Swahili Bible2

22

Yosiya ekyela umuyiinga wa Yuda

(2 Bye Kimiboolo 34.1-2)

122.1: Yer 3.6Yosiya ekyela umuyiinga nga ali ni kimiiko shinaane kye buukhulu. Wawula khuumala kimiiko kamakhumi kataru na kibili nga ekhala mu Yerusalemu. Maayi weewe abe bari Yedida, umukhaana uwa Adiya, uwe i Bosikasi. 2Wakhola bibiindu bibikhoyesa Umukasya, naluundi niye webirisa nga kuuka weewe Dawudi n’akholatsaka. Niye wakholatsaka bibiindu biilayi byonyene.

3Nga Yosiya waawulile khuumala kimiiko likhumi na shinaane, kila arumana Shafani umusoleeli uwa Azaliya, naluundi umwitsukhulu uwa Mesulamu, nga abe niye umuroni uwe mu lubili, khuutsya mu Liisaayilo Liikhulu. Waamulomela ari, 4“Tsya isi Hilikiya umusaayi umukhulu, umulome abale tsinusu tseesi be khu bilibwa bamalile khubuusa khukhwaama khu baandu, khu Liisaayilo Liikhulu. 5Lekha kamapeesa kano bakawe abo babaali khuraangilila kumulimo kwe khuŋoona Liisaayilo Liikhulu. Baryo bakaraambise khusasula abo babaraamba khu khuŋoona Lisaayilo Likhulu. 6Bakasasule isi baboombakhi, ni babaabiimba khu ngaaki, ni babaakhootsa kamabaale, naluundi ni khuukula tsimbaawo ni kamabaale kakaakanibwa. 722.7: 2 Bay 12.15Mbaawo ukhaabareebe bye mbalilila iye tsinusu tsino ta, khulwekhuuba bali babeyikinwa.”

8Kila Hilikiya alomela Shafani umuroni uwe mu lubili ari, “Naanyoolile Shiitabo she Kamakaambila mu Lisaayilo ly’Omukasya.” Hilikiya waashiwa Shafani, waashisoma.

9Shafani weelayo isi umuyiinga wamuboolela ari, “Babaakaanisi boowo babukuule kamapeesa koosi keesi banyoolile mu Liisaayilo Liikhulu, bakaweele abo babaali khuraangilila kumulimo kwe khuŋoona Lisaayilo.” 10Lwanyumakho ndi Shafani waalomela umuyiinga ari, “Umusaayi Hilikiya ambeele ise Shiitabo.” Shafani waashisomela umuyiinga.

11Umuyiinga n’awulila bilomo bibyaama mu shitabo she Kamakaambila, khulwe kumutaambo kumukali wonuulaka bikwaaro byeewe. 12Kila umuyiinga alakila Hilikiya umusaayi, Shafani, atweela ni Ahikamu umusoleeli uwa Shafani, ni Akibori umusoleeli uwa Mikayiya, ni Asaya umwakaanisi uw’omuyiinga, nga abaloma ari, 13“Ni mutsye mu Lisaayilo muntsireeberekho isi Umukasya, ni khulwe babaandu boosi, ni mu Yuda mwoosi, bibiwaamba khu bilomo bye mu shitabo sheesi banyoolele. Umukasya waakhuwaambiile ifwe lirima liikali naabi, khulwekhuuba bakuuka beefwe sibaaloondelela bibiindu bibiili mu shitabo shino ta. Khuli ni khuutsiila khu biindu bibiili mu shitabo shino.”

14Nashiryo umusaayi Hilikiya, ni Ahikamu, ni Akibori, ni Shafani, ni Asaya, baatsya khukanikha isi Huluda, umuŋoosi umukhasi. Abe ali umukhasi uwa Shalumu umwaana uwa Tikuva, naluundi umwitsukhulu uwa Harihasi, nga niye uliinda bikwaaro bye mu Liisaayilo Liikhulu. 15Kila Huluda abalomela sheesi Umukasya Wele uwa Isiraeli aaloma ari batsye baboolele umuundu uwabaruumana. 16Buurume ubwo khukhwaama isi Umukasya bwaloma buri, “Bona ise intsya khuhesa shiriimba shino Yerusalemu ni babaandu babaashimenyamo boosi, shibe busa nga bilomo bye mu shitabo sheesi umuyiinga asomele nga ni bili. 17Babaandu baase baakilile ise naabeele ni lirima khulwekhuuba baandurire khusiise, baatsiile khukhwisaaya ba wele babaandi. Nashiryo ise inookesanisa shiifwo shino lirima lyase, naluundi singene lyaakame ta. 18Ne isi umuyiinga wa Yuda ubarumaane khukhwireeba khu Mukasya mumulomele muri, Umukasya Wele wa Isiraeli waalomile ari: Shishiwaambakana ni bilomo byeesi iwe uwuliile, 19Umukasya waakaaniile khuuloomba khwoowo. Khulwekhuuba kumwoyo kwoowo kwebiyisile, naluundi iwe wamweene wewosile mu moni ts’Omukasya, nga n’uwuliile byeesi ise inganikhile khu shifwo shino ni babaandu baasho, nga noma ndi bali ni khuuhela bawewo. 20Ni nashiryo, khukhwoolisa nga iwe waamalile khuufwa, naluundi nga baakhusiikhile mu lukoosi, bihangafu bino singene bikwewo ari, khukhwoonakisa shiifwo shino ta.”

Kila beesayo buurume buno isi umuyiinga.