Swahili Bible2

2

Umukasya ayila Eliya

1Ari nga abe Umukasya ali aambi khuuyila Eliya mwikulu nga araambisa ikhuungu iye kamaani, Eliya ni Elisha baaba bali khu lukyeendo khukhwaama i Giligali. 2Kila Eliya alomela Elisha ari, “Umukasya waanganile ari ise intsye i Beseli, ne iwe n’urame ano.”

Elisha welamo ari, “Ise ikhwitsubila iwe mu moni tsoowo ni mu moni tsya Wele indi, abe shakhaba shiina, ise singene ikhulekhekho na khafwiiti ta.” Nashiryo baatsya boombi i Beseli.

3Lituuli lye baŋoosi abe babaamenya i Beseli baareeba Elisha bari, “Iwe waamanyile nga shaleelo shino Umukasya atsya khukhurusakho iwe Eliya?”

Waabeelamo ari, “Ise naashimanyile. Ne inywe mukhenaanayo ta.”

4Kila Eliya aloma ari, “Elisha, ari Umukasya ali khuukana ari ise intsye i Yeriko, ne iwe n’urame ano.”

Elisha weelamo ari, “Ise ikhwitsubila iwe mu moni tsy’Omukasya, ni tsitsoowo wamweene indi, abe shaakhaba shiina, ise singene ikhulekhekho na khafwiiti ta.” Aryo waatsya ni Eliya i Yeriko.

5Lituuli lye baŋoosi babaamenya i Yeriko baareeba Elisha bari, “Iwe waamanyile nga shaleelo shino Umukasya atsya khukhurusakho iwe Eliya?”

Naye waabeelamo ari, “Ise naashimanyile. Ne inywe mukhenaanayo ta.”

6Kila Eliya alomela Elisha ari, “Ari Umukasya ali khuukana ari ise intsye khu luutsi Yorudaani, ne iwe n’urame ano.”

Elisha weelamo ari, “Ise ikhwitsubila iwe mu moni tsy’Omukasya, ni tsitsoowo wamweene indi, abe shaakhaba shiina, ise singene ikhulekhekho na khafwiiti ta.” Baryo baatsya boombi.

7Baŋoosi kamakhumi karaano khukhwaama i Yeriko baloonda khu Eliya ni Elisha, ne nibo beemikha aleeyikho balolelela basaani babili bano nga bakyeenda batsya khu luutsi. 8Nga boolile khu luutsi, Eliya wefuula ingubo yeewe iye khu ngaaki, waakifuumbamo waakhupa khu meetsi. Kameetsi kaawukhanamo khabili, eyi ni neeyi, waakila boombi baabirira busa khu liloba lilyoomu.

92.9: Maka 21.17Nga baamalile khukhwaambukha shangelekha, Eliya waalomela Elisha ari, “Nga Umukasya ashiili khukhuundusawo ise naatsya ta, iwe n’uloombe sheesi ukana ise ikhukholele.” Elisha waaloma ari, “Inoomba ndi khali iwe umbeele ise umwoyo khuuba busikha bwase, uminyisakho uyo isi uwa babaandu babaandi.”

10Eliya waamwiilamo ari, “Ikhaba nga iwe waaloombile shishiindu shihangafu naabi, ne shitweela busa nga ni kane ubone, nga ise ikhurusibwakho intsya, kane ufune sheesi uloombile. Ne nga siwaaboone nga ise ikhurusibwakho ta, singane ushifune ta.”

11Ni baaba nga bakyeenda luundi nga bakanikha, khaangukho likaari lye kumulilo ni tsiŋwaaŋwa tsye kumulilo, byaabawukhanisa boombi. Ikhuungu iye kamaani yaasuta Eliya, yaamuyila mwikulu. 122.12: 2 Bay 13.14Elisha n’abona shino, waalila ari, “Paapa wase, paapa wase! Kamakaari ka Isiraeli ni tsiŋwaaŋwa byaayilile paapa wase!” Waalekha khwiilamo luundi khuubonakho Eliya ta.

Lwanyuma lwayo, Elisha wahaamba bikwaaro byeewe waabyonuulamo khabili. 13Kila abukula ikooti iya Eliya, abeele ikwiile aasi, weelayo waatsya weemikha khu ndulo khwe luluutsi Yorudaani. 14Waaraambisa ikooti nyene iyo khuukhupa khu meetsi, nga aloma ari, “Umukasya Wele wa Eliya, ali waheena?” Nga waakholile aryo, khaangukho intsila yeekukha mu meetsi, Elisha waambukhila khu liloba lilyoomu busa.

15Ari lituuli lye baŋoosi abe liliili i Yeriko ni baabona kamaani keesi Elisha ali ni nako, kila baloma bari, “Umwoyo abe uli khu Eliya, ari ali khu Elisha.” Bakyeenda baamutsyayo, baamwiinamila nga bamuwa shiriifwa. 16Kila bamulomela bari, “Bona ano iliwo basooleli be kamaani kamakhumi karaano. Khayo batsye baheentse Eliya. Winyoola manya umwoyo w’Omukasya waamusutile wamuyilile ahaandu khu lukiingi namwe mu litila.”

Elisha weelamo ari, “Mukhabarumana ta.”

17Ne ni baamuŋuunyilisa naabi, wamaaya waafukiilisa ari babarumane. Nashiryo baarumana basooleli kamakhumi karaano. Baamala biifukhu bitaru nga baheentsa Eliya ne baalekha khumunyoola ta. 18Ni baakobola i Yeriko isi Elisha kila abalomela ari, “Ise simbalomeele ndi mukharumana babaandu khuutsya khuweentsa ta?”

Elisha apyeelusa kameetsi i Yeriko

19Shifukhu shitweela babaandu be mu Yeriko baalomela Elisha bari, “Musaakhulu, nga nawe n’uboone, shiriimba sheefwe shili mu shifwo shilayi. Ne kameetsi keefwe sikali kamalayi ta, naluundi liloba lyeefwe silyaamakho biilyo buulayi ta.”

20Kila abalomela ari, “Bukula shipwakhuli shishaakha muremo kumuunyu, mushindeerere ano.” Babimureerera nga n’aloma. 21Kila atsya khu sebele iye kameetsi, wamwaatamo kumuunyu ukwo nga aloma ari, “Umukasya aloma ari, ari napyeluusile kameetsi kano luundi. Khukhwaama ari, kane mulimatsake bilimwa byeenywe mukyese, naluundi mukanywatsake.”

22Khukhwaamila abweene awo kameetsi ako kali kamalayi, nga Elisha n’aloma.

Basooleli balekelesa Elisha

23Elisha wenyukha khukhwaama awo, waatsya i Beseli. Ne n’aba khu ntsila nga alikho atsya, aabawo basooleli batweela babaamulekelesa nga bamulomela bari, “Ufwaana kukwoole, rura ano utsye! Ufwaana kukwoole, rura ano utsye!” 24Elisha weemikha washuukha waabaloleelela. Kila araambisa lisiina ly’Omukasya khuubatsuba. Khaangukho bibulukhu bibili byaama mu shitsakha byaalyakho basooleli kamakhumi kane na babili.

25Khukhwaama awo waatsya khukhwoola khu lukiingi Karumeli, kila elayo mu Samariya.