Swahili Bible2

18

Umuyiinga Hezekiya uwa Yuda

(2 Bye Kimiboolo 29.1-2; 31.1)

1Hezekiya umwaana uwa Ahazi ekyela umuyiinga uwa Yuda, nga Hosheya waawuliile mu Isiraeli khuumala kimiiko kitaru. 2Nga ekyela umuyiinga, abe oolisa kye buukhulu kabili na kiraano. Waawula nga ekhala mu Yerusalemu, khuumala kimiiko kabili na syeenda. Maayi weewe abe bari Abiya, umukhaana uwa Zekariya. 3Waakhola bibiindu biilayi mu moni tsy’Omukasya, waaba nga umukuuka weewe Dawudi n’akholatsaka. 418.4: Bala 21.9Waasambulaka biifwo bye khukhwisaayilamo ba wele babaandi, naluundi waaremaka kimisiindi kya wele Ashera. Waafuniaakakamo indemu iya buroonzi isi Musa aabuumba, khulwekhuuba abe babaandu ba Isiraeli bashiikisaaya. Abe bakilaanga bari Nehushitani. 5Hezekiya weyikinatsaka Umukasya Wele uwa Isiraeli. Yaalekha khubawo umuyiinga ukuundi uwe mu Yuda uwanyoowa khuubawo namwe uweelawo uwaba nga niye ta. 6Niye arama nga eyikina busa Umukasya yenyene, nga awulila by’Omukasya, naluundi nga aloondelela kamakaambila keesi Umukasya awa Musa. 7Nashiryo Umukasya waaba ni naye nga amuyeeta; abe buli byeesi akhola bimutsiila buulayi. Waaminyaalila umuyiinga uwa Asiriya, waaloba khuumuwa ni kumusolo. 8Waawula ba Filisitiya mu busoolo khukhwaamila ilala i Gaza khu liloba lyaabwe, khukhwoolisila ilala khu buriimba bufwiiti ni biboofu byeene.

9Mu mwiiko kukuukhola khane kwe buyiinga bwa Hezekiya, nga nikwo kukwaba kumwiiko kwe kumusaafu kwe buyiinga bwa Hosheya umuyiinga uwa Isiraeli, Shalumaneseri umuyiinga uwa Asiriya webotokhelela Samariya waashibwakala. 10Lwanyuma lwe kimiiko kitaru, nga nikwo kumwiiko kwa Hezekiya kukuukhola khasesaba, ne nga kukuukhola syeenda kwe buyiinga bwa Hosheya, Samariya bashiwaamba. 11Umuyiinga uwa Asiriya wasuta ba Isiraeli wabayila mu Asiriya, wabara i Hala, shishiili khu ndulo khwe luluutsi Habori mu Gozani, ni babaandi wabara mu Medi. 12Khulwekhuuba baloba khuuloondelela byeesi Umukasya Wele waabwe ababoolela. Bafuniaaka indakaano yeewe ikhaba ni neebyo byoosi byeesi Musa umwakaanisi w’Omukasya abalakila. Balekha khuubiloondelela ta.

Asiriya yibwakala Yuda

(2 Bye Kimiboolo 32.1-19; Isaaya 36.1-22)

13Mu mbuka iye kumwiiko kwe likhumi na kine kwe buyiinga bwa Hezekiya, umuyiinga Senakyeribu uwa Asiriya webwakala biriimba bya Yuda wabiwaamba byoosi. 14Nga umuyiinga uwa Asiriya ali i Lakisi kila Hezekiya amusiindikhila buurume nga buloma buri, “Ise naamanyile ndi sheesi ikholile shili shiibi. N’ulome basilikhale boowo mwiileyo; kane ise ikhuwe iwe shoosi sheesi kane unomele ise khukhola.”

Kila Senakyeribu amuloma khuwaanayo tsi talanta bitoondo bitaru, n’izaabu kamakhumi kataru. 15Kila Hezekiya amuwa ifeetsa yoosi iyanyoolikhana mu Lisaayilo, ni mu mabiikhilo k’omuyiinga. 16Hezekiya waatsya wobula ni zaabu khukhwaama khu milyaango kye Liisaayilo Liikhulu, ni khu milyaango kyeewe, wakiwa umuyiinga uwa Asiriya.

17Shitweela busa umuyiinga uwa Asiriya waasiindikha umuraangilisi uwe liiye lyeewe, n’umurobore uwaba mu lisiina ly’omuyiinga mutweela khukhwaama i Lakisi, nga bali ni liiye liikali khuutsya khwibwakala umuyiinga Hezekiya i Yerusalemu. Nga liiye lino lyoolile, baatsya beemikha aambi ni kumwaanya kukuureera kameetsi mu litibo lye angaaki, khu mukhoosi kukuutsya isi bashuusila bikwaaro iraangi. 18Baryo ni balaanga umuyiinga khuurura antsye, waabasiindikhila Eliyakimu umusoleeli wa Hilikiya, nga niye umuraangilisi we babaraamba mu lubili; ni Shebuna umuroni; ni Yowa umwaana wa Asafu, umanyile biikhale bye buyiinga.

19Kila umurobore uwaba mu lisiina ly’omuyiinga abalomela ari, “Lomela Hezekiya muri, umuyiinga umukhulu naabi uwa Asiriya, alikho ereeba ari bari, iwe ulikho wiyikina shiina kila ulikho wibirisa uryo? 20Iwe wambaasa uri khuuloma busa tsilomo tsyonyene shilekhaana ni kamaani ni kamakhula ke bye khuusoolana? Naanu isi iwe ulikho wiyikina kila uminyaaliile Asiriya? 21Namanyile ndi, ari iwe ulikho wiyikina Misiri! Ne iyo ili busa nga lukholo lulufunikhile, luluutsya khukhuwuna iwe mukhono kwoowo nga waalwitiilile. Faraawo umuyiinga uwa Misiri s’eyikinikhikha ta. 22Namwe ukana khunomela ise uri, ‘Ifwe khweyikinile Umukasya Wele weefwe!’ Ne waamanya uri bibyeeso byeewe byoosi Hezekiya aabifuniaaka waabimalawo, nga alomela babaandu ba Yuda ari, ‘Mweesi muli ni khuutsya khukhwisaayila Umukasya khu sheeso she mu Yerusalemu.’

23“Ise khayo ikhuboolele! N’ufukiilisane n’umuyiinga uwa Asiriya. N’uba bari uli ni basilikhale baboola bikana bibili (2,000) mu liiye lyoowo lyoosi babanyala baatimila khu ŋwaaŋwa, niye kane akhuwe iwe tsiŋwaaŋwa bikana bibili (2,000) batsitimilekho. 24Ne ari iwe unyala uryeena waawula ikhaba lituuli lifwiiti liri lye kamaye ka Asiriya, nga iwe ulikho wiyikina kamakaari ni babaatimila khu ŋwaaŋwa babaama mu Misiri? 25Ni shishiindi, iwe wambaasa uri ifwe khweetsile khukhwibwakala shiifwo shino ni khuushoonakisa akhali Umukasya khuukhulakila ifwe ta? Umukasya umweene akhulomeele ifwe ari, ‘Ni mutsye mwoonakise shiifwo isho.’ ”

26Kila Eliyakimu umwaana uwa Hilikiya, atweela ni Shebuna ni Yowa balomela umurobore uwaba mu lisiina ly’omuyiinga bari, “Ifwe khwaakhwikoontseleele n’ukhukanikheyo mu luulomo lu Aramayiki, lweesi khumanyile buulayi. Ukhakhukanikhayo mu Luheburaniya ta, khulwekhuuba abo babeekhaale khu kutikiiyi khu ngaaki beetsa khumanya byeesi uli khuukanikha.”

27Ne umurobore uw’omuyiinga yuno welamo ari, “Inywe mwambaasa muri umuyiinga wase anomele ise khuubaboolela inywe n’umuyiinga weenywe mwenyene biilomo bino? Ikhaba babekhaale khu kutikiiyi nabo bali ni khuubiwulila, khulwekhuuba mweesi muli mu mutaambo nikwo mutweela.”

28Kila umurobore yuno emikha khu ngaaki akuukuula ni likono liikali mu Luheburaniya nga aloma ari, “Mweesi ni murekeerese buurume buno bubwaama isi umuyiinga umukhulu naabi uwa Asiriya! 29Umuyiinga alikho aloma ari: ‘Mukhafukiilisa bubeeyi bweesi Hezekiya alikho ababoolela ta. S’ananyala khuukhusoolanisa ise, nio abawonese inywe ta. 30Akhabasiluwasa inywe nga abalomela ari Umukasya kane abawonese ta, namwe ari ba Asiriya singene banyalise khuuwaamba shiriimba shino ta.’

31“Mukhatsiila khu bya Hezekiya ta! Khulwekhuuba umuyiinga wa Asiriya alikho aloma ari: Khayo khukhole buusaale, yikulawo biilibwa wiitse isi ise ndi. Musaambo yino, kane imbalekhe mubewo baalamu. 32Nio lwanyuma ise niitse imbayile mu liloba liliindi liliili nga lino; liiloba liilayi lilimo biilyo biikali, mulekhe khufwa intsala ta. Mukharekeeresa bubeeyi bwa Hezekiya khuubaboolela ari kane Umukasya abawonese ta. 33Iliwo wele uwe linaambo lyoosi uwawonesakho babaandu beewe khukhwaama mu makhono k’omuyiinga uwa Asiriya? 34Ba wele be ba Hamasi ni ba Arupadi bali wahena? Ne ba wele be ba Sefaruvayimu, ni ba Hena, ni ba Iva, bali wahena? Ba wele baabwe baanyala khuubawonesa khukhwaama mu makhono kaase? 35Mu ba wele be kamanaambo koosi, iliwo yeesi uwawonesa babaandu beewe khukhwaama mu makhono kaase? Ne ari shiina kila mwambaasa muri Umukasya kane awonese Yerusalemu?”

36Ne babaandu baarama nga basilile busa baalekha khumwiilamo shishiindu shoosi ta, khulwekhuuba abe Hezekiya waabalakiile khuulekha khwiilamo ta. 37Kila Eliyakimu umwaana uwa Hilikiya, abe uraangilile be mu lubili, atweela ni Shebuna abe uli umuroni, ni Yowa umwaana uwa Asafu nga niye urona bibyakholikha biikhale bye bayiinga, baakobolayo. Bonuulaka bikwaaro byaabwe khulwe kumutaambo kumukali, baatsya isi umuyiinga baamuboolela byoosi byeesi umurobore uwaba mu lisiina ly’omuyiinga uwa Asiriya aabalomela.