umuyiinga Yosiya waatsya ni liiye lyeewe khuumusoolanisa; ne Faraawo Neko weerira Yosiya i Megido. 30Kila baselikhale beewe basutila kumulaambo mu likaari lyeesi tsiŋwaaŋwa tsikhweesa, khukhwaama i Megido, baamureera i Yerusalemu. Baamusiikha mu ŋani yeewe. Kila babaandu bawaamba Yehoahazi umwaana wa Yosiya, baamubiita, baamwikyelisa niye umuyiinga mu shifwo sha paapa weewe.

Umuyiinga Yehoahazi

(2 Bye Kimiboolo 36.2-4)

31Yehoahazi ekyela umuyiinga nga olisa kye buukhulu kabili na kitaru. Waawula nga ekhala mu Yerusalemu khuumala kimyeesi kitaru kyonyene. Maayi weewe abe bari Hamutali, umukhaana uwa Yeremiya uwe Libuna. 32Waakhola bibyoonako mu moni tsy’Omukasya, nga bakuuka beewe ni baakhola. 33Faraawo Neko waamuwaamba, waamubowela mu mapuusu i Ribula, shishiili mu Hamasi, nga s’akana awule nga ekhala i Yerusalemu ta. Naluundi Neko waamukanakho ari asasule kumusolo kukwoola tsi talanta tsy’efeetsa shitoondo shitweela n’italanta ndweela iy’ezaabu. 3423.34: Yer 22.11,12Faraawo Neko wawaamba Eliyakimu umwaana uwa Yosiya, waamwikyelisa niye khuuba umuyiinga mu shifwo sha paapa weewe, naluundi waashuusa lisiina lyeewe khukhwikyela Yehoyakimu. Baayila Yehoahazi i Misiri nga umubowe, khukhwoolisa n’afwiila n’ibweene iyo.

Yehoyakimu ekyela umuyiinga wa Yuda

(2 Bye Kimiboolo 36.5-8)

35Yehoyakimu waawa Faraawo ifeetsa n’izaabu byeesi akana; ne waara khu baandu kumusolo kumukali naabi. Waabuusa bibiindu bino mu bukali naabi, ne nga abibuusa khuuloondekhana ni buyiindifu bwa buli mutweela.

3623.36: Yer 22.18,19; 26.1-6; 35.1-19Yehoyakimu ekyela umuyiinga nga ali ni kimiiko kye buukhulu kamakhumi kabili na kiraano. Waawula khuumala kimiiko likhumi na mutweela nga ekhala mu Yerusalemu. Lisina lya maayi weewe abe bari Zebida, umukhaana uwa Pedaya, uwe Ruma. 37Yehoyakimu waakhola bibyoonako mu moni tsy’Omukasya nga bakuuka beewe boosi ni baakhola.