Swahili Bible2

17

Umuyiinga Hosheya uwa Isiraeli

1Hosheya umwaana uwa Ela ekyela umuyiinga uwa Isiraeli nga Ahazi wawulile Yuda khuumala kimiiko likhumi na kibili. Wawula nga ali mu Samariya khuumala kimiiko syeenda. 2Ikhaba nga akhola bibiindu bibikhali biilayi ta mu moni tsy’Omukasya, ne s’olela bayiinga ba Isiraeli babaaramile babaamunyoowa niye ta.

3Umuyiinga Shalumaneseri uwa Asiriya webwakala naluundi waafuura umuyiinga Hosheya mu busoolo. Nashiryo waamiinilisa Isiraeli khuuwaanayo kumusolo isi Asiriya, buli mwiiko. 4Ne lwanyumakho Hosheya waalyamo umuyiinga uwa Asiriya luwomelo, nga arumana baarume isi umuyiinga uwa Misiri bari eetse amuyeete erusekho buuwuli bwa Asiriya, ni busiro bwe kumusolo kweesi aawaanayo buli mwiiko. Umuyiinga uwa Asiriya n’amala khuufuumbula luwomelo luno, waawaamba Hosheya waamubowa mu mapuusu.

Khuuwaambibwa khwa Samariya

5Lwanyuma umuyiinga uwa Asiriya Shalumanaseri webwakala shibala sha Isiraeli shoosi, waarama nga webotookheleele Samariya khuumala kimiiko kitaru. 6Nga Hosheya woolisile kimiiko syeenda, umuyiinga uwa Asiriya waawaamba Samariya, waasuta ba Isiraeli boosi waabayila mu Asiriya nga baabowe. Waabara khuumenya mu shifwo bari Hala, shishiili aambi ni luluutsi Habori mu Gozani, ni mu biriimba bye ba Medi.

7Shino shaba shiryo khulwekhuuba abe ba Isiraeli baaminyaaliile Umukasya Wele, uwabarusa i Misiri isi baaba bataambisibwa ni Faraawo umuyiinga uwa Misiri, naluundi nga besaaya ba wele babaandi. 8Abe baayiyika tsisaambo tsiimbi tsye kamanaambo kakaandi keesi Umukasya aanyoowa khuutimisa khukhwaama mu shibala isho, nga ba Isiraeli bashiili khukhwoolamo ta, naluundi tsisaambo tsyeesi bayiinga ba Isiraeli baarakikhisawo. 9Nashiryo ba Isiraeli baakhola bibiindu bibikhali biilayi ta mu shimoonyo busa, nga babibisa khu Mukasya Wele. Mu biriimba byaabwe byoosi, biboofu ni bikyeekhe byeene boombakhamo kamesaayilo ke ba wele babaandi. 1017.10: 1 Bay 14.23Boombekha bisiindi bye khukhwisaaya ni ba wele Ashera khu buli lukiingi na buli kuusaala kuboofu. 11Mu bweenemwo booshelamo bubaane nga kamanaambo kakaandi keesi Umukasya arusawo, abe ni kakhola. Naluundi bakhola bibiindu bye bubwoonaki, waakila Umukasya waabakhalalila. 12Naluundi besaaya bifwaani, ikhaba nga abe Umukasya abalomela ari bakhashikhola ta. 13Ate nga muŋali Umukasya areewula Isiraeli ni Yuda nga abirira mu buli muŋoosi, ni be kamakhula nga aloma ari, “Ni mulekhele awo khuukhola bibyoonako, muloondelele kamakaambila kaase ni biilakilo byase, mu khuuloondekhana ni sheesi ise nalakila bakuuka beenywe khukhola, naluundi sheesi nabarumanila inywe nga imbira mu bakaanisi baase baŋoosi.”

14Ne ba Isiraeli baalekha khurekeeresa ni khuufukiilisa mu byeesi Umukasya Wele aloma ta, nabo baaba baamiinyi nga bakuuka baabwe ni baaba. 15Baalekelesa kamakaambila keewe, ni khuureewula khweewe, n’indakaano isi aakhola ni bakuuka baabwe. Besaaya bifwaani, bekyela be bubeeyi, naluundi baaloondelela tsisaambo tsiimbi tsye kamanaambo kakaandi. Umukasya abe waabareewula khuulekha khukhola bibiindu bino ta. 1617.16: 1 Bay 12.28Baantsukha kamakaambila k’Omukasya Wele, bekholela babeene bifwaani bibili bye tsimoosi khukhwaama mu buroonzi. Baabuumba wele Ashera naluundi besaaya wele Bayaali ni bisaambwa byoosi bye mu ngaaki. 1717.17: Maka 18.10Boola ni khuuwaanayo babaana baabwe besiinde ni bakhaana nga tsisaayilo tsintsoshe. Baakholatsaka bye khulakula ni bufumu. Baryo bakhola bibyoonako biikali mu moni tsy’Omukasya, waakila waabakhalalila naabi. 18Nashiryo Umukasya waakhalalila naabi ba Isiraeli, shaakila baasutibwa baayilibwa nga baabowe. Mbaawo na mutweela uwarama ta, akhali shikuuka sha Yuda shonyene. 19Ne babaandu be mu Yuda nabo baalekha khuuloondelela kamakaambila k’Omukasya Wele waabwe ta, ne beebirisa khuuloondekhana ni tsisaambo tsiimbi tseesi ba Isiraeli baarakikhawo. 20Nashiryo Umukasya waaloba lisaaye lya Isiraeli lyoosi, waabawa shitaambiso, waabalekhela babaandu babaandi baabebwakala, khukhwoolisa ni baaweelawo ilala. 21Khulwekhuuba nga Umukasya waarusile Isiraeli khukhwaama mu makhono ke shikuuka sha Dawudi, baawaamba Yerobowamu umwaana uwa Nebati, baamwikyelisa umuyiinga. Yerobowamu waababorosa, baarura khu mukhoosi kwe khukhwisaaya Umukasya, baakhola shishoonako she kamaani naabi. 22Ba Isiraeli baloondelela bibyoonako bya Yerobowamu, baalekha khubirurakho ta. 23Khukhwoolisa Umukasya n’abamalilawo ilala boosi, nga abe n’amala khuureewura khuubirira mu baŋoosi. Baryo babaandu ba Isiraeli baayilibwa mu bubowe mu Asiriya, isi bashiili ni khukhwoolisa lwe shaleelo.

Babeetswa bamenya mu Isiraeli

24Lwanyuma umuyiinga uwa Asiriya waareera babaandu khukhwaama mu Babulooni, Kusa, Ava, Hamasi, ni Sefaruvayimu wabara mu biriimba bye mu Samariya, mu shifwo she ba Isiraeli. Samariya shekyela shishaabwe, bamenya ni mu biriimba byaabwe. 25Nga babeetswa bano ne balyoolileyo abe sibamanya khukhwisaaya Umukasya ta. Nashiryo Umukasya waasiindikha tsitalanyi tseerakamo baalala khu nibo.

26Buurume bwoolela umuyiinga uwa Asiriya nga buloma buri, “Babeetswa beesi wayila mu biriimba bye mu Samariya sibamanya khukhwisaaya Wele we liloba ilyo ta. Nashiryo waasiindikhile tsitalanyi tsilikho tsibeera. Khulwekhuuba sibamanya khuumwisaaya ta.”

27Kila umuyiinga uwa Asiriya alakila ari, “Bukula khaangu mutweela khu basaayi beesi mwaamisa iyo mwareera ino mumwiiseyo. Khayo atsye aleekele babaandu isaambo iye khukhwisaayamo.” 28Nashiryo mutweela khu basaayi abe isi baayila mu bubowe waakobolayo mu Beseli, waabaleekyela isaambo iye khukhwisaaya Umukasya.

29Ne buli babaandu beloosela khukhwisaaya ba wele baabwe, naluundi boombekha bunamwiima mu bifwo abe byeesi ba Isiraeli besaayilamo. 30Abo babaama i Babulooni besaaya bifwaani bya wele waabwe Sukosi Benosi, be Kusa besaaya Nerigali, be Hamasi besaaya Ashima. 31Babaama i Avitesi besaaya Nibuhazi ni Tarutaka, be i Sefaruvayimu bawaanayo babaana baabwe nga tsisaayilo tsintsoshe isi Adurameleki ni Anameleki, bawele baabwe.

32Abe besaaya Umukasya, ne shitweela busa baroboramo babaandu babaakhali batweela ta khuuba nga basaayi, khuwaanayo tsisaayilo mu mesaayilo ke ba wele baabwe. 33Ni nashiryo ikhaba nga besaayatsaka Umukasya, ne besaaya ni bawele baabwe, khuuloondekhana ni kamanaambo keesi baabamisamo. 3417.34: Rak 32.28; 35.10Khukhwoolisa shaleelo bashisaaya musaambo tsaabwe tsikhale.

Sibesaaya Umukasya ta, naluundi sibaloondelela indeekela yeewe namwe bilakilo byeewe namwe kamakaambila keewe keesi alakila lisaaye lya Yakobo, isi ashuusa lisiina khuuba Isiraeli, ari baloondelele ta. 3517.35: Luky 20.5; Maka 5.9Khulwekhuuba abe Umukasya akhola ni nabo indakaano, nga abalakila ari, “Mukhesaayatsaka ba wele babaandi namwe mwaabawa shiriifwa, namwe mwaabawa biwaanwa ta. 3617.36: Maka 6.13Akhali muli ni khukhwisaaya Umukasya uwabarusayo inywe khukhwaama mu Misiri, nga araambisa kamaani kamakali naabi ni bye kamakaanga. Muli ni khuumwisaaya niye yenyene naluundi muwaaneyo tsisaayilo. 37Khuuleekela ni biilakilo ni kamakaambila k’Omukasya, keesi aabaronela inywe, muli ni khuukaloondelela. Mbaawo khukhwisaaya ba wele babaandi ta. 38Mukhebililatsaka indakaano isi ise ikholile ni nanywe ta. Mukhesaayatsaka ba wele babaandi ta, 39Akhali muli ni khukhwisaaya Umukasya Wele weenywe. Niye yenyene ukhaabamuse inywe khukhwaama mu khutaambisibwa ni baasiku beenywe.”

40Ne nibo baalekha khuuloondelela by’Omukasya ta, bebirisa musaambo tsaabwe tsikhale. 41Nashiryo babaandu bano besaayatsaka Umukasya, ne abe shitweela busa besaaya bifwaani byeesi baaba nabyo. Ikhaba kimiboolo kikyabaloondakho khukhwoolisa shaleelo, bakhola baryo.